Rokstu sagataveja: portals lakuga.lv

Sastdiņ, 25. aprelī, Rēzeknis Vaļsts 1. gimnazejā nūtiks skotivis runys konkurss “Vuolyudzāni” i vaļsts atkluotuo latgalīšu volūdys i kulturviesturis olimpiade. Par tradiceju 26 godu garumā palykušūs latgalīšu volūdys i kulturys populariziešonys pasuokumus organizej Latgalīšu volūdys, literaturys i kulturviesturis školuotuoju asociaceja sadarbeibā ar RTU Rēzeknis akademeju, portalu lakuga.lv, Rēzeknis nūvoda pošvaļdeibu, Latgalīšu kulturys bīdreibu, kai ari Rēzeknis Vaļsts 1. gimnazeju.

Latgalīšu volūdys, literaturys i kulturviesturis školuotuoju asociacejis vadeituoja Veronika Dundure pīzeist: “Skotivis runys konkurss “Vuolyudzāni” i atkluotuo latgalīšu volūdys i kulturviesturis olimpiade veicynoj jaunīšu gribiešonu vuiceitīs latgalīšu volūdu, izzynuot sovu nūvodu. Latgalīšu volūda ir latvīšu volūdys paveids, daudzus godu symtus tei paleidzēja saglobuot latvyskumu Latgolā puorkrīvuošonys i puorpūļuošonys laikā.”

Eiropys Parlamenta (EP) deputate prof. Inese Vaidere ir ituo pasuokuma patronese. Jei olimpiadis uzvarātuoju komandai, kai ari runys konkursa uzvarātuojam vydsškolys klašu grupā duovuos braucīni iz Briseli. EP deputate pastreipoj: “Latgalīšu volūda ir svareiga latvīšu nacionaluos identitatis sastuovdaļa, kas kūpama, sorgojama i nūdūmama paaudzem iz prīšku. Pa munam, ari školā zynomu laiku byutu juoveļtej myusu dialektim, kam tī ir miļzeiga boguoteiba. Aicynoju saimis Latgolā sātuos runuot latgaliski, tod kotrys Latgolys bārns sūpluok latvīšu volūdai labi runuos latgalīšu volūdā.”

Skotivis runys konkursa mierkis ir styprynuot nacionalū identitati, veidojūt izpratni par latgalīšu autoru vuorda muokslu, latgaliski raksteita teksta vierteibu, izteiksmeibu, i izkūpt latgalīšu volūdu. 25. aprelī skotivis runys konkursā pīsadaleis 76 školāni nu 34 Latgolys izgleiteibys īstuožu.

Atkluotuos latgalīšu volūdys i kulturviesturis olimpiadis mierkis ir školu jaunuotnis vydā popularizēt Latgolys kulturys montuojumu i veicynuot kulturys vierteibu i izcyluokūs nūvadnīku apzynuošonu. Itūgod, 25. aprelī, olimpiādē pīsadaleis ostonis vydsškolānu komandys nu Baļtinovys vydsškolys, Kuorsovys vydsškolys, Kruoslovys Vaļsts gimnazejis, Ludzys piļsātys vydsškolys, Nautrānu vydsškolys, Rēzeknis Vaļsts 1. gimnazejis, Reigys Vaļsