Rokstu sagataveja: portals lakuga.lv

13. februarī klubā “Melnā piektdiena” tyka padūtys Latvejis Metalmuzykys bolvys pīcuos kategorejuos. Bolvu par lobuokū 2025. gods metala albumu sajēme grupa nu Daugovpiļs – “Varang Nord” – par albumu “Mygla”.

“Latvejis Metalmuzykys goda bolvu padūšona itūgod nūtyka jau pīcpadsmytū reizi – ar itaidu bolvys ilggadeibu var pasalapnuot tik “Zelta mikrofons”, i tys viņ ir ruodeituojs, cik pasuokums ir nūzeimeigs i gaideits,” sovuos puordūmuos doluos bolvys žurejis puorstuovs Sandris Vanzovičs.

Sandris ari stuosta, ka, saleidzynojūt ar pārnejū godu, bolvys pretendentu skaits ir drupeit sasamazynuojs, tok na byutyskai. Sovpus, runojūt par tendencem, jis pastreipoj, ka ari Latvejis smogū muzyku sasnāguse pasauļa muzykys aktualitate – grupys arviņ bīžuok izdūd na pylnformata albumus voi platis, tok minialbumus ci saeisynuojumā EP. Ari Metalmuzykys goda bolvā taidim albumim veļteita atseviška nominaceja. “Cyta storpā, metalmuzykys vārtātuoji ir sūli prīškā jau nūsauktajam “Zelta mikrofonam”, kur arviņ nūteik debatis par EP daskaiteišonu pylnvierteigam īrokstam,” doluos Sandris.

Latvejis Metalmuzykys goda bolvu viertiejumu veidoj žurejis redzīņa i klauseituoju bolsuojuma kūpsuma. Sandris Vanzovičs skaidroj, ka žurejis dorbs nateik baļsteits kaidūs matematiski izskaitļuotūs kriterejūs, tok profesionalitatē i pīredzē. Jis ari dasoka, ka taidi kritereji, piec juo dūmu, gremdej jaunū muzykys apbolvuojumu “Gamma”. “Nav pat vārts diskutēt par īspiejamū subjektivismu, kam muzykys viertiešona i klauseišonuos gols golā taipoš byus subjektiva – pateik voi napateik leiminī –, tok žurejis aizdavums ir piec vareibys nūviertēt īsnāgtūs dorbus nu kvalitatis redzīņa aspekta,” tai Sandris.

Grupa “Varang Nord” beja nomināta divejuos kategorejuos – lobuokais 2025. gods metala albums i lobuokuo 2025. gods koncertgrupa. Ūtrajā kateogrejā jūs puorspēja “Skyforger”, cikom goda albuma kategorejā “Skyforger” tyka izjimti nu konkurencis i jim pīškierts “Grand Prix”. Sandris Vanzovičs komentej: “Par “Varang Nord” albumu “Mygla” – dūmoju nivīnam nav švuorbu, ka tys ir peļnejs goda albuma titulu, taipoš kai poši varangi koncertgrupys bolvu, tok ir vīns lels “ka”, prūti, ka 2025. godā nabyutu izguojs grupys “Skyforger” albums, ka itei grupa nabyutu salasejuse klauseituoju pylnu Reigys arenu i “Palladium”, ka “Skyforger” nabyutu “Skyforger”… Leidz ar tū varangu apbolvuošona attīceigajā nominacejā, “Skyforger” izjamūt uorpus konkurencis, beja tikai logiska, partū, ka obejuos kategorejuos “Varang Nord” beja puorlīcynūši ūtrī – kai žurejis, tai klauseituoju bolsuojumā”. Sandris ari dasoka, ka varangu snāgumā vārojama napuortraukta izaugsme, kurū cīši labi varēja redzēt ari albuma “Mygla” prezentacejis koncertā klubā “Melnā Piektdiena”.

“Grupa “Varang Nord” breineigi struodoj ar publiku, dorbojās atributikys aba merchandise lauceņā, izdūd albumus i dūdās koncertūs. Itū Latgolys fenomenu, nu Reigys augstceļtņu verūtīs, īspiejams, pat gryuši nūviertēt!” soka bolvys žurejis puorstuovs Sandris Vanzovičs.

Sovpus poši “Varang Nord” soka tai: “Mums itei ir ilgi gaideita bolva! Asam īguļdejuši miļzeigu dorbu i eistyn asam sajiusmā, ka tys ir tik augstu nūvārtāts! Itys albums saguoja smoguoks par myusu īprīškejim dorbim, beja daudzi eksperimentu ar jaunu skaniejumu, i niu redzim, ka naasam pīlaiduši klaidys! Paļdis vysim, kas par mums bolsuoja, kas myus atbolsta i roksta sirsneigus vuordus. Mes jius vysus mīļojam!”

Grupa “Varang Nord” turpynoj aktivu Eiropys koncertturneju, aktualajom nūtikšonom var sekuot leidza jūs Facebook lopā. Tyvuokais laiks, kod grupu varēs dzierdēt Latvejā, ir 18. aprelī oficialajā smoguos metalmuzykys festivala “Wacken Open Air” īsasiļdeišonys nūtikšonā klubā “Melnā Piektdiena”. Svietejūt “Wacken Open Air” 35 godu pastuoviešonu, pasuokums pyrmū reizi vīnlaiceigi nūtiks 35 vaļstīs vysā pasaulī nu Klusuo okeana pīkrastis leidz par Andu kolnim. “Prīcynoj, ka Latveja ir itamā pasauļa grupu saimē i ka Latgola ari ir puorstuovāta,” doluos nūtikšonys organizators Vladimirs Kravčenko.