Rokstu sagataveja: Amanda Anusāne/portals lakuga.lv

Sastdiņ, 22. novembrī, Rēzeknis nūvoda Drycānu kulturys nomā ar divejim izpierktim koncertim i lelu draugu pulku grupa “Dricanu dominante” svieteja sovu 20 godu jubileju. Ari es, Amanda Anusāne, brauču iz itū koncertu, lai tev ļautu īsavērt tuo aizkulisēs i nūdūtu drupeit tuos sajiutys, kas vaļdeja pasuokuma laikā.

Iz pasuokumu īsarūnu 40 minutys pyrma papyldkoncerta, kas nūteik 13 stuņdēs, tok vītys, kur nūlikt mašynu, jau gondreiž nav. Cylvāki šmukuos štātēs, ar pučem rūkuos vestibilā pierk beletus, pi durovu ļauds gaida, kod zālē varēs ījimt lobuokuos vītys. Es zālē tyku dreižuok. Pat paspieju nūgiut puora kadrus nu mieginuojuma, tok dreiži viņ īmu atpakaļ iz vestibilu. Tī nūpierku grupys disku, kas izguojs par gūdu itai jubilejai i raugu nūgiut kulturys noma vadeituoju Sarmeiti Stepiņu iz puora vuordim, lai izzynuotu vaira par pasuokuma aktualitati. “Kulturys noma zālē ir 272 vītys, iz vokora koncertu vysys iztierguojom cīši dreiži. Kai redzi, iz papyldkoncertu jau puse zālis ir aizjimta. Cylvāki sabraukuši nu vysu molu – Smiļtinis, Bolvu, Reigys, Guļbinis, Preiļu, Leivuona, Tukuma i cyturīnis,” soka Sarmeite i dreiži atsagrīž pi beletu tierguošonys. Es pacīteigi pieteju nūteikūšū i gaidu, kod Sarmeite otkon varēs pīsavērst sarunai.

“Itūgod par pasuokumu apmekliejumu navaru žāluotīs. Daudzi apmeklēja 18. novembri, vēļ prīškā ari Zīmyssvātku pasuokums. Tok itys koncerts ir goda ažiotaža – Madonna atsapyuš i nervozi peipej styurī,” smejūtīs par apmaklātuoju skaitu, stuosta kulturys noma vadeituoja Sarmeite.

Cīši ilgi nagrybu aizkavēt Sarmeiti, deļtam suocu izvaicuot koncerta apmaklātuojus. “Ite asam pyrmū reizi, atbraucem nu Leivuona, pa ceļam pietejom šmukū apleicīni, drupeit ari apsamaļdejom, bet vyss kuorteibā. Naseņ bejom ari iz koncertu “Gorā”. Rudinī ar muosys i bruoļa saimem tai i braukalejam apleik. Cīši pateik “Dricānu dominante”. Nu koncerta sagaidu pozitivys emocejis,” tai pasuokuma apmaklātuoja Ligita.

Tai kai grupa pyrma koncerta ar mani runuot nasataiseja, īmu vydā zālē, lai gaideitu koncerta. Maņ sūpluok sēd vītejuo dama pīkluojeigā vacumā, ar kurū aizsuocam sarunu. Kod jei suoce stuosteit par Andra Eriņa dzīsmem, saprotu, ka sarunu juosuoc īraksteit. Ar juos atļuovi tū ari izdoru. “Vysuos Andra dzīsmēs vajag īsaklauseit. Tom ir tik dzili vuordi – ar jāgu. Es pat disku nūpierku, lai veirs var sātā klauseitīs – jis šudiņ navarēja atīt iz koncertu. Tai kai jī vysi ir drycānīši, tod naatīt iz koncertu byutu grāks! Baiba Zarāne mums ir tuvs draugs. Školā 25 godus struoduoju kai tehniskuo darbineica, maņ tī bārni – Aldis i Madara (grupys dalinīki – A.A.) – ir zynomi. Es pat atguodoju, kai Aldis braukuoja iz muzykys školu. Jis ir suocs nu mozumeņa i tik daudz ir sasnēdzs,” tai koncerta apmaklātuoja i muna sūpluok sādātuoja Aina. Cikom mes ar Ainu runojam, vestibila durovys pamozam aizataisa, cylvāki suoc palikt klusuoki, iz skotivis izīt Andra Eriņa meita Agnese, kas ir ari ituo vokora vadeituoja, i koncerts var suoktīs.

Ar aplausim i Agnesis sasavasaluošonys vuordim teik īsuokts koncerts: “Ir īrosta paruodeiba, ka muzykys grupā apsavīnoj vīnys paaudzis dalinīki, kurim nav cīši lela godu starpeiba. Taipat bīži mainuos ari grupu sastuovs, tok ar “Dricānu dominanti” ir cytaiži. Vīns sierms veirs turīs kūpā ar trejim jaunīšim jau namaineigā sastuovā vasalus 14 godus. Par kū tai, tū raudzeisim izstuosteit koncerta gaitā. Iz skotivis aicynojam grupu “Dricānu dominante”!” Koncertu grupa īsuoc ar dzīsmem “Rudens sūtība” i “Palikt un atsagrīzt”.

Lai ari itys ir “Dricānu dominante” 20 godu jubilejis koncerts, tok tymā pīsadola taidi grupys draugi kai vokalais ansamblis “Almus”, Gints i Girts Ločmeli, Dana Vasiļjeva, Deniss Smirnovs, Valdis Zemzars i Igors Čistjakovs. Taipat ar sovom solo dzīsmem uzastuoj Andris Eriņš i Aldis Kise. Eipaši sirsneigi prīšknasumi ir Alda i juo dāla Ginta izpiļdejumā. Koncertā izskaņ īprīškpādejuo dzīsme i Andris pajūkoj, ka palykušys pādejuos 26 dzīsmis, tok dasoka, ka runoj par ūtrū, vokora koncertu.

