Rokstu sagataveja: portals lakuga.lv

Jau 33. reizi nūteik Latvejis Gruomotizdevieju asociacejis organizātais gruomotu muokslys konkurss “Zelta ābele”, kurā Latvejis izdevieji dasaceja 2024. i 2025. godā izdūtuos skaistuokuos gruomotys. Itūgod 35 izdevieji konkursam īsnēdze 113 gruomotys. Niu izvierzeitys lobuokuos ostoņuos kategorejuos, vīns nu nominantu ir ari Juna Fosis lugys “Kaids nūteikti atīs” izdavums latgalīšu rokstu volūdā.

Jūlijis Tumanovskys latgaliski puortulkuotū Nobela premejis laureata literaturā Juna Fosis lugu “Kaids nūteikti atīs” izdavuse Volūdu sāta. Gruomotys dizaina autore ir Ilze Kalnbērziņa-Prā, tei drukuota tipografejā “Livonia Print”. Juns Fose roksta jaunnorvegu volūdā, kas, leidzeigai kai latgalīšu volūda Latvejā, Norvegejā ir mozuok lītuotuo volūda. Sugestejūšā, poetiskā, tok reizē nasamuoksluotā volūdā luga viereibys centrā izlīk eksistensialys temys, par pīmāru, mīlesteibu, greizsirdeibu, atsvešynuoteibu, vīnpateibu i ticeibu. Izdavumu papyldynoj četri roksti: par Junu Fosi i lugu, latgalīšu teatri, Fosi Latvejā, kai ari jaunnorvegu volūdu kai skotivis volūdu. Konkursā “Zelta ābele” tei kategorejā “Proza” sasaceņš ar četrim cytim izdavumim. Ar pylnu nominantu sarokstu var īpasazeit ITE.

Nominantus izalaseja pīcu ekspertu žureja: Kristaps Epners (žurejis komisejis prīšksādātuojs), Ingvilda Strautmane, Lolita Butāne, Dina Ābele, Agne Dautartaite-Krutule (Leitova). Jūs aizdavums beja ryupeigai izviertēt kotra izdavuma dizaina koncepceju, atbiļsteibu izdavuma saturam, maketu, papeira izalaseišonu i poligrafiskū izpiļdejumu, atlaseit skaistuokuos gruomotys i nūsprīst uzvarātuoju kotrā kategorejā.

Konkursa apbolvuošonys ceremoneja nūtiks 19. martā “Klīversalā”, Latvejis Nacionalajā bibliotekā, kod tiks paziņuoti uzvarātuoji kotrā kategorejā i padūta goda muokslinīka bolva. Ari itūgod kaids nu jaunūs dizaineru sajims apbolvuojumu “Stikla ābols”, ar kurū žureja grib dagrīzt izdevieju viereibu jaunūs i talanteigūs gruomotu dizaineru rodūšajam veikumam. Tiks padūtys ari specialbolvys. Bolva par myuža īguļdejumu gruomatnīceibā itūgod teik pīškierta apguoda “Neputns” leidzadybynuotuojai i ilggadejai golvonajai redaktorei, muokslys zynuotneicai Laimai Slavai.

Gruomotu muokslys konkursa “Zelta ābele” pamatā ir ideja par gruomotu kai daudzu nūzaru specialistu veiduotu muokslys dorbu, kas atkluoj gruomotys satura i formys muokslinīcyskū vasalumu. Gruomotys nūformiejums atspīgeļoj konkretajam laika pūsmam rakstureigū muokslinīcyskū redziejumu, poligrafejis i papeira ražuotuoju vareibys gruomotys satura piļneiguokai atkluosmei. Konkursa mierkis ir veicynuot gruomotu izdūšonys profesionaluo i muokslinīcyskuo leimiņa izaugsmi i atteisteit skaiteituoju izpratni par gruomotu muokslu laikā, kod bīži viņ gruomotys lītojam digitaluos īreicēs i vidēs.

Nominātuos gruomotys februarī i martā varēs apsavērt Reigys Centralajā bibliotekā, skaiteituoji ar tom varēs īpasazeit ari kulturys centrā “Siguldas devons”, Ūgris Centralajā bibliotekā i Jiurmolys Centralajā bibliotekā. Tuos varēs apsavērt i aptausteit ari Reigys Gruomotu svātku laikā 20. i 21. martā Latvejis Nacionalajā bibliotekā. Taipat sevkurs nu 23. februara da 15. marta varēs nūbolsuot par sovu favoritu kasgadejā skaiteituoju bolsuojumā portalā LSM.lv.