Rokstu sagataveja: portals lakuga.lv

Kaida ir turysma situaceja niu, kai tei puorsamejuse pādejūs godu laikā i kū varātu dareit, kab regionu padareitu vēļ pīviļceiguoku? Itī ir tik daži vaicuojumi, kuri kūpā ar nūzaris ekspertim, turysma puorstuovim i uzjiemiejim tiks apsprīsti raidejumu cykla  “Latgolys susātivs – turpynuojums” 3. raidejumā. Tū varēs vērtīs jau itū sastdiņ, 29. novembrī, kanalā TV24 17.00 stuņdēs, ar atkuortuojumu svātdiņ, 30. novembrī, 10.30 stuņdēs. Taipoš ari pyrmūdiņ, 1. decembrī, kanala ReTV vierszemis apraidē, Latgolys regionalajā televizejā 17.30 stuņdēs.

Latgola ir zeme, kur doba, kultura i tradicejis veidoj unikalu stuostu. Tok, kai tū stuostu padareit vēļ pīviļceiguoku i panuokt, kab turysmys regionā atsateisteitu ilgtspiejeigi, gūdeigi i ar pīvīnuotū vierteibu? Raidejumu cykla “Latgolys susātivs – turpynuojums” 3. raidejumā tuo veiduotuoji raudzeis meklēt atbiļdis iz itim vaicuojumim kūpā ar nūzaris ekspertim, uzjiemiejim i tim, kuri Latgolys turysma stuostus izzynoj bīžuok nakai cyti.

Par svareiguokajim izaicynuojumim, ar kurim itūšaļt sasadur turysma nūzare Latgolā, tiks runuots ar atpyutys kompleksa “Rāznas ezerkrasti” saiminīku Ēriku Višu, sovpus ilgtspiejis i sadarbeibys vaicuojumus varēs izzynuot Kuorsovys kulturviesturis centrā “Līču mājas” kūpā ar tuo puorstuovem Intu Jurču i Katrīnu Bartkeviču. Atteisteibys idejis i vareibys tiks puorrunuotys ar bīdreibys “Latgolai i Latvijai” vaļdis prīšksādātuoju, efektologu Aināru Puduli, kai ari gostu sātys “Zaļā sala” saimineicu Ritu Tēraudu. Kab izzynuotu pādejuo laika turysma sferys maineibu Latgolā, vareibys i myusu dīnu rysynuojumus, redzīņūs daleisīs kai turysma specialiste Laura Spundere nu Latgolys Turysma asociacejis, tai ari eksperti uorpus Latgolys – Natālija Čudecka-Puriņa i Māris Olte.

Projekta “Latgolys susātivs – turpynuojums” mierkis ir sataiseit pīcu televizejis raidejumu cyklu, kas byutu turpynuojums jau īprīšk veiduotajam raidejumu cyklam latgalīšu volūdā “Latgolys susātivs” par aktualim problemvaicuojumim Latgolā. Raidejumūs tiks aktualizātys i analizātys sabīdryskai svareigys temys, kai bezdorbs i tuo cālūni, inflaceja regionā, izaicynuojumi medicinys nūzarē, turysma atteisteiba i izgleiteibys reformys sakys. Nūsaukumā latgaliskais vuords “susātivs” latvyski nūzeimoj “ēna”, i tys simboliski paruoda raidejuma golvonū ideju – īsavērt realuos vidis “susātiva pusē”, kab maklātu problemu cālūņus i skaidruojumu. #SIF_MAF2025

Raidejumus piec tūs puorraidis varēs atrast LRT sātyslopā lrtv.lv, kai ari vītnēs Facebook, YouTube i platformā xtv.lv.

Raidejuma veiduotuoji gaideis ari jiusu atsauksmis i īsacejumus LRT socialūs medeju vītnēs, kai ari e-postā lrt.zinas@inbox.lv voi zvonūt/rokstūt iz t. nr. 26339536.

Projektu finansej Medeju atbolsta fonds nu Latvejis vaļsts budžeta leidzekļu. Par raidejumu cykla “Latgolys susātivs – turpynuojums” saturu atbiļd SIA “Latgales reģionālā televīzija”. #SIF_MAF2025

Publikaceju apmoksoj Latgolys regionaluo televizeja