Koncerts beidzās ar dzīsmi, kurā vīnojās vysi koncerta daleibnīki i apmaklātuoji. Pučis ir paduovynuotys, apsveikuma vuordi pasaceiti, tok vestibilā grupu vēļ gaida aktivuokī atbaļsteituoji, kuri pīmiņai grib sataiseit biļdi ar dzīduotuojim. Cikom grupa biļdejās, es gataveju diktafonu i gaidu tuos dalinīkus iz eisu sarunu.

Nūsveiduši, bet saviļņuoti muziki ir gotovi ar mani suokt sarunu. Par tū, ka byus tik lela interese par pasuokumu muzikim nabejs švuorbu, tok koncertu, par pīmāru, koncertzālē “Gors” nagribiejuši taiseit, kam asūt drycānīši i sātā uzastuot asūt vysulobuok. Prosu par jūs veiksmis atslāgu vysus itūs 20 godus, iz kū Aldis atbiļd: “Nazynu, kaids veiksmis atslāgs ir Andram, tok mums ir veirs, kas nas gaišuma – tys ir Andris.” Pats Andris papyldynoj: “Mums ir bejs taids eksperimentu laiks, kod sastuovā beja cyti dalinīki, tok kaids naizturēja attuolumu, kaids – atbiļdeibu.” Piec jubilejis grupa nikur nasataisa pagaist. Tai kai jubilejā muzicēja daudzi cytu muokslinīku, tod vaicuoju, parkū tik plotu draugu pulku salasejuši, iz kū Andris atbiļd: “Mes ar jim vīnkuorši jiutomēs labi. Kai bez jūs? Gints mums tik daudzi ir paleidziejs ar aparaturu, pi juo studejā ari asam īrakstejuši dzīsmis. Zemzars myus ir apskaņuojs vairuokys reizis. Kai Danu naaicynuosi, ka jei pādejuo mieneša laikā izdareja taidu dorbu – sataiseja disku!”

“Itys ir myusu pyrmais diskys, kurā apkūpuots vyss lobuokais, kū pa itim godim asam sadarejuši. Tys taids lobs atskaitis punkts, tok juocer, ka nuokušais diskys nabyus iz 40 godu jubileju,” smejūtīs soka Aldis. Jis ari dasoka: “Myusu dīnuos tys disks jau ir taids kai taustoms suvenirs, kuram varbyut tik vāluok byus leluoka vierteiba. Maņ pošam sātā stuov daudzi naattaiseiti diski, jo nav pat aparata, kur tū īlikt. Taipat dreizumā itys albums byus ari vysuos straumiešonys platformuos, bet ir breineiga sajiuta tū pajimt rūkā.”

Nūslāgumā vysim vaicoju, kas ir tei šaļts voi nūtikšona, kas vysuvaira palykuse atmiņā, par pīmāru, daleiba “Latvejis šlageraptaujā”. Andris soka: “Tu pīminieji Šlageraptauju. Dūmoj, ka myus tī, Ventspilī, baigi labi uzjēme? Mes sovys kleitys i uzvalkus karynuojom līpys zorā. Gludynuot nabeja kur. Tod veromēs, ka tī ir lela telts. Maņ leidza beja i gludeklis, i gludynojamais dieļs, mārgom soku, lai īt tī pagludynuot. Īmam īškā, tī mums prosa: “Ko jūs šeit darāt?” Mes sokom, ka telts tukša, meklejam vītu, kur pagludynuot drēbis. “Šī telts ir Raimondam Paulam,” jī mums atsoka. Tamā šaļtī saprotom, ar kaidu attīksmi jī izatur pret vysim daleibnīkim. Telts tukša var stuovēt, a mums tī īīšona līgta. Tys beja našmuki.”

Tok Madara Tarasova doluos taiduos atmiņuos: “Maņ taids pyrmais i lelais nūtykums beja Andra Eriņa 60 godu jubilejs “Gorā”. Tei beja muna pyrmuo uzastuošona tī. Koncertā dzīduojom na tik mes, bet ari Andra Eriņa dzīdūšuo saime, dzīduoja daudzi draugi – Juoņs Streičs, Olga Rajecka, “Baltie Lāči”, “Ginc un Es”. Beja daudzi zynomu muziku, ar kurim beja lapnums byut iz vīnys skotivis. Tei beja breineiga pīredze i lels nūtykums, taids atskaitis punkts.”

“Lai ari kur brauktu i kaiduos vītuos uzastuotu, vystuvuokuo vystik palīk sāta. Maņ vysspylgtuok atmiņā ir palics pasuokums Drycānu bazneicā, kod mes kūpā nūorganiziejom šmuku koncertu i pasnēdzem tū vysai myusu draudzei,” taidu nūtikšonu izceļ Baiba Zarāne. Tok Aldis Kise itū sarunu nūslādz ar sirsneigim vuordim, kas veļteiti grupys lideram i kūpā saturātuojam: “Maņ laikam nav taida konkreta nūtykuma, bet ir taida vīna steiga, kas vejās cauri vysus itūs 20 godus – tei ir Andra uzmaneiba pret mums. Jam nikod nav bejs vīnolga par mums. Jis vysod uzatrauc par tū, kai mums īt i kū mes dorim. Jam tys vysod ir bejs svareigi. Paļdis jam par tū!”

Fotogalerejā “Dricānu dominantis” 20 godu jubilejis koncerts. Foto: Amanda Anusāne/portals lakuga.lv