Rokstu sagataveja: portals lakuga.lv

Vladislava Luoča fonds jau sastū godu padūd bolvu gruomotai, kas izdūta latgaliski i, piec fonda dūmu, īprīškejā godā ir davuse vysuleluokū īguļdejumu latgalīšu volūdys i rakstnīceibys populariziešonā. Itūgod par “Latgolys goda gruomotu 2025” pīzeita Meldrys Gailānis saraksteituo i Līgys Mundys ilustrātuo gruomota bārnim “Kai palikt par eistynu luoci”, informej fonda puorstuovi.

Fonda puorstuovi atsasauc iz Vladislava Luoča raksteitū par gūdu Andryva Jūrdža fonda 25 godu dybynuošonai: “Tys ir goreigō spāka naizsmeļams olūts. Un nu šō olūta sev spāku smeļsīs vēļ paaudžu paaudzes, jo šymā olūtā ir sakūrts gunkurs. Olūtā ir sakūrts gunkurs! Kai tys ir īspējams? Bet tys ir nūticis. Mēs šudiņ redzim, ka olūts burbuļoj tōlōk un gunkurs ari kurīs tōļōk. Beja latgalim drukas aizlīgums pagōtnē (..), bet apspīdēji navarēja latgaļu olūta aizbērt tod un navar tū aizbērt tagad, jo gunkurs tautas sirdī un dvēselē ir styprōks un korstōks un tō navar nūdzēst, ni apslōpēt — jo latgali sovu gunkuri var sakūrt ari olūtā.” Taipat jī nūruoda, ka Vladislavs Luocs sovu myužu veļteja drukuotam vuordam latgaliski. Jam beja skaidrys pastatejums – koleidz tautai ir izdevnīceibys i cylvāki, kas ryupejās par gruomotu izdūšonu, tik ilgi tei naīs būjā. Taišni deļtuo ari Luoča fonds jau sastū godu pīškir sovu bolvu tai gruomotai, kas ir izdūta latgaliski i īprīškejā godā ir davuse vysuleluokū īguļdejumu latgalīšu volūdys i rakstnīceibys populariziešonā.

“Meldrys Gailānis i Līgys Mundys gruomotai “Kai palikt par eistynu luoci” ir dziļuoka miseja nakai tikai gruomotai latgalīšu volūdā. Gruomota ļaun īpazeit latgalīšu volūdu bārnim i dūd cereibu, ka iz prīšku byus cylvāki, kas skaiteis gruomotys latgaliski, i ka gruomota varātu byut par gryudīni radeit jaunu “luočus”, kas turpynuos latgalīšu gruomotu izdūšonu. Deļtuo gruomota i autoris ir gūdam peļnejušys “Latgolys goda gruomota 2025″ titulu!” nūruoda Vladislava Luoča fonda vaļde.

Īprīšk itei bolva pīškierta Alda Bukša romanam “Bruoli”, Oskara Seiksta gruomotai “Vokora vuordi draugim”, Annelis Slišānis stuostu kruojumam “Tuoraga stuosti. Pīns”, Laurys Meļnis i Viviannys Mariis Stanislavskys komiksam “Sunāns breiveibā” i Valentina Lukaševiča gruomotai “Dīnvydlatgolys stuosti”.

Latgalīšu kulturys kusteibys “Volūda” izdūtajā Meldrys Gailānis i Līgys Mundys gruomotā “Kai palikt par eistynu luoci” kūpā ar luocānu Meikuleņu i juo draugim – meitineiti Martu, začineiti Pūdzeņu, ezeiti Pukšynu i cytim — muozī i lelī skaiteituoji sešuos puosokuos var īpazeit emocejis – naticeibu sev, augstpruoteibu, sirdeigumu, baili, skumi i prīcu, kai ari rībumu pret cytaidū. Kotrai puosokai kluotyn ir socialuos pedagogis Laurys Mičulis-Šustis sagataveiti aizdavumi, kurī emocejis paleidz saprast vēļ lobuok. Taipat, kab vīgluoka skaiteišona, gruomota papyldynuota ar gryutuokūs vuordu skaidruojumim latvīšu literarajā volūdā.