Rokstu sagataveja: portals lakuga.lv

Ar jaunu elpu i plotuoku skotu raidejums “Latgolys susātivs” ar ūtrū sezonu atsagrīž pi televizejis skateituoju, kab atkluotu vēļ naizzynuotus Latgolys stuostus. Pyrmais raidejums veļteits bezdorba vaicuojumim, tū varēs vērtīs jau 15. novembrī kanalā TV24 17 stuņdēs, ar atkuortuojumu svātdiņ 10.30 stuņdēs. Taipat tū ruodeis ari kanala ReTV vierszemis apraidē, Latgolys regionalajā televizejā 17.30 stuņdēs.

Pyrmajā “Latgolys susātiva” sezonā taišni pyrma goda tyka viesteits par “susātiva” pusem treis dažaiduos nūzarēs – kulturā, volūdā i medejprateibā. Itūreiz, ūtrajā sezonā, ir pasalelynuojs raidejumu skaits i tiks dasadūrts gona nūpītnom temom ekonomikā, turysmā, medicinā i izgleiteibā.

Deļkuo Latgola vys vēļ sasadur ar augstu bezdorba leimini? Kai pīrūbeža tyvums i geopolitiskuos situacejis sakys izjiut vītejī uzjiemieji i kai tū varātu puormeit, īsasaistūt vaļsts institucejom? Itī ir tik daži nu vaicuojumu, iz kurim atbiļdis maklātys pyrmajā “Latgolys susātiva” raidejumā.

Regiona nūdarbynuoteibys i dorba tierga sovpateibys atkluos Nūdarbynuoteibys vaļsts agenturys Daugovpiļs filialis vadeituoja Jurate Kornutjaka, sovutīs statistiskūs datus i ruodeituojus komentēs Latvejis Universitatis Ekonomikys i socialūs zynuotņu fakultatis profesore Sandra Jēkabsone. Kab izzynuotu patīsū uzjiemiejdarbeibys vidi Latgolā, raidejums gasteis divejūs uzjāmumūs. SIA “Eka Paipalas” Augšdaugovys nūvoda Sveņtis pogostā, kas nūsadorboj ar pošu audzātu paipalu ūleņu eksportu i vairuoku godu laikā uzjāmums, kurā struodoj daži cylvāki, puortaps par Baļtejā leluokū paipalu uzturiešonys kompleksu. Taipat raidejums byus kluotyn svineigā šaļtī šyušonys cehā SIA “Nemo” Kruoslovā, kas tikū atkluojs izremontātu i labīkuortuotu cehu sovim darbinīkim. Šyušonys uzjāmumam ir godu desmitem boguota pīredze, tys guojs cauri vysaidim laikim, partū var pasadaleit ar izaicynuojumim, rysynuojumim i viertēt regiona specifiku.

Projekta “Latgolys susātivs – turpynuojums” mierkis ir sataiseit pīcu televizejis raidejumu cyklu, kas byutu turpynuojums jau īprīšk veiduotajam raidejumu cyklam latgalīšu volūdā “Latgolys susātivs” par aktualim problemvaicuojumim Latgolā. Raidejumūs tiks aktualizātys i analizātys sabīdryskai svareigys temys, kai bezdorbs i tuo cālūni, inflaceja regionā, izaicynuojumi medicinys nūzarē, turysma atteisteiba i izgleiteibys reformys sakys. Nūsaukumā latgaliskais vuords “susātivs” latvyski nūzeimoj “ēna”, i tys simboliski paruoda raidejuma golvonū ideju – īsavērt realuos vidis “susātiva pusē”, kab maklātu problemu cālūņus i skaidruojumu. #SIF_MAF2025

Raidejumus piec tūs puorraidis varēs atrast LRT sātyslopā lrtv.lv, kai ari vītnēs Facebook, YouTube i platformā xtv.lv.

Raidejuma veiduotuoji gaideis ari jiusu atsauksmis i īsacejumus LRT socialūs medeju vītnēs, kai ari e-postā lrt.zinas@inbox.lv voi zvonūt/rokstūt iz t. nr. 26339536.

Projektu finansej Medeju atbolsta fonds nu Latvejis vaļsts budžeta leidzekļu. Par raidejumu cykla “Latgolys susātivs – turpynuojums” saturu atbiļd SIA “Latgales reģionālā televīzija”. #SIF_MAF2025

Publikaceju apmoksoj Latgolys regionaluo televizeja