Rokstu sagataveja: portals lakuga.lv

Gatavejūtīs vīnai nu centralūs nūtikšonu Latvejis literaturā – Latvejis Literaturys goda bolvai (LaLiGaBa), bolvys ekspertu komiseja paviestejuse nominātūs autoru i dorbu “garū sarokstu”, kai ari nūsaukuse Myuža bolvys sajiemieju – tulkuotuoju Jāni Krastiņu. Nominantu vydā ari Ligijis Purinašys dzejprozys kruojums “Magnificat” i Jūlijis Tumanovskys nu jaunnorvegu volūdys latgaliski iztulkuotuo Juna Fosis luga “Kaids nūteikti atīs”.

Itūreiz Latvejis Literaturys goda bolva tiks padūta ostoņuos nominacejuos: lobuokais dzejis autordorbs latvīšu volūdā; lobuokais prozys autordorbs latvīšu volūdā; lobuokais literaturys autordorbs bārnim latvīšu volūdā; lobuokais prozys tulkuojums latvīšu volūdā; lobuokais atdzejuojums latvīšu volūdā; spūdruokuo debeja literaturā latvīšu volūdā; spūdruokais dorbs dramaturgejā; spūdruokais dorbs literaturys pietnīceibā. Ligijis Purinašys gruomota “Magnificat” izvierzeita lobuokuo dzejis autordorba kategorejā, bet Jūlijis Tumanovskys tulkuotuo Juna Fosis luga “Kaids nūteikti atīs” – lobuokuo prozys tulkuojuma. Obejis gruomotys izdavuse Volūdu sāta. Vysu nominantu sarokstu var atrast ITE.

Ligijis Purinašys kruojumu “Magnificat” veidoj pīcys dalis, kuruos apsavārtys sīvītis attīceibys ar buozšonuos viersā pīredzi, ar dzymtū vītu, ar dzymdynuotuojim i cylvākim sūpluok, ar romantiskū partneri i gols golā ar sevi eistyn eksistencialā leiminī, apsazynojūt i pījamūt tū, ka “es” var tyvuotīs “cytam/cytim” tik da nūteikta rūbeža, kurū škārsojūt “es” vystik palīk vīns. Idejiskū kruojuma dziļumu i dzejis volūdys īdarbeibu pastyprynoj dzejprozys forma, kū īdvasmuojuse lyugšonu stilistika, kai ari smolkais, unikalais poetismys, kaids rakstureigs Ligijai Purinašai. Nūsaukums “Magnificat” īt nu latiņu volūdā puorcalta slavynuojuma Jaunovai Marijai, atsasaucūt iz tekstūs izmontuotū lyugšonu stilistiku, kas saplyudynuota ar aktualom temom i kū spūdrai atainoj kruojumā īkļautuos muokslinīka Raivja Nikolajeva originalilustracejis. Kruojumu veidoj dzejproza latvīšu literarajā i latgalīšu rokstu volūdā. Ingys Gedžūnis recenzeju par “Magnificat” var puorskaiteit ITE.

Jūlija Tumanovska latgaliski puortulkuojuse Nobela premejis laureata literaturā Juna Fosis lugu “Kaids nūteikti atīs”, kas jau pyrma tuos izdūšonys gruomotā pīdzeivuojuse ari pyrmizruodi Daugovpiļs teatrī. Autors roksta jaunnorvegu volūdā, kas, leidzeigai kai latgalīšu volūda Latvejā, Norvegejā ir mozuok lītuotuo volūda. Sugestejūšā, poetiskā, tok reizē nasamuoksluotā volūdā luga viereibys centrā izlīk eksistensialys temys, par pīmāru, mīlesteibu, greizsirdeibu, atsvešynuoteibu, vīnpateibu i ticeibu. Izdavumu papyldynoj četri roksti: par Junu Fosi i lugu, latgalīšu teatri, Fosi Latvejā, kai ari jaunnorvegu volūdu kai skotivis volūdu. Interveju ar Jūliju Tumanovsku var puorskaiteit ITE.

Latvejis Literaturys goda bolvai izdevieji beja īsnāguši 156 dorbus, kas izdūti 2025. godā, puorstuovāta 31 izdevnīceiba. Ar dasaceitūs gruomotu sarokstu var īpasazeit ITE.

Itūgod bolvys žurejā dorbojās ekspertu komisejis prīšksādātuoja, tulkuotuoja, publiciste i redaktore Ieva Lešinska; literaturzynuotnīks, literaturys kritiks i muzeja darbinīks Arnis Koroševskis; dzejnīks i atdzejuotuojs Edvards Kuks; rakstneica Kristīne Ulberga; dzejnīks, rakstnīks i daudzmuokslinīks Raibīs; autore i tulkuotuoja Signe Viška; filozofe i publiciste Sofija Anna Kozlova. 

LaLiGaBa nominantu eisais saroksts, kai ari specialbolvys sajiemiejs tiks izziņuots marta beiguos. 2. i 9. aprelī byus gaidomi tradicionalī nominantu skaitejumi, sovutīs 17. aprelī ar saukli “LaLiGaBa spoguļo” svineigā ceremonejā tiks nūskaidruoti uzvarātuoji.