Rokstu sagataveja: portals lakuga.lv

Decembra suokumā socialajā teiklā Facebook sovā profilā Music & Lyrics by Laura Kalvane dizainere i muzike Laura Kalvāne publiciejuse muzykalū projektu “30 mīlestības nokrāsas”, kurā apkūpuoti 18 godu laikā radeitūs dzīšmu vuordi, notys i melodejis. Portals lakuga.lv nazkod ir eisai rakstejs par Laurys dorbim, bet taida eistyna īpasazeišona saīs tik niu.

Kai stuosta Laura Kalvāne, jei poša asūt nu Ludzys nūvoda Cyblys pusis. “Asu nu tūs, kas padzeivuojuši uorzemēs, paceļuojuši pa pasauli i golā vystik atsagrīzuši sātā,” par sevi soka Laura, kurys muzykaluo darbeiba sovulaik suokusēs tīpat školā Cyblā – pīsadaleišona folklorys kūpā “Ilžeņa”, muziciešona kūpā ar klasisbīdrinem vysaidūs pasuokumūs, konkursūs, ari muzykys školys pabeigšona. Bet liktineiguo šaļts bejuse juos 2007. gods dzimšonys dīnā četrūs nu reita – sapynā sadzierdāta dzīsme. “Ļauds īrosts radz sapynus, jī ir vysaidi, bet maņ skanēja muzyka – melodeja, vuordi, pasalyka tik skaisti i ruodejuos, ka vajag dreiži pīraksteit, kab naaizmierstu. Tai es pasamūdu i raudzeju par reizi iz gitarys nazkū sagrabynuot. Ūtrajā ustobā gulēja vacuoki, i jī nabeja cīši prīceigi, ka es četrūs nu reita nazkū doru, vystik vajag iz dorbu īt. Bet nu reita pi brūkašku, kod jau varēju nūspēlēt dzīsmi, vysi beja cīši prīceigi. Tai dzyma muna poša pyrmuo autordzīsme “Par vosoru Latgolā”,” sovu dzīšmu stuostu atguodoj Laura. Dzīsmi tymā pošā godā jei īrakstejuse kūpā ar grupu “Airi”, bet, kai nūsoka dzīsmis autore, bez kaida lela mierka īkaruot skotivi i slavi. Piečuok – 2020. godā – radeits ari videoklips (nūsavērt var ITE).

Niu Laurys Kalvānis projektā publicātys 30 dzīsmis, kas radeitys 18 godu garumā. Laura nūsoka, ka puorejuos dzīsmis rodušuos seceigi – kod dzīsme atguojuse, tod i pīraksteita. Poša ideja, ka vysu da ituo raksteitū vajag apkūpuot, Laurai rodusēs pyrma goda – 2025. gods zīmā. “Tys beja janvars voi februars. Apsavieru iz radeitajom dzīsmem, cik jūs ir. Sacynuoju, ka jau ir vysā daudzi i, ka jau ir atguojušys, vajadzātu nazkū dareit – ar cīnu pret rodūšū dorbu, lai ir apsaverams, nūsaklausoms, varbyut kaids, ka gribīs, pats varātu juos dzīduot. Raugūt saprast, cik varātu izmoksuot dzīšmu īraksteišona, saprotu, ka tys ir patuoli nu munys ituos šaļts realitatis, deļtuo vysu padareju budžeta variantā – poša sovim spākim sataiseju īrokstus, aranžieju i publicieju, lai ir daīmami kotram,” projekta ideju skaidroj muzike. Projekta nūsaukums – “30 mīlestības nokrāsas” – radīs, kam pasalics, ka mīleiba ir vīnojūšais elements vysam, kas jai pamudynuojs radeit kotru nu dzīšmu. “Mīlesteiba ir vysaida – pošai pret sevi, dzymtū pusi, kaidu cylvāku, kurs ir sirdsdraugs i īguojs dzeivē, voi varbyut kaidu, kas vīnkuorši guojs garum, bet juo asameiba mani ir īdvasmuojuse. Vysu itūs spektru mīlesteiba ir dabuojuse rodūšū nūkruosu i skaniejumu,” ar projekta nūsaukuma stuostu īpazeistynoj Laura Kalvāne.

Izīmūt cauri publicātūs dzīšmu sarokstam, var redzēt, ka dzīsmis latgaliski (pīcys nu vysu) topušys pošā suokumā (nu 2007. da 2010. gods), piečuok juos ir latvīšu literarajā volūdā i rodūši aktivuoks bejs pādejūs godu periods (nu 2023. da 2025. gods). Iz vaicuojumu par dzīšmu tapšonys volūdu, Laura Kalvāne portalam lakuga.lv stuosta, ka dzīšmu vuordu volūda guojuse leidza apleicejai videi. “Es poša īmu nu latgalīšu saimis i myusu pamata volūda ir latgalīšu. Ari dūmuošona leidza ar tū ir latgaliski, deļtuo jei taida beja i muokslā. Piečuok saguoja laistīs pasaulī – nu suoku Reiga, piečuok vēļ plotuok, cyta vide, kasdīnys dūmuošona puorsaslēdze iz volūdu, kaida beja apleik. I dzīsmis jai leidza. Nui, latvīšu literarajā volūdā dzīšmu ir vaira, bet dūmoju, ka iz prīšku byus ari nazkas latgaliski. Vysu vaira jau ir tai – kaidā volūdā sadzieržu dzīsmi sevī, taidā i jei teik pasaulī, napagaisynojūt muzykaluo dorba autentiskumu,” iz vaicuojumu atsoka Laura. Jei skaidroj, ka ari kotrys dzīsmis stuosts ir cytaižuoks – kaidu reizi pyrmī atīt vuordi, cytureiz melodeja, a vēļ kaidu – vyss kūpā. “Iz tū varātu vērtīs kai iz bārna pīdzimšonu – kaida dvēsele atīt, taids i ir – var byut ar bryunom voi zylom acim, tymsim voi gaišim motim, špetnys voi cīši paklauseigs. Tai i maņ ar dzīsmem. Vīnkuorši skaņ golvā i vajag pīraksteit. Cytureiz saītu pat vasals orkestris ar vysim instrumentim i nūkruosom,” stuosta projekta “30 mīlestības nokrāsas” radeituoja.

Niu Laura atsagrīzuse dzymtajā pusē, kasdīnā ir dizainere i muokslineica, atteista sovu rodūšū zeimynu “ART ILLUSION design”, bet muzyka jai ir hobeja leiminī. Kod kaids paaicynojūt nazkū sadzīduot akustiski ar gitaru, atsasaucūt. “Pādejūs godu laikā asu pīsadalejuse Eversmuižys svātkūs Cyblā, Lelajā latgaļu tiergā Ludzā, pārņ rudinī dabuoju cīši magisku pīredzi Pīterkolnā, sasateikūt ar nakts puorguojīņa daleibnīkim – pušnakts, pylnuotis, gunkurs i cīši sylta nakts. Taipat asu atsasaukuse i pīsadalejuse Latvejis Muokslys akademejis Latgolys filialis nūtikšonuos. Itūšaļt ir cytys prioritatis, bet, kod aicynoj i vajag, tod duovynoju klauseituojim muzykys prīceņu,” skaidroj Laura Kalvāne.

Atsavasalojūt Laura vēļ reizi atguodynoj, ka dzīšmu publikacejis ar vuordim, notom i melodejom ir dūmuotys, lai kotrys grybātuojs drūsai izmontuotu – dzīduot sovai prīcai voi kaidā pasuokumā. “Lai īt pasaulī i dzeivoj!” nūsoka dzīšmu autore.