Rokstu sagataveja: portals lakuga.lv

3. novembrī myužeibā nūguojuse Latvejis Muokslys akademejis i tuos Latgolys filialis docente Inta Pujāte (1957–2025), informej juos kolegi.

Inta Pujāte dzymuse Rēzeknē, izgleiteibu muokslys zynuotnis jūmā dabuoja Latvejis Muokslys akademejā. Jau suocūt dorba gaitys J. Raiņa Literaturys i muokslys muzeja filialē – J. Rozentāla i R. Blaumaņa memorialajā muzejā – 1979. godā, īsazeimēja I. Pujātis interešu lūks – Latvejis 19. g. s. beigu i 20. g. s. suoku muokslys izpiete.

Vysuvaira juos zynuotnyskuos izpietis temys saistejuos ar gleznuotuoja Jaņa Rozentāla dailradi i tū rodūšū i kulturys vidi, kura dominēja Latvejis muokslā 20. g. s. suokuos. Saturyskai vierteigi i nūzeimeigi ir pietnīcyskī roksti par portretu žanru, akvareļgleznīceibu, mitiskū i mistiskū 20. g. s. suoku žurnalu grafikā. Nu 2013. gods I. Pujāte laseja lekceju kursu “Fotografejis viesture” Latvejis Muokslys akademejā i 2024. godā aizstuovēja promocejis dorbu “Fotogrāfija Latvijā 19.gs. beigās un 20.gs. sākumā”, papyldynojūt muokslys zynuotnis lauku ar byutysku i vajadzeigu pietejumu.

Jau nu 2006. gods I. Pujāte laseja lekceju kursus ikonografejā, Rītumeiropys muokslys viesturē, tyvūs regionu muokslā Latvejis Muokslys akademejis Latgolys filialē. Studeju procesā jei breineigai izmontuoja tuos zynuošonys, pi kurūs beja tykuse muokslys viesturis pietnīceibys laikā. Pret studentim Inta Pujāte vysod beja praseiga, deve vyspuseigys zynuošonys muokslys viesturē, organizēja studeju procesu papyldynojūšys ekskursejis pa Latveju, Leitovu i Igauneju. 

Atsavadeišona nu Intys Pujātis byus 8. novembrī 11 stuņdēs Rēzeknis nūvoda Iļžukolna kapleicā, atdusys vīta – Vuorkaļu kopūs Iļžukolna pogostā.

Portals lakuga.lv izsoka leidzjiuteibu Intys Pujātis tyvajim cylvākim.