Rokstu sagataveja: portals lakuga.lv

Pyrmuo pavasara cielīņa īsacejumus sagatavejuse Evija Piebalga, kas ir literarūs miniaturu i fotomuokslys sajiutu karteņu ap Latgolu “Brīnumdārzs/Breinumu duorzs” autore. Jei īsoka izgaršuot, paraudzeit nazkuo jauna i golvonais – gavilēt par pavasari!

Izgaršoj Latgolys lobumus

Marts Latgolā ir garšu mieness – eistais laiks, kab dūtīs nalelūs atkluojumūs i pagaršuot koč kuo jauna tepat tyvumā. Preiļūs durovys attaisejušys divejis jaunys vītys – gastrobuss “Komēta” i Preiļu piļs restorans “ViAmor”. Garšu mienesī Preiļūs gūdā teik calts Preiļu Čedarys sīrs – tū varēs nūgaršuot kai saļdiejumā, tai sīra-tomatu tartē, kugelī, ar Eiropys kungu zaptem i pi studiņa.

Mozs, tok byutyskys atguodynuojums – sovu gasteišonu lobuok dasaceit īprīšk, kam gordi pīdzeivuojumi cytreiz aizapylda gona mudri. Plotuok par Garšu mieneša pīduovuojumu skaiti ITE.

Paraugi gleznuot

Ir tei šaļts dobā, kod vyss apleik drupeit ci pat cīši izaver piec Purvīša pavasara ainavu. Ka tys mūdynoj muokslinīku ari tevī – 7. martā nu 13 da 16 stuņdem Rotko muzejs aicynoj svieteit pavasari muokslineicys Agrys Ritinis gleznuošonys meistardarbneicā. Breineiga vareiba īnest jaunys kruosys i pavasara sajiutys sovā sātā, izgleznojūt muokslineicys autordorba kopeju voi juos vadeibā radeit sovu kompoziceju.

Daleibys moksa (36 EUR) ītver vysus materialus, izstuodis “Nr. 2. Bez nūsaukuma” apmekliejumu, veina gluozi, kopeja voi čaja kruškeņu. Vītu skaits īrūbežuots, juodasasoka īprīšk (mairita.folkmane@daugavpils.lv; 26564817).

Gavilej!

Mums, latvīšim, ir rakstureigi nazkuo gaideit – Zīmyssvātku, lobuoka laiku, leita, pīktdīnis, guojputynu, pyrmuo snīga voi pyrmūs gailiņu. Vīna nu šmukuokūs gaideišonu vystik ir pavasars. Gavilej – doba mūstās nu zīmys mīga, dīnys palīk garuokys par naktim, suoc suluot bārzi, zīdēt snīga stuņdinīceni. Byus pavasars. I piečuok – vosora, kuo otkon gaideit.