Rokstu sagataveja: portals lakuga.lv

Pīktdiņ, 27. martā Arhitektu noma Lelajā zālē nūtyka akcejis “Latvejis medeju volūdys bolva 2025” laureatu, atzineibys rokstu, simpateju bolvys i myuža īguļdejuma bolvys sajiemieju apbolvuošonys ceremoneja, kurū reikuoja Nacionaluo elektroniskūs plašsazinis leidzekļu padūme (NEPLP) i Vaļsts volūdys centrys (VVC). Latgolys regionaluos žurnalistikys apakškategorejā bolvu sajēme Latvejis Radejis latgaliskuo raidejuma “Kolnasāta” vadeituoja Guna Zvīdre, bet latgalīšu kulturys ziņu portals lakuga.lv tyka pi atzineibys roksta par boguoteigu latgalīšu rokstu volūdys vuordu kruojumu.

Akcejis mierkis ir nūsaceit, izviertēt i apbolvuot elektroniskūs plašsazinis leidzekļu raidejumu vadeituojus i veiduotuojus, kuri lītoj pareizu i boguotu latvīšu volūdu, kai ari periodiskuos presis izdavumus i škārsteikla ziņu portalus, kurūs lītuota kvalitativa latvīšu volūda. Akceja ir vīns nu pasuokumu, kurs veicynoj medeju i tūs auditorejis aktivu īsasaisteišonu volūdys kulturvidis kūpšonā.

“Latvejis medeju volūdys bolva” NEPLP i VVC sadarbeibā nūtyka jau trešū godu piec kuortys. Itūgod akcejai beja dasaceiti 130 pretendenti, nu kurūs ekspertu komiseja izvierzeja 13 bolvys laureatus, ostoņus atzineibys rokstu sajiemiejus i vīnu myuža īguļdejuma bolvys sajiemieju – laikroksta “Alūksnes un Malienas Ziņas” korektori Brigitu Skaistkalni. Taipat i akcejis sadarbeibys partneri izalaseja vīnu simpateju bolvys sajiemieju.

Bolvys pretendentus viertēja volūdys i skotivis muokslys eksperti – volūdneicys Dite Liepa i Aiga Veckalne, akters i skotivis runys pasnīdziejs Juoņs Krūņs (Jānis Kronis) –, VVC eksperti, kai ari akcejis sadarbeibys partneri nu Kulturys ministrejis, Tīslītu ministrejis, Sabīdryskūs elektroniskūs plašsazinis leidzekļu padūmis, Latvīšu volūdys agenturys, Latvejis Nacionaluos bibliotekys, Latvejis Nacionaluo rakstnīceibys i muzykys muzeja, Latvejis Presis izdevieju asociacejis, Latvejis Raidorganizaceju apvīneibys, SIA “Tilde” i Latvejis Universitatis.

Itūgod akcejā bolvu sajiemieji tyka nūsaceiti pīcuos kategorejuos ar 29 apakškategorejom, kotrā nu tūs ekspertu komiseja varēja nūsaceit vīnu laureatu i vīnu atzineibys sajiemieju. Sūpluok televizejis i audiovizuala pakolpuojuma piec pīprasejuma ziņu moderatoru, radejis, laikrokstu i žurnalu kategorejom atseviški gūdynuoti ari Latgolys regionaluos žurnalistikys puorstuovi. Akcejis organizatori nūruoda, ka ari itamā kategorejā nūtykuse aktiva pretendentu izvierzeišona, tok par laureati pīzeita Latvejis Radejis latgaliskuo raidejuma “Kolnasāta” vadeituoja Guna Zvīdre. Sovutīs latgalīšu kulturys ziņu portals lakuga.lv tyka pi atzineibys roksta par boguoteigu latgalīšu rokstu volūdys vuordu kruojumu.

Juodasoka, ka portals lakuga.lv pi atzineibys par lobu latgalīšu rokstu volūdu tyka jau catūrtū godu. Īprīškejūs divejūs godūs tys sajēme akcejis “Latvejis medeju volūdys bolva” veicynuošonys bolvys. Sovutīs 2023. godā, kod vēļ Vaļsts volūdys centrys atseviški reikuoja akceju “Latviešu valodas kvalitāte periodiskajā presē”, lakuga.lv tyka pi veicynuošonys bolvys ari tamā.