Rokstu sagataveja: portals lakuga.lv

Koč i Mikeļa dīnu svieteisim piec nedelis, 29. septembrī, jau itymā nedeļgolā daudzi kur Latgolā nūtiks tiergi i vysaidys aktivitatis, kas veļteitys itai dīnai. Lai laiceigi sasagataveitu svātkim, īsacejumus itai nedeļai īsoka pats gaviļnīks i rodūšuos lauku sātys “Leiceiši” vīns nu jaunūs saiminīku Mikelis Jurčenko.

Sveču atbolsts

Mikelis ir aktivs bārns, kuram ir eipaša saikne ar vysu motorizātū – motociklim, kvadriciklim. Kab varātu sev nūpierkt kvalitativu motociklu i suokt nūsadorbuot ar itū sporta veidu augstuokā leiminī, jis kruoj naudu. Kab sasnāgtu itū mierki, Mikelis ar muotis paleidzeibu taisa sojis voska svecis i puordūd tuos i tiergūs, i škārsteiklā. Pi sveču vari tikt, rokstūt Mikeļa vacuokim Instagram, voi caur sātyslopu radosaseta.lv. Taipat tyvuokais tierdzeņš, kurā variesi satikt Mikeli i nūpierkt juo svecis, byus 4. oktobrī “Osteria by IGGI” uobeļduorzā.

Saimisteibys apmekliejums

Mikelis ir ari dobys bārns, dzeivoj laukūs i sovā saimisteibā audzej vystys, meža zyrgus i augstzemnīku gūvs, ar kurom jam pateik pavadeit laiku. Rudinī, dasokūt ekskurseju, ari cytim ir vareiba pabaruot i apsavērt rodūšajā lauku sātā “Leiceiši” dzeivojūšūs dzeivinīkus. Vaira informacejis ITE.

Mikeļa dīnys godatiergi

Mikeļa dīna nav īdūmojama bez boguotajim rudiņa ražys godatiergim, deļtuo nūteikti apmeklejit kaidu nu tūs! Tai atbaļsteisit vītejūs zemnīkus, amatnīkus, mozūs ražuotuojus i izbaudeisit breineigū Mikeļa dīnys atmosferu. Informaceju par godatiergim vysā Latvejā vari atrast ITE.