Rokstu sagataveja: portals lakuga.lv

Folklorys kūpa “Upīte” paviestejuse par ilgi gaideitu nūtikšonu – digitaluo albuma “Kod īt iz balli” pylnū verseju. Itys dorbs ir kulminaceja projektam, kura laikā “Upīte” apzynuoja vaira nakai 200 dzīšmu, kas dzīduotys i uzturātys dzeivys Zīmeļlatgolā okupacejis godūs.

Albumā īkļautys 34 dzīsmis, kurys kūpa nu plašuo pietnīceibys materiala izalasejuse kai sev sirdei tyvuokuos. Suocūt nu 2024. gods goda, kotra mieneša 21. datumā kūpa publicēja vīnu jaunu dzīsmi, kotrai nu tūs sataisūt ari videoklipu. Leidz ar albuma izīšonu klauseituojim daīmamys ari vēļ da šam napublicātys 22 dzīsmis, kas nūslādz itū vierīneigū kolekceju.

Albuma skaniejums apgiun vysu emoceju spektru – nu jaudeigu aranžeju ar instrumentim, kas līk kuojom pošom cyluotīs ballis ritmā, leidz pat smolkom a cappella versejom, saglobojūt autentiskū, napīradynuotū skaniejumu.

Cikom albums suoc sovu ceļu digitalajuos platformuos, FK “Upīte” itūšaļt atsarūn eksotiskajā Asvanā, Egiptē, kur puorstuov Latveju storptautyskā folklorys festivalā. Tok jau pavasarī FK “Upīte” byus sastūpama, kab jaunū programu izdzīduotu kūpā ar sovim klauseituojim – 27. martā gaidoms Latgolys muzykys i garšys vokors rodūšajā kvartalā “Zeit” Leigatnē, bet 6. aprelī, Ūtrajā Leldīnē, paradzāts FK “Upīte” lelkoncerts “Kod īt iz balli” Latgolys viestnīceibā “Gors”, Rēzeknē.

Namaterialuos kulturys montuojuma centra “Upīte” direktors Andris Slišāns soka: “Mums Upītē pabeigt itaidu albumu ir lelys tolkys sajiuta! Mes goda garumā – kotra mieneša 21. datumā – devem klauseituojim pa vīnam gabaleņam, pa vīnai dzīsmei ar videoklipu, tok niu beidzūt vysa puzle ir salykta kūpā. Ituos 34 dzīsmis ir myusu atlase nu vaira nakai 200 apzynuotūs dzīšmu, kū myusu pusē cylvāki dzīduoja okupacejis godūs. Tei ir dzeiva viesture, kas naļuove tradicejai izdzist pat vysgryutuokajūs laikūs. Asam izalasejuši tuos, kas pošim sirdei teikamuokys – i tuos, pi kurūs var kuorteigi izalaksteit ballē, i tuos, kas juodzīd klusai i teirai. Tys, ka albumu izdūdam šaļtī, kod dzīdim Nīlys krostā Egiptē, tik pīruoda – Upītis spākam rūbežu nav!”