Roksta autore: Agnese Skangale

Ituo gods 12. februarī Latgolys viestnīceibys “Gors” Lelajā zālē nūtyka 3. storptautyskais etnodžeza muzykys ansambļu konkurss “Guoyu pa JAZZ”. Sovus muzykys skaņdorbus i prīšknasumus konkursam beja sagatavejuši desmit ansambli nu vysaidu Latvejis muzykys vydsškolu: Rēzeknis, Reigys, Ventspiļs, Cāsu i Līpuojis. Pi uzvarātuoju gūda tyka ansamblis “Šaļts” nu Muokslu izgleiteibys kompetencis centra “Latgolys Muzykys i muokslys vydsškola” (MIKC LMMV).

“Mes asam Latvejā vīneiguo muzykys vydsškola, kurā var vuiceitīs tradicionalū muzyku, i tys beja dīzgon logiskys i rodūšs lāmums – izveiduot konkursu, kas apvīnoj latvīšu etniskū ideju i advancātū muzykys žanru – džeza muzyku,” stuosta MIKC LMMV izgleiteibys programys “Džeza muzyka” vadeituojs Mārcis Lipskis i izgleiteibys programys “Tradicionaluo muzyka” vadeituoja Liene Brence, kuri ari ir daļa nu konkursa organizatoru komandys. “Grybātu pīminēt, ka tei ideja roduos Kārlim Mangulsonam i Ilzei Unzulei. Jī beja vīni nu taidu ituo etnodžeza konkursa starta viļcieju. Ilzis stuosts ir interesants. Jei vīnā šaļtī suoce struoduot pi myusu kai metodike. Ilze sēdēja sovā kabinetā, kur vaļā lūgs. Jei dzierdēja, kai vyngrynojās džezisti, bet nu cyta lūga jei dzierdēja etnomuzikus, kas dzīduoja sovūs tolkys bolsūs. Taišni Ilzei dabiski atguoja tī diveji skaņu viļni nu džeza i etno. Dīzgon najauši, bet tai dzyma tei ideja par konkursu.”

Ituo gods konkursa vadeituoji beja latgalīšu muziks i grupys “Bez PVN” dalinīks Guntis Rasims i sabīdryski aktivs cylvāks i muziks Imants Spīčs. “Nasaverūt iz zīmeigajim laikapstuoklim i snīguotojim celim, šudiņ praktiski iz ituos skotivis uzastuos vysu Latvejis muzykys vydsškolu audziekņi. Nu ituo varim sacynuot, ka šudiņdīnys konkurss ir palics par etnodžeza epicentru vysa Latvejā i, īspiejams, vysā pasaulī,” sovā uzrunā viesteja MIKC LMMV direktors i vīns nu konkursa organizatoru komandys dalinīku – Raimonds Arbidāns. Konkursa profesionalū i kompetentū žureju puorstuovēja igauņu folkmuziks i pedagogs Villu Talsi, pianists, komponists i producents Elvis Artūrs Lintiņš i sytaminstrumentu i ansambļu pasnīdziejs Jāzepa Vītuola Latvejis Muzykys akademejis Džeza nūdaļā – Artis Orubs. 

Iz “Gora” skotivis kuope i sovus jaundorbus atskaņuoja desmit ansambļu sastuovi nu vysaidu Latvejis muzykys vydsškolu: 

• “Šaļts” i “Vysi Vieji” (MIKC “Latgolys Muzykys i muokslys vydsškola”);
• “Jūna” i “KurGale” (MIKC “Ventspiļs Muzykys vydsškola”);
• “Kaitte” i “EJ Collective” (Jāzepa Mediņa Reigys Muzykys vydsškola);
• “Aidā!” i “Harmonijas Hameleoni” (MIKC NVM “Reigys Dūma kora škola”);
• “Pētera Septets” (Alfrēda Kalniņa Cāsu Muzykys vydsškola);
• “OktaGons” (MIKC “Līpuojis Muzykys, muokslys i dizaina vydsškola”). 

Konkursā uzvarēja MIKC LMMV ansamblis “Šaļts”, kura sastuovā dorbojās ostoni jauni i talanteigi audziekni: Madara Arbidāne (vokals, perkusejis), Emīls Logins (sintezators, akordeons), Emīlija Matisone (vokals, sviļpaunīks), Polīna Ostafija (vokals, vejūle), Damians Pavlovičs (bungu komplekts), Katrīna Skutele (vokals, kūkle), Gabriella Smane (saksofons) i Kristaps Višs (basgitara). Konkursā “Guoyu pa JAZZ” ansamblis izpiļdeja divejis kompozicejis – latgalīšu tautysdzīsmis “Purvu brydu” i “Vysi kūceni” ansambļa dalinīku aranžiejumā.

Konkursa apbolvuošonys daļā tyka sveikti laureati i padūtys ari simpateju bolvys i specbolvys:

• 1. vīta – ansamblis “Šaļts” (MIKC “Latgolys Muzykys i muokslys vydsškola”);
• 2. vīta – ansamblis “Aidā!” (MIKC NVM “Reigys Dūma kora škola”);
• 3. vīta – ansamblis “OktaGons” (MIKC “Līpuojis Muzykys, muokslys i dizaina vydsškola”);
• Simpatejis bolva nu Rēzeknes vaļstspiļsātys Kulturys i turysma centra – ansambļam “KurGale” (MIKC “Ventspiļs Muzykys vydsškola”);  
• Kordirigenta Juoņa Grudula simpatejis bolva – ansamblim “Šaļts” i “Vysi Vieji” (MIKC “Latgolys Muzykys i muokslys vydsškola”); 
• Specbolva par tautysdzīsmis aranžeju i izpiļdiejumu – ansambļam “KurGale” (latgalīšu tautysdzīsme “Leigoj pologs iz iudiņa”, aranžēja Agate Dreļa, Beata Estere Mačtama i Roberts Kasperovičs (MIKC “Ventspiļs Muzykys vydsškola”); 
• Specbolva par lobuokū individualū snāgumu – Gundegai Sirvidei (MIKC “Latgolys Muzykys i muokslys vydsškola”, ansamblis “Vysi Vieji”). 

