Rokstu sagataveja: portals lakuga.lv

Postfolklorys grupa “Rikši” janvara suokuos jau nūsvieteja pyrmū sovu 15 darbeibys godu balleiti ar koncertu Latgolys viestnīceibā “Gors” Rēzeknē. Niu “Rikši” vysus interesentus gaida ari iz koncertu 21. martā muzykys nomā “Daile” Reigā.

Kai jau portalā viestejom par pyrmū koncertu, poši “Rikši” soka, ka laikam jau grupu ar “vīns-pīci” godu stažu navarātu vaira saukt par jaunīšim, tok dzimšonys dīnā kai i kuorteigā latgalīšu balleitē – vysi jauni! Tikpat ļusteigu i aizraunūšu atmosferu grupa sūlej ari ūtrajā koncertā muzykys nomā “Daile”. Beleti daīmami ITE.

Kai stuosta grupys dalinīks Ēriks Zeps, piec “Gora” koncerta sajiutys arviņ ir puora centimetru viers zemis. “Veidojūt nūtikšonys saturu, mes apzynuotai izavairejom nu taidys standarta jubilejis koncerta sajiutys, mes nagribiejom gremdētīs atmiņuos, atsavērt iz nūtykumim i dabuot miļjons apsveikuma runu. Maņ redzīs, ka koncerts labi paruodeja, kaidi tod “Rikši” ir itymūs 15 godūs – ar dažaidu muzyku, dažaidim uzskotim, tok principā jautri i breivi, vys ari ar koč kaidim nalelim stuosta aizmetnim. Ari Reigā byus breivs balleitis sajiutys koncerts. Taipoš mes aicynojam izavielēt stuovvītys, partū ka piec sovu koncertu asam gona bīži dzierdiejuši, ka ir baigi gryuši nūsēdēt! Cyta storpā, koncerta dīnā, 21. martā, ir pavasara saulgrīži, kas zeimoj, ka laiks suoks pasagrīzt iz aktivū, zīdiešonys, vosorys i gaismys periodu. Piec vysu ticiejumu – kai tu saulgrīžūs īgrīzsi tū sovu energeju, taids ari byus vyss gaišais laiks! Koncertā mums byus ari paleigi – puorstuovi nu tautys deju ansambļa “Lielupe”, tuo vadeituoja Baiba Kestere ir horeografe, kas veiduojuse vysuvaira horeografeju skotiviskuos dejis ansamblim ar “Rikšu” muzyku. Taipoš byus ari etnomuzykys jaunīšu grupa “Tramvaja muzikanti”, itei ir myusu izviele deļtam, ka mes poši reiz izaveiduojom nu bārnu i jaunīšu folklorys kusteibys “Pulkā eimu, pulkā teku”. Tei ir myusu prīca, ka jaunīšus arviņ uzrunoj folklora, eipaši, ka jim gribīs tū dareit latgaliskuos i etnomuzykys sajiutuos.”

Atguodynuosim, ka postfolklorys grupys “Rikši” sastuovā ir pīci dalinīki – Ēriks Zeps (bolss, akordeons), Madara Broliša (bolss, vejūle), Ivars Utāns (basgitara), Mārcis Lipskis (mandolina) i Jurgis Lipskis (bungys). Sovys pastuoviešonys laikā grupa ir koncertiejuse gondreiž vysuos Latvejis piļsātuos, ari lelā daļā cīmu. Grupys dalinīku bolsi izdzīduojuši “Noriet saule”, “Vot i puiseits”, “Lobs vokors”, “Īveņu”, “Kamudzi” i vēļ daudz cytu latgalīšu dzīšmu.