Rokstu sagataveja: portals lakuga.lv

Repers Bruolāns sadarbeibā ar DJ Valnu i Sleideigū izdavuši jaunu albumu “Zalts”. Tymā apkūpuoti īroksti ar pantim i trekim, kuri topa periodā nu 2018. da 2025. goda, kūpā 11 dzīsmis.

Kai stuosta pats Bruolāns, jaunajā miksteipā ir treki, kuri taidu voi cytaižuoku īmesļu deļ pyrma tuo natyka īraksteiti voi ari tyka īraksteiti, bet natyka izlaisti. “Kod jau beja sasakruojuse vasala skaudze ar taidim dorbim, maņ roduos dūma apkūpuot jūs vysus vīnā projektā. Zynuoju, ka Valnam ir daudz lobu i naizmontuotu bītu, pavaicuoju, kū jis dūmoj par taidu ideju. Valns pīkryta, daaicynuojom kluot Sleideigū, lai īdūd miksteipam eistū nūskaņu. Jezups, kai pīrosts, saregulēja skaņu i īrokstus,” tai Bruolāns.

Reperam Bruolānam sadarbeiba ar DJ Valnu i Jezupu ir ilglaiceiga, kūpā radeiti vairuoki singli i izastuots koncertūs. Sovpus Sleideigīs ir da šam nadzierdāts izpiļdeituojs. Kai stuosta jis pats: “Latgalīšu zāns, kurs dzims Rēzeknē, tok jau nu bārna kuojis dzeivoju Carnikovā, kur ari īpazynu hip-hop kulturu, skaiteju breivrunys ar sovim zānim. Tod sasapazynu ar riezeknīšim i mums mudri izaveiduoja kūpeiga volūda, pīsadolu vysaiduokūs projektūs, ari miksteipa “Zalts” izveidē.”

Plotuoku sarunu ar reperi Bruolānu vari skaiteit ITE. 2024. godā izguoja juo pyrmais albums “Bagāža”, tū var klauseitīs ITE.