Rokstu sagataveja: portals lakuga.lv

Kulturys īsacejumus itai nedeļai sagatavejuse kinu producente i Daugovpiļs tymsi zyluo kora dalineica Zane Gulbe, kuruos dzymtuo puse ir Bolvu nūvoda Baļtinovys pogosts. Zane īsoka nūsaklauseit romana “Myura kolns” radejis īstudiejumu, nūsavērt kaidu “Lielajam Kristapam” nominātu kinu, eipaši izceļūt sovys puorstuovātuos studejis “White picture” dorbu “Mūžīgi jauni”, kai ari pagasteit Baļtinovys “Kadiķūguos” i naaizmierst par zīmys prīcom.

“Myura kolns”

Jau klausūtīs kriminalromana “Bruoli” radejis īstudiejumu, saprotu, ka tī var byut breineigs audio pīdzeivuojums i veids, kuo ikdīnā vaira dzierdēt latgaliskū. Jaunais īstudiejums “Myura kolns” beja pamateigs atkluojums – sirdi plūsūšs stuosts, kur laikmata grīži teik izstuosteiti caur vīnys dzymtys liktini. Seneji laiki, tok myužam aktualys temys par pīdareibu i ciļvieceibu. Īstudiejumu var nūsaklauseit taišni vīna Reiga–Baļtinova braucīņa laikā.

“Mūžīgi jauni” i “Lielajam Kristapam” nominātuos filmys

Ka uorā drupeit par soltu, lai kur ni dūtūs, tod itys ir lobs laiks, lai sātys syltumā ar čaju rūkuos īpazeitu kinu, kas izapeļnejuse atzineibu 2025. godā, mieginojūt nūsavērt vysys Nacionalajai kinys bolvai “Lielais Kristaps” nominātuos filmys. Šūgod ari myusu filmu studejis veiduotuo kina “Mūžīgi jauni” (režisors Armands Začs) ir sapelnejuse vasalys 10 nominacejis i ir nūsaverama platformuos LMT Viedtelevīzija i Go3.  Jauneibys sapyni, suopis i klaidys syltā vosorys gaismā, kur kai varūni, tai antivarūni nūvacoj, tok na vysod pīaug.

“Kadiķūgas”

Baļtinovas vydā ir radeita breineiga vīta, kur kotrys – naatkareigi nu pīredzis voi vacuma – var sasaslēgt ar sovu īškejū muokslinīku – gleznuošonys meistarklase “Kadiķūguos” pīduovoj īspieju uzgleznuot pošam sovu gleznu, kū piec tam var pajimt iz sātu. Apbreinojamys ir saiminīku ryupis par kotru detaļu, lai pīredze byutu vasali svātki. Darbneica pīduovoj 3-4 stuņžu piļneigu koncentriešonūs i mīru absoluti skaistā vītā – kur vēļ lobuoks veids, kuo pavadeit soltu zīmys svātdīni. Vaira par “Kadiķūgom” var izzynuot ITE.

Zīmys prīcys i zyvu giušonys zam lada čempionats

Ituoda bolta, solta zīma pādejūs godūs jau ir palykuse par ratumu, deļtam ir grāks jū naizmontuot. Voi tei byutu Meteņu sviniešona, laižūtīs nu kaļneņa, voi sliepuošona kuodā skaistā Latgolys mežā – juoīt dobā i juobauda. Var izmieginuot ari koč kū vaira ar saceņseibys goru – 7. februarī Baļtinovys apvīneiba sadarbeibā ar Zīmeļlatgolys sporta centru organizej Zyvu giušonys zam lada saceņseibys iz Muotrīnis azara.