Roksta autore: Indra Koroļonoka, portals lakuga.lv

Sastdiņ, 21. februarī, svietejūt Storptautyskū dzymtuos volūdys dīnu, Maltas pogosta bibliotekā nūtika bārnu gruomotys “Rupuceiša vosora” attaiseišonys svātki. Pasuokuma eipašī gosti beja teksta autors Juoņs Zīmeļs, muokslineica, gruomotys ilustraceju autore Maija Pūdnīka i cyti izdavuma veiduotoji.

Pasuokuma dalinīkus sagaideja i ar gruomotu īpazeistynuoja Saulikvarde i gruomotys varūņs Ezeits. Iz gruomotys attaiseišonys svātkim īsaroda kai pīaugušī, tai ari puļceņš bārnu – taišni bārni beja tī, kuri jaunuos gruomotys nu autora sajēme poši pyrmī. Pi praktiska īskota gruomotā atrūnamajūs aizdavumūs varēja tikt jau tuos atkluošonā – kluotyn asūšī minēja krystvuordu meiklis i puorbaudeja sovys latgalīšu volūdys zynuošonys i vuordu kruojumu.

Gruomotys teksta autors Juoņs Zīmeļs raksteit latgaliski suocs pavysam naseņ i gruomota “Rupuceiša vosora” ir juo pyrmuo gruomota. Juo rodūšuo darbeiba aizasuoce, kod “Latgolys prozys skaitejumūs 2024” īsnēdze ari sovu literarū dorbu par rupuci. Tys vys beja raksteits latvīšu literarajā volūdā, tok gribiešona īsavuiceit raksteit latgalīšu rokstu volūdā savede jū kūpā ar Marutu Latkovsku, kura pamudynuoja pīraksteit i pyrmū gruomotu. “Rupuceiša vosora” ir kai kvalitativa bārnu literaturys losomvīla, tai i vuiceibu materials. Tamā īkļauts daudzi vysaidu praktisku, rodūšu i izgleitojūšu elementu, pīmāram, latgalīšu volūdys pareizraksteibys lykumi, kai ari, prūtams, stuosti par golvonū varūni Rupuci i juo draugim Škierzlotu, ežim i cytim. Taipat izmontuoti i interaktivi elementi, īkļaunūt kvadratkodus, kurūs nūskenejūt, latgalīšu volūdys i kulturys pasauļs atsataisa vēļ plašuoks, pīmāram, pīduovojūt nūsaklauseit grupys “Rupuči“ dzīsmi “Div’ mozi eži“.

Gruomotys tehniskuo redaktore Skaidreite Svikša stuosta, ka suokumā beja ideja par kruosojamū gruomotu, vystik piečuok īcere puorsamejuse i gola rezultatā saguoja gruomota ar vīnpadsmit stuostim, kurūs papildynoj kai rodūšī aizdavumi, vuordineica ar mozuok zynomim vuordim nu teksta, tai ari volūdys atsliedzeni – latgalīšu volūdys gramatikys lykumi, kurūs sagataveja idejis autore i literaruo redaktore Maruta Latkovska.

Gruomotys ilustratore Maija Pūdnīka komentej, ka kūpā ar Marutu Latkovsku jau sen dūmuojušys par kaidu projektu, kurā byutu vajadzeigys ilustracejis. Ir bejs svareigi, ka par īdviesmi teik jimts teksts taišni latgalīšu volūdā: “Cikom es dūmuoju, tikom Maruta Latkovska jau pīzvona i vaicoj, vai nagrybu ilustrēt Juoņa Zīmeļa gruomateņu par Rupuceiša vosoru. Kai tod nagrybu? Grybu! Patīseibā gruomateņā ir muna bierneiba. Es asmu padūmu godu bārns, rūtaļlītu daudzi nabeja, deļtuo es daudz dzeivuojūs pa duorzu – kūpā ar skudreņom, vardeitem i škierzlotim.”

Idejis autore i literaruo redaktore Maruta Latkovska atkluošonys pasuokumā stuosteja gruomotys tapšonys stuostu i mudynuoja byut aktivuokim i ticēt sovym sapynim: “Mums vajag vaira pasaļaut iz sovim spākim i pošim dūmuot, kū mes varim izdareit. Ka naizīt vīnu reizi, juomieginoj otkon. Ka naizīt īīt pa durovom – juokuop pa lūgu. Dūma par tū, ka vajag kaut kur īkļaut latgalīšu rokstu volūdys pareizraksteibys atsliedzeņus, beja jau seņ. Suokumā beja ideja tūs īkļaut cytā projektā, bet tys naizadeve. Vystik piec laika roduos ideja par “Rupuceiša vosoru”, i tys izaruodeja vēļ lobuok nakai suokūtnejuo dūma. Deļtuo navajag nūlaist spuornus, ka ar pyrmū reizi kas naizadūd. Lai mes vysi atrūnam sovu komandu, kura var mums paleidzēt, i lai tī sapyni eistynojās. Dūmuot, ka mes vysi varim – taids ir muns nūvieliejums!”

Pasuokumā latgaliskū goru uzturēja ari iz tū atguojušī bārni, nu kurūs daļa pīzyna, ka muok latgalīšu volūdu i tamā runoj kasdīnā ar saimi i draugim. Atsokūt iz vaicuojumu, kaidys tendencis itūšaļt ir latgalīšu volūdai – tei atsateista voi vystik lieneišam pagaist, gruomotys tehniskuo redaktore Skaidreite Svikša soka: “Vysi itī pasuokumi, izdavumi – tei ir latgalīšu volūdys 21. godu symta atmūda. Tūmār vyss atkareigs nu tuo, cik daudz īškejuo spāka i atbolsta pītiks tim, kas dora. Svareiguokais ir taišni īškejuo griba i atbolsts. Pīmāram, par itū es nasajiemu nivīna centa, tok taipat maņ beja taida degsme tū vysu izdareit, gribiejuos, lai vysi aizdavumi ir vierteigi, lai cylvāki pamona i tūs seikumus! Prīca, ka šudiņ iz atkluošonu atguoja puorsteidzūši daudz cylvāku – tys ir cīši pateikami.”

Piec gruomotys attaiseišonys svātku oficialuos daļas sekuoja pasiediešona pi čaja i gastiņčim, kur turpynuojuos sarunys par latgalīšu volūdu, literaturu, kulturu i citym ar latgaliskū kulturvidi saisteitim vaicuojumim. Interesentim beja vareiba sajimt jaunū gruomotu i autora autografu.

Vaira par gruomotu “Rupuceiša vosora” var puorskaiteit ITE.

Fotogalerejā biļdis nu gruomotys prezentacejis pasuokuma. Foto: Indra Koroļonoka/portals lakuga.lv