Rokstu sagataveja: portals lakuga.lv

18. septembrī Latvejis Nacionaluo kulturys centra (LNKC) Namaterialuo kulturys montuojuma padūme sprīde par jaunu vierteibu īkļaušonu Latvejis Nacionalajā namaterialuo kulturys montuojuma sarokstā, informej centra puorstuove Lana Kazlauskiene. Sešu jaunūs īkļautūs vierteibu vydā ir ari garmanis spēle Latgolā i Nautrānu kulturtelpa.

LNKC jau ostoitū reizi aicynuoja dasaceit elementus, kas atbylstūši Namaterialuo kulturys montuojuma lykumam ir skaitomi par vaļsts aizsorgojamom namaterialuo kulturys montuojuma (NKM) vierteibom i kurūs īkļaušonai sarokstā ir plots attīceiguos kūpīnys atbolsts i leidzdaleiba.

Itūgod kūpā tyka sajimti ostoni elementu dasacejumi, kū padūme viertēja divejuos kuortuos i nūsprīde sarokstā īkļaut sešys NKM vierteibys: “Garmanis spēle Latgolā” (dasaceituojs – bīdreiba “Skaņumāja”), “Pierts tradiceja Latvejā” (bīdreiba “Latvju pirts un SPA asociācija”), “Tolku tradiceja Latvejā” (bīdreiba “Pēdas LV”), “Latvejis tradicionaluo spēle – novuss” (Guntars Brālītis, World Novuss Union (WNU e.V.) prezidents), “Nautrānu kulturtelpa” (Rēzeknis nūvoda pošvaļdeibys īstuode “Nautrānu apvīneibys puorvaļde”) i “Niegu zveja Salacā i Svātupē” (bīdreiba “Salacgrīvas nēģi”).

Padūmis prīšksādātuoja Māra Mellēna pastreipoj: “Latvejis Nacionalū namaterialuo kulturys montuojuma sarokstu itūgod papyldynoj sešys Latvejis kulturtelpai byutyskys dzeivuo montuojuma vierteibys. Eipaša prīca par tū, ka sarokstam pīsavīnoj divejis myusu dīnu dzeivis ritmam svareigys vierteibys, kurys ir cīši daudzsluoņainys i atškireigom kūpīnom leidzeigys, vystik kotra sovpateiga, ar cytaidu raksturu – tolka, kas aktualizej breivpruoteiga, iz kūpeigu mierki vārsta kūpdorba dareišonys i svieteišonys tradicejis vysuos Latvejis viesturyskajuos zemēs, i piertī īšona, kas aktualizej teireibys i lobbyuteibys daudzuos izpausmis storp guni i iudini, korstu i soltu, rupu i meikstu, fizisku i goreigu, kam pamatā kūpeigys zynuošonys par dobys ritiejumu, piertī īšonu, augim i tūs lītuojumu veseleibys i lobsajiutys radeišonā perūtīs, mozgojūtīs i dzīdynojūtīs. Tikpat svareiga ir Nautrānu kulturtelpys apzynuošona i izceļšona, kas paruoda latgaliskuo eipašu škautni draudzis kulturtelpys ramūs. Kur tod vēļ nēgu giušonys muoka Salacā i Svātupē, garmanis spēlis prasmes i novuss, kuram tik daudz pīkritieju i šudiņ, i natuolā paguotnē. Izmontojam vareibu svieteit namaterialuo kulturys montuojuma vierteibu daudzveideibu!”

LNKC aplīcynuojumi par jaunūs vierteibu īkļaušonu sarokstā tiks padūti svineigā ceremonejā 17. oktobrī, kū Apvīnuotūs Naceju Izgleiteibys, zynuotnis i kulturys organizaceja pasludynuojuse par Storptautyskū Namaterialuo kulturys montuojuma dīnu.