Rokstu sagataveja: portals lakuga.lv

Oktobra golā grupa “Reibums” publicēja sovu pyrmū albumu “I”. Kai viestej poši grupys puorstuovi, itys mini albums ar septeņom dzīsmem ir kai atskaite par padareitū pādejūs godu laikā. Tuo nūsaukums nūzeimoj romīšu ciparu “vīns”.

Stuostūt par albuma nūsaukuma izalaseišonu, grupa “Reibums” nūruoda, ka ari slovonajai grupai “Modern Talking” pyrmais albums saucēs “The 1st Album” aba “Pyrmais albums”, sovpus “Reibumam” vēļ vīnkuoršuok – ka kod nabejs byus ūtrais albums, tū nūsaukšūt par “II”. Grupys puorstuovi soka, ka vairuokys nu albuma dzīšmu īraksteitys jau paseņ, tok tik niu saguojs vysu apkūpuot vīnā albumā.

“Albums suocās ar Gunāra Indričāna, plotuok zynoma kai GuntiX dzīsmi “Balāde par Donatu”, tei beja pyrmuo dzīsme, kurū mes kai grupa īsavuicejom i bez kurys nav bejs nivīna “Reibuma” koncerta. “Reibums” bez Donata nav “Reibums”,” tai grupys puorstuovi.

Sovpus “Kafeja i cigaretis” ir grupys buņdzinīka Valera Spāka meiluokuo dzīsme, kurū spielēt dzeivajā. Kūpumā dzīsmis ir eisys, ar panka pīskaņu i dīzgon vīnkuoršys. “Maņ pateik minimalismys, pīmāram, dzīsmē “Palīc te” izmontuoti tik div akordi,” doluos grupys puorstuovs Vitaļs nu Kaunatys. “Interesants fakts, ka nūslādzūšajā dzīsmē “Vyss” suokumā dzierdamī sirdspuksti ir muni eistī, dalīkūt mikrofonu da kryuteža. Mikrofons labi uztvēre munus sirdspukstus, i asmu burtiski īlics sovu sirdi itymā mini albumā. Sovpus dobys skanis, kas dzierdamys paraleli sirdspukstim, īraksteitys Kaunatys pogostā, eista Latgolys dobys skaņa,” tai Vitaļs.

Albums īraksteits Kaunatys īrokstu i reizē mieginuojumu studejā, vyss apstruoduots pošu spākim, varūt pat saceit, ka sātys apstuokļūs. Īrokstā nivīnai dzīsmei nav izmontuota automatiskuo reguliešona aba autotune, par kū Vitaļs soka, ka koč i grupa ir panki, jim pastuov sovi kvalitatis standarti.

“Lāmums, ka itys albums byus daīmams vysim par breivu, tyka pījimts ar mierki, kab vīgļuok byutu izplateit īrokstu i veicynuot latgaliskuo satura breivu pīejameibu. Īrokstus var izmontuot vysi, suocūt nu parosta klauseituoja, leidz pat radejai, tik juonūruoda autors,” tai Vitaļs.

Grupa “Reibums” īt nu Rēzeknis nūvoda Kaunatys pogosta. Itūšaļt grupā spielej treis cylvāki – Vitaļs (gitara i vokals), Imants (basgitara i vokals) i Valers (bungys). Grupa rodusēs 2020. godā, kod treis draugi nūlāmuši reizi pa reizei sasatikt, kab saspielēt muzyku. Suokuos puišim nabeja lela plāna par grupys sataiseišonu, tok piec puora mieginuojumu jī nūsprīde, ka vajag nūspielēt kaidu koncertu, i tai tei līta aizguojuse.