Dzejūļu autore: Dagneja

Literate Dagneja, beja vīna nu autoru, kas tyka pi vareibys pīdzeivuot rodūšū rezidenci Lūznovys muižā. Par tamā pīdzeivuotū Dagneja roksta tai: “Pošā vosorys plaukumā – saulgrīžu laikā – maņ beja vareiba pīsadaleit rezidenču projektā i pagasteit Lūznovys muižā, kab raksteitu ailis latgaliski. “Mads nedeļa” rezidencē atnese garys sarunys, prīcu, puordūmys, daudzi vysaidu sajiutu i pīdzeivuojumu, ari  jaunus draugus. Paļdis vysim satyktajim ļautenim par laipneibu i sarunom, muižys cylvākim par ryupem i guodeibu! Pa munam, Lūznovys muiža nav tik vīta īdviesmei, bet eists SPA centrys dvēselei. Ite nazcik aileišu latgaliski, kurys saraksteitys gasteišonys laikā i piečuok kai sveicīņs muižys MUZAI i vysim īdviesmis olūtim.”

***

muns eža kažuceņš
izmozguots meiksteņš
karinej sauleitē iz balkona molys
niule Lūznovys muižā
sirds syltuos sarunuos
mozgoju dvēseli teiru

***

sabīdryskī dorbi atstruoduoti
glupuma nūdūklis samoksuots
sovus dzejūļus kai boltus pologus
varu šmukai iz striča izkuort

bišu nameņā klauseitīs gamanis
džeza škiunī piļneigu klusumu
saulrīta koncertā varganis skanis
naktī ap dubakim plykspuorņu dzīsmis

sabīdryskī dorbi atstruoduoti
glupuma nūdūklis samoksuots

***

jiutu samesteibā

Dīva mīleibā izamozguoju
sirdslītu stilistam stuovūt
jiutu ustobys durovuos

***

reita puotoru vītā
rokstu tev ziņu
grybu paviesteit
ka ar sirds apzinis
izmekliešonu labai nasavad

vēļ da šam
teik skaidruoti lītys apstuokli
izvaicuoti līcinīki
laseiti pīruodejumi
nūjimti pierstu nūspīdumi nu teve
motivs zynoms
mīleiba

voi grākus dreikst syudzēt ailēs?

***

mīleiba ir pīdūšona
mīleiba ir izalaseišona
mīleiba ir saruna laipneibys izlūksnēs

***

ailis jau naīt pa viersu
ailis kreit dziļumā
tuoļumā
tyvumā mīļumā
ka atļausi ari trauslumā
malnumā
vuordi īkreit īleipst
izkreit prokreit rozkreit
pļuknejās
cikom palīk teira
sirds jutūne…

***

vuordi nagrib liktīs dzejūļūs
tī grib vēļ kaidā breivuokā formā byut
kas vēļ breivuoks var byut par dzej – ūlim Rāznys krostā
smiļšu griudenim pasvīstim viejā
vysleidza piec šaļts jī kreit
šudiņ ci reit

***

es redzieju zvaigznis… dīnā
veirs medeja peilis upis leikumā
jiura beja atguojuse pavysam tyvai
tu kaļtieji butis smiļtīs līdagā
apgrīzi juos ar acim iz viersu
kab pasaver dabasūs saulē
kod atsamūdu nu ituo sapyna
vēļ eisti navarieju saprast
voi nu tīsys peilis ir tik soldonys
es beju īsamīļuojuse sevī
i izdzeivuoju laiku
itymā pasaulī
lobys attīceibys
ir vysleluokuo grezneiba

***

VIP

ar sovim īdviesmis cylvākim napavysam nav baist
nakts vydā blūdavuot pa parkim svešom piļsātom
tekstim dzīsmem pruota labirintim
kur kotra saruna kai vysskaistuokais dzejūļs
kūpeigi sapyni duorguokuo vaļuta

***

pībiersim kulduos smīklus
izīsim uorā
taiseisim sarunu tyltus
viersimēs dabasūs
cikom
mienesnīks kai krūdzinīks
padūs mums pa zvaigžņu kruškeņai
iz īstuodis riekina

***

bezgaleigi garuos aizjiuris eglēs
iz celeņa glīmezs ād pīniņu lopys
itū labirintu jis ītu iļgi iļgi iļgi
taipoš kai es guoju tuoli tuoli tuoli
kab īplanavuotu tevi
pyrmajā vītā

***

nakts kai lobuo krystamuote
savad kūpā divejus dzejnīkus
jī runoj par izgleiteibys sistemu
par tū ka vajag koncentrētīs iz sevi
navys iz koč kaidu iluzeju
par tū ka škola rauga bierneibu miereit ar linealu
bet atteisteiba nūteik pa spirali
par tū ka klaidys ir lobuokī školuotuoji
i patīseiba nav juosavuica nu golvys
gols golā vaira navar saprast kurs klausuos kura
voi nakts klausuos poša sevi cauri jim
reitam austūt nav ni sacynuojumu
ni nūslāguma ni punktu ni komatu tik jutūne viņ
ka dūma dzeivojās uorpus laika uorpus jim
uorpus vuordu vareišonys
izturēt pošim sovu nūzeimi

***

Zalta izlase

pa šaļtei kod palīk gaaaaaars laiks
ar sovim eņgelim spieļoju bumbu
jī ir īkļauti munā zalta izlasē
vyslobuok jim pasadūd servēt

kod dzeive pruotu īvad izmysumā
dzieržu jūs kikiniešonu sev ausīs
lobi jūceni engelim saīt nu tīsys
tik nasaīt nu reizis maņ smītīs nu sirds

pa šaļtei kod palīk cīīīīīši gryuts
es jiutu jūs vareibu paleidzēt īt
ari niule klausūtīs itū dzīsmeiti
jī ritmiski kustynoj spuornus

vysvaira es mīļoju vuornu kuojenis
jūs gaišūs i redzeigūs ocu kakteņūs
vīnmuļuos šaļtīs mes spielejam bumbu
asmu vysdrameiguokais gramdātuojs
jī vysmeistareiguokī cāluoji

lipeigī smīkleņi vēļ iļgi skaņ ausīs
kod tīsness pasludynoj spielis rezultatu

vysvaira es mīļoju vuornu kuojenis
jūs gaišūs i redzeigūs ocu kakteņūs
jī ir īkļauti munā zalta izlasē
vyslobuok jim pasadūd servis