Rokstu sagataveja: portals lakuga.lv

Šudiņ, 2. martā, myužeibā nūguojs kulturys i sabīdryskais darbinīks, Rēzeknis Zaļuos sinagogys pasuokumu organizators i Latgolys kulturys paziniejs Voldemārs Ivdris (1949–2026), informej Rēzeknis piļsātys pošvaļdeiba.

Voldemāra profesionaluo darbeiba beja cīši daudzveideiga – jis struoduojs kai režisors, žurnalists i gids, desmit godu bejs Rēzeknis Zaļuos sinagogys seja, viestejūt ituos vītys stuostu, organizejūt pasuokumus, kai i vodūt ekskursejis i izgleitojūšys nūdarbeibys. 20. godu symta 80. godu beiguos struoduojs Rēzeknis rajona Kulturys nūdaļā, organizējs Rēzeknis piļsātys svātkus, aktivi īsasaistejs Tautys froņtis kusteibā, pīmāram, veiduojs scenareju sorkonboltsorkonuo karūga paceļšonai pi Rēzeknis kulturys noma. Taipat lelu īguļdejumu Voldemārs pamets latgaliskuma styprynuošonā, 90. godūs dokumentejūt tradicionalū vidi Latgolys Televizejis sabīdreibys raidejumā “Olūti” i cytūs formatūs. 2025. gods golā Voldemārs sajēme Latgolys turysma goda bolvu nominacejā “Turysma izcileiba”.

Par raidejumu “Olūti” Voldemārs intervejā portalam lakuga.lv 2017. godā saceja tai: “Es gribieju paruodeit latgaliskū identitati, dzeivisziņu caur cylvākim, religeju, folkloru, dzeivis stuostim.” Jis beja audzs myusu dīnu Rēzeknis nūvoda Greivuļūs cīši latgaliskā vidē, latvīšu literarū volūdu bierneibā pamatā asūt dzierdiejs tik radejā. Dorbs pi raidejuma jam ļuovs atguoduot tū, “kai runuoja baba i dzeds”, izmontuot vysaidus vacvuordus, kas jam ari cīši īsapatykušs. Piec televizejis darbeibys beigu Voldemārs kai režisors struoduojs pi vairuoku ar Latgolu saisteitu dokumentalūs kinu: “Latgales Māras ceļš”, Rēzeknis Augstškolys taiseitūs filmu par Ontonu Kūkuoju, Ontonu Rupaini i Juoni Klīdzieju.

Voldemāra izpratne par regiona viesturi i kulturys nūtikšonom beja unikala, partū i juo vadeituos ekskursejis, i taiseitī raidejumi i organizātī pasuokumi vysod deve na tik padzilinuotys zynuošonys, tok ari eistynu emocionalū puordzeivuojumu. Juo spieja sapeit kūpā viesturis līceibys ar myusu dīnu dzeivis paralelem ļuove sevkuram klauseituojam sajust latgaliskū i saprast tuo patīsū vierteibu.

Portals lakuga.lv izsoka leidzjiuteibu Voldemāra Ivdra saimei, kolegim i cytim tyvajim cylvākim.