Dzejūļu autore: Muizinīku Evika

Portals lakuga.lv pīduovoj puorskaiteit multimuokslineicys Muizinīku Evikys jaunuokūs dzejūļus.

***

Šofereit, apstuodynojit, lyudzu, zemislūdi,
Es grybu izkuopt atpakaļ
90tajūs.
Lai mātojas trupaki pa kanavom,
Lai spruogst severkys dzeivūkli,
Tys vysmoz beja laiks,
Kod myusim beja varūni.
Kinys tān pīprosa
Antagonista pašnuoveibu
Piec zaudātys ceinis sistemai
Lai koč pošcīņa palīk.
A tymūs laikūs
Brūss Viliss
Peipādams
Byutu uzlaids gaisā Kremli
Ar zeidani rūkuos.
Tys zeidaiņs
Asmu es.

***

Ir cīši daudz cylvāku – paužu,
Vysvaira – cylvāku fonogramu.
I puoruok moz cylvāku – muzykys.
Tys vyss ir vīns lels anekdots.
Luoči mežūs kai monoizruodis.
Ka beistīs nu boda laiku i cylvāku nūsūdejuma
Nūpierc lelu suni
I nūkristej par cyuku.

***

Elektriskais gons apleik munu īspieju rūbežom.
Vydā cylvāki ar teikamu byuteibu.
Vydā kazenis.
Vydā jauneibys ideals par tū, ka byušu kirurgs.
Vydā Kemps, kas caur Rugāti maņ īdūd prefiksu neo.
Paldies, Anta, dāsni.
Baile, ka struovuojumi siss pa pierstu.
Vēļ vaira, ka atsastuos sirds.
A ka viesture atsakuortoj?
A ka gons nav daslāgts?
Dzedam patyka taupeit elektreibu.
Nasabeistūt
Ka gūvs, kas atkūss fišku
Pavadeis penseju aiz rūbežu stobim Boltkrīvejā.

***

Par kū te?
Par kū Latgolā,
Ka Tev ir draugs Reigā?
Es asmu paradoksatkareigs sadomazohists
I te ir muna zeme.
Te cītuma kapelā
Ar 40 iz myužu nūtīsuotim slepkavom
Jiutīs morali stabiluok i drūšuok
Kai bazneicā, kur esi kristeits,
Fiziska ašņa nūlaisšona
Ir kriminallykuma pants,
A tantis Verys moralī mīsys būjuojumi
Dzeraunis klusajā telefonā
Izjauc giminis
Pīsauc infarktus
Nūlīdz mozbārnus gejus
I staigoj breiveibā.
Par cylvāku vysu var pasceit piec tuo,
Kai jis mūdynoj Tevi autobusā.
Te lānom izmierst vysi spļuovieji okuos.
A Reigā vysu idiotu mamys
Vīnmār stuovūklī.
Sevkur sovi smadziņu sitieji.
Te Tevi tur teirums i teirumi.
Te plyudūs var nūpeļdēt rudzu lauku.
Te vuorda bļac konotaceju saprūt nu konteksta, na principiali.

***

Degradacejis procesi dur acī
Debilam cylvākam debilys dūmys.
Kod materialam sīts par cītu
Sīts puortūp par zuodži.
Peipiešona palelynoj
Risku kliut oklam
I vydalci.
I politika.
E-vīlys – slikti,
E-taloni – lobi.
Braucu 500 metrus
Ar mašini iz sporta zalu.
Hujs zyna, kū dareit.

***

Ak, mes,
Sentimentalī dzeivinīki.
Nūtriņ, rukseit, asareņu,
Karnivori pi Tova leikeiša
Lyugšonu naskaiteis.
Tikai baileigs Tu nūdzeivuosi da pensejai.
Bailis būjoj galis svaigumeņu,
Casnāgi īmarinej īkšys.
Īt kolnūs voi palikt boguotai?
Ceļt tyltu voi sleicynuot laivu?
Varātu toš
Bosom kuojom
Pagaist mežā
Tok pi dyrsys
Mozys ragavenis
Pylnys saraustuo
I pret banknotem samaineituo
Prīka.
I gribīs
I žaba žņaudz.
Izaver,
Ka eistuo sasavīnuošona ar dobu
Myusus gaida
Tik kopu kolnā.

***

Tyveibys aktūs ar tehniku
Tyveibys nav.
Leluos tolkys sasukoj mežu motus
I nūklusynoj sirdsapziņu
Kab reizi godā varātu aizmierst
Par kasdīnys kakuošonu
Mamys Zemis okā.
Mudrys nav gudrys.
Ceistys dvēselis patārātuojsabīdreiba špļaun atpakaļ vysumā.
Ka naskrīņ piec jaunuo Iphona
I naesi registrāts tiktokā
Sistema tevi radz i deaktivizej,
Bet dīveņa džoisciks vēļ daslāgts simulacejai.
Kod follija capureitis
I nu sasystu siļu lepeitī krūni
Vaira nasorguos smadziņu svaigumu,
Vot tod daīs eistynais
Game over.

***

Zeimeju dzymtys kūku da dabasu,
Zemejūs poša.
Dzeds Juoņs aizguoja ar viezi,
Baba Ļoņa – ar insultu,
Trešū, iz laimi.
Piec pyrmuo jei skaiteja dzejūļus,
Piec ūtruo stuosteja
Ka meitinem pumpys matās nu tuo,
Ka juos seksa laikā nabeidz.
Grybu vairs nabyut ituos vaļsts piļsūņs.
Toš babys i dzedi grīžās zuorkūs kai viļceni
Pariekinojūt zemis nūdūkli zem sovys malnuos pierts.
Iz lobuo zora poļaki, iz kreisuo – krīvi,
Tak sebe izviele, saceišu gūdeigi.
Sevi vysvīgluok apēst nu vyda.
Tāvzemeiti ļūbeit – nu attuoluma.

***

Napaseņ
Pyrmūreiz redzieju veikalā damu,
Kas ar čipu rūkā
Moksuoja par nazkaidu krāmu.
Myusim vysim ir saiminīki.
Kaids pabaroj.
Kaids izsekoj.
Kaids zyna, kod globuot.
Noasa škierts itūreiz
Pasauļa nagluobs.
Puoru laiks ir paguojs
Tān pa treis, pa četri –
Organiskuos orgejis
Da gūda giminis.