Rokstu sagataveja: portals lakuga.lv

Cikom leluokuo daļa pasauļa gatavejās komercialim svātkim, folklorys kūpa “Upīte” aicynoj iz šaļti nūstuot i īsaklauseit patīsā, nasamuoksluotā mīlesteibys stuostā. Turpynojūt sovu ceļu caur tradicejom iz myusu dīnu skotu, kūpa izlaiduse dzīsmi “Upītes molā” nu jaunuo romanču cykla.

Folklorys kūpa viestej, ka dzīsme “Upītes molā” nav tik parosts meilys stuosts. Tys ir romantiskys viestejums par sasatikšonu, par kūpā nūdzeivuotu myužu, besakūku zīdiešonu, bārnu smīklim i naizbāgamū atsavadeišonu, kas beidzās ar nūceju vēļreiz sasatikt.

Itys skaņdorbs ir daļa nu folklorys kūpys “Upīte” eipašuo romanču cykla. Romancis nazkod beja natjamama večerinku i gūdu sastuovdaļa, kas ļuove izdzīduot vysdziļuokuos jiutys, i Upītis pusē itei tradiceja vys vēļ teikūt uzturāta dzeiva i aktuala.

Dzīsmē izmontuota tautys muzyka Domenika Slišāna i Katis Slišānis apdarē, tuos vuordu autori ir Sandis Zučiks i Kate Slišāne. Dzīsme īraksteita “Bigmaar’s Records” studejā, skaņu inžiners – Māris Keišs. Tuos vizualū stuostu veiduoja WaltzVisuals i Salvis Mass. Par atbolstu folklorys kūpa pasasoka dancukratuve.lv i folklubam “Ala pagrabs”.

Namaterialuos kulturys montuojuma centra “Upīte” direktors Andris Slišāns soka: “Nav najaušeiba, ka dzīsme īt pi klauseituoju taišni Valentindīnys prīškvokorā, kam jau šudiņ pastyprynuotai gaisā suoc viermuot mīlesteibys gors. Nūvieleju itū sajiutu saglobuot kotru dīnu. Romance “Upītes molā” ir taišni taida – tamā ir vyss cylvāka myužs. Nu pyrmuos bučys pi kruočainuos upis da sierma vacuma i pādejūs atvodu. Mes itū dzīsmi duovojam vysim, kuri muok meiļuot pa eistam, na tik svātkūs, bet kotru dīnu, kai tymūs vuordūs – “pīkļaušu i sorguošu tevi ik dīn”. Kab itei dzīsme ir kai sylts apskuovīņs nu Upītis, kas atguodynoj, ka mīlesteiba nasabeidz pat tod, kod sirds bādojās upis ūtrā krostā. Upītie dzeive ir jauka, jū te dzeivoj mīlestība!”

Naseņ folklorys kūpa “Upīte” izdeve albumu “Kod īt iz balli”, bet jau pavasarī jaunū programu izdzīduos kūpā ar sovim klauseituojim – 27. martā gaidoms Latgolys muzykys i garšys vokors rodūšajā kvartalā “Zeit” Leigatnē, bet 6. aprelī, Ūtrajā Leldīnē, paradzāts FK “Upīte” lelkoncerts “Kod īt iz balli” Latgolys viestnīceibā “Gors”, Rēzeknē.