Rokstu sagataveja: portals lakuga.lv

Latgolys plānuošonys regions Interreg Latvejis–Leitovys programys projekta “Modernuos muokslys tehnologejis, kab attaiseitu muzejus inovacejom” laikā kūpā ar devenim Latgolys muzejim ir izstruoduojs tūs virtualuos turis, ar kū sevkurs interesents var īpasazeit mobilajā lītuotnē “Virtuālā Tūre”. Taipat dreizumā turis pīdzeivuot varēs ari kotra muzeja eipašumā tykušajuos virtualuos realitatis brillēs.

Virtualajā turē īspiejams apmeklēt Naujinis Nūvodpietnīceibys muzeju, Preiļu viesturis i lītiškuos muokslys muzeju, Ludzys Nūvodpietnīceibys muzeju, Viļānu Nūvodpietnīceibys muzeju, Leivuona stykla i amatnīceibys centru, Rotko muzeja Martinsona sātu, Bolvu Nūvoda muzeju, Kruoslovys nūvoda muzeju i Latgolys Kulturviesturis muzeju. Kotrys nu tūs pīduovoj īpazeit treis ekspoziceju zonys i desmit pošu muzeju darbinīku eipaši atlaseitus eksponatus latvīšu i angļu volūdā. Ari prīškmatu aprokstu sagataveišona bejuse pošu muzeju puorziņā.

Projekta vadeituoja Sarmeite Teivāne stuosta, ka teoretiski byutu vareiba lītuotnē pīvīnuot ari latgalīšu volūdys verseju, ka tam byutu finansialī i laika resursi. Taipat byutu juoprecizej ari juridiskys detalis, deļtuo ka projektā paradzāta tikai latvīšu literaruo i angļu volūda.

Latgolys muzeji virtualajai turei atlasejuši cīši daudzveideigus prīškmatus – nu mamuta zūba fragmenta, kas Latvejis teritorejā varātu byut tics Lada laikmata beiguos, i muola trauka suču, kas globoj līceibys par 3. godu tyukstūšu pyrma myusu erys, da modernu skulpturu, kū radejuse Latgolys parizīte Valentīna Zeile, i pasauļslovonuo keramika Pētera Martinsona izcylūs dorbu.

Lītuotnē eksponatus var pītyvynuot, izpieteit tūs detalis, kai ari puorbaudeit sovys zynuošonys nalelā viktorinā. Projekta eistynuotuoji pastreipoj, ka itei ir vareiba īpazeit muzeju ekspozicejis bez moksys, kai ari tur nūceju, ka turystim i saimem ar bārnim virtualuos realitatis pīredze liks piečuok nūbraukt ari iz pošim muzejim, kab īpazeitu tūs ekspozicejis kluotīnē.

Projekta vadeituojai Sarmeitei Teivānei vaicuojom, voi iz prīšku virtualuos turis varātu pasaruodeit ari pošu muzeju sātyslopuos, kas, īspiejams, byutu plašuokai auditorejai daīmamuoks veids. Itūšaļt tys naasūt īspiejams teiri praktisku i finansialu īmesļu deļ – vajadzātu atrast papyldu serveri, kur tuos turēt. Sarmeite atkluoj, ka lītuotne patīseibā jau ir variants, kai virtualuos turis padareit daīmamuokys, deļtuo, ka suokumā beja plānuots tik muzejim pīduovuot virtualuos realitatis brillis, kab tī varātu popularizēt sovu pīduovuojumu, pīmāram, turysma izstuodēs voi školuos. Taipat svareigs socialais aspekts – muzeji var aiznest brillis ari iz socialuos apryupis centrim i tai ļaut sovys ekspozicejis īpazeit cylvākim, kuri fiziski navar tuos apmeklēt voi tys jim ir cīši sarežgeitai. Sarmeite sūlej, ka dreiži Latgolys plānuošonys regions ari vaira informēs taišni par tū, kai Latgolys muzeji lītoj ituos virtualuos realitatis brillis.