Rokstu sagataveja: portals lakuga.lv

Gūdynojūt pravesta Alberta Budžis (1930–1957–2017) pīmiņu, Bolvu Centraluo biblioteka aicynoj iz pravestam veļteitajim nūvodpietnīceibys skaitejumim. Itūgod, 29. janvarī, tī nūtiks jau catūrtū reizi. Vysys dīnys garumā klauseituoji kai kluotīnē Bolvu muižā, tai tīšsaistē varēs dzierdēt vītejuos kulturviesturis pietnīku i muzeju darbinīku prīšklasejumus.

Alberts Budže dzims 1930. gods 26. janvarī Reigā i audzs ticeigā saimē. Juo vacuoki Donāts i Tekla beja cālušīs nu Leivuona nūvoda i iz Reigu puorsacāluši piec Pyrmuo pasauļa kara. Tiļžys draudzē pravests kolpuojs nu 1991. gods leidz pat nūīšonai myužeibā 2017. godā. 

Pravests A. Budže bejs na viņ Dīva vuorda sludynuotuojs i draudžu goreigais apryupātuojs, bet ari aktivs sabīdryskais i kulturys darbinīks, izcyls paguotnis pietnīks, nūvoda viesturis i kulturviesturis i pasauļa nūtykumu saiknis vāruotuojs. Pietejs dominikaņu, jezuitu i cytu religiskūs ordiņu darbeibu Latgolā, Latgolys vītu vuordus, apkūpuojs materialus i rakstejs par īvārojamim i aizmierstim prīsterim i cytom temom. 2000. godā apbolvuots ar Latvejis Republikys Kulturys ministrejis Atzineibys rokstu. 2016. godā sajiems Latgalīšu kulturys goda bolvu “Boņuks 2015” par myuža īguļdejumu latgalīšu kulturys atteisteibā.

Pravestam veļteitūs nūvodpietnīceibys skaitejumus, atzeimojūt juo 90 godu jubileju, Bolvu Centraluo biblioteka aizsuoce 2020. godā ar mierki veicynuot pietnīku interesi par Bolvu nūvoda kulturviesturyskū izpieti i popularizēt jau topušus pietejumus par itū arealu. Īrosti temu lūks nav īrūbežuots, i sevkurs ir aicynuots pīsadaleit ar pietejumu jūmā, kurys izpietis teritoreja ir Bolvu nūvods. Skaitejumi nūteik latvīšu literarajā i latgalīšu volūdā.

Ituo goda programā plots temu lūks – suocūt nu rūkdorbu viesturis, maja dzīduojumu tradicejis, latgalīšu ābeču, Bolvu mīsta izpietis, da industrialuo i mežnīceibys montuojuma izzynuošonys Zīmeļlatgolā. Taipat ari tiks īpazeistynuots ar Ontonam Slišānam veļteituo digitaluo arhiva izveidi, kai ari ar Ruguoju Romys katuoļu draudzis viesturi. Skaitejumu daleibneica, Ruguoju nūvodpietnīceibys muzeja vadeituoja Velga Vīcupa pīzeist, ka tī ir breineiga vareiba izzynuot par cytu pietejumim, kas ir svareigi na viņ vītejuos, tok ari vysys Latvejis viesturis izpietis aspektā: “Skaitejumūs poša pīsadaleišu ūtrū reizi. Pyrmajā reizē stuosteju par sev aktualu pietejumu par Sitys–Burzovys dzeļžaceļa lineju. Niu muns prīšklasejums byus par Ruguoju Romys katuoļu draudzi, kurei itūgod svietej 90 godus nu tuos izveiduošonys. Skaitejumūs vysod daboju ari svaigu informaceju par aktualajim pietejumim.”

Ar pylnu daleibnīku sarokstu i jūs izvālātajim tematim var īpasazeit programā:

Skaitejumi nūtiks 29. janvarī Breiveibys īlā 47, Bolvu muižys konferenču zālē. Suokums 10 stuņdēs. Tīšsaistis pīsasliegšonys saite byus atrūnama bibliotekys Facebook lopā.