“Š-Š-Š-ŠA-ŠA-ŠA-ŠAAAĻTS!”

“Tys beja cīši nagadeiti, jo mes klausomēs – soka trešuo vīta, ūtruo vīta, nu stabili nabyus pyrmuo vīta. I tod vīnkuorši pasoka myusu nūsaukumu “Šaļts”. Lācam leidz dabasim! Tuos emocejis izsyta vysuleluokū viļni. Es vys vēļ nasaprūtu, kas nūteik. Lels gondarejums, ka mes tai ceņtemēs, mes dūmuojom par vysim tim punktim – tārpi, kosmetika, vyss taids, par kotru seikuokū detaļu. Mes guojom iz skotivi izbaudeit, na piec koč kaidys vītys! Mes cīši daudz mieginuojom, izbaudejom tū procesu, vīna ūtra energeju i spāku. Tī vysi mieginuojumi leidz divpadsmytim naktī atsamoksuoja, lai nūspieļuotu tuos desmit minutys. Beja biedeigi kuopt nu skotivis, bet izaver, ka byus vēļ desmit i vaira minutu juospieļoj,” cyts caur cytu sovuos sajiutuos doluos ansambļa “Šaļts” dalinīki. “Nūteikti turpynuosim! Polīna (ansambļa dalineica, kura rūkuos tur vīnu nu konkursā dabuotūs bolvu – A. S.) tur itū skaistū īspieju atkluot 8. Baļtejis džeza festivala “Šķiuņa džezs” Lūznovā koncertprogramu 2026. gods 19. augustā. Sasateikam! Pabaudeisim kūpejū šaļti!”

“Nūteikti byus atteisteiba, jo ar kotru konkursa reizi jis palīk saturiski boguotuoks, jis ir jau ar sovom vierteibom i tradicejom. I tī, kas atbrauc pi myusu iz Rēzekni, jī jau radz i zyna, iz kū jī brauks, zyna kas byus i jau tū gaida kai svātku reizi,” stuosta Liene Brence. “Golvonuo līta – dzīšmu aranžiejums puorsvorā ir pošu audziekņu veiduots. Tys nūzeimoj, ka jī atrūn sovys kruosys, izakristalizej talanti, ari sovu ansambļu vydā. Tī, kas ir kuopuši iz “Gora” skotivis, ari puorsvorā turpynoj byut taidūs sastuovūs, kaidūs uzastuojuši konkursa laikā. Jim taida jauda, lels apspierīņa punkts ite – suokt i ari naatsalaist i turpynuot. Eistineibā mes ik pa laikam kaidu nu sastuovu, it eipaši tūs, kuri ir pa pyrmajom vītom, mes jūs redzim. Vīns nu Rēzeknis sastuovu ir “Bruoli i Muosys”. Jī turuos, mes par tū cīši prīcojamēs, jūs var dzierdēt, ir izguojs albums. Nūteikti ite ir vaira konkursa daļa, kur ir īsaguļdiešona jaunīšūs, tod ari kulturys i muzykys atteisteišona i nūstyprynuošona, ka regions ari nu tuo daudz īgiust.”

“Itys pasuokums ir samārā unikals Latvejis, eistineibā varbyut pat Eiropys kontekstā. Itys ir taids vīneigais konkurss formatā, kurā paradz atskaņuot jaundorbus, piļneigi jaunu repertuaru – atbrauc sastuovs i jī izpylda divejus pyrmatskaņuojumus, vēļ teik īsaisteits etno stuosts īškā, tys veidoj ari konkursa byuteibu i unikalitati,” pīmiņ Mārcis Lipskis. “Es pat saceitu, ka tys ir rodūšuokais muzykys konkurss Latvejā. Pats svareiguokais, ka tys nūteik jaunīšu vydā, ka taišni jaunīši pīsadola i taisa jaunu muzyku, i taišni ite, “Gorā”, pi myusu. Konkurss turpynuosīs vēļ daudzus godus!”

Storptautyskais etnodžeza muzykys ansambļu konkurss teik reikuots nu 2023. gods ik piec diveju godu. Konkursu organizej MIKC “Latgolys Muzykys i muokslys vydsškola”, atbolsta Rēzeknis vaļstspiļsātys pošvaļdeibys agentura “Rēzeknis kulturys i turysma centrys”, Rēzeknis nūvoda pošvaļdeiba, “A&T Trade Music”, “Trodo”, Latgolys viestnīceiba “Gors”, MIKC “Ventspiļs Muzykys vydsškola”, Lūznovys muiža, Storptautyskais Valmīrmuižys etnomuzykys festivals, alternativuos kamermuzykys festivals “Sansusī”, “Zaļā Sala”, SIA “Poligrāfserviss”, SEB, SIA “Alba”, SIA “SAHO”, “Laivu māja”, “JamBurger”, kopeja graudzdātova “KUUP”, zemnīku saimisteiba “Kurmīši”, “Ausmeņa kebabs”, SIA “Rēzeknes gaļas kombināts”, festivals “Pink Noise Riga”, “Gardu Muti”, “Čaklā Bite”, “Organic Products” i AS “Latgales piens”. 

Fotogalerejā kartenis nu Storptautyskuo etnodžeza muzykys ansambļu konkursa “Guoyu pa JAZZ”. Foto: Agnese Skangale/portals lakuga.lv

1 2 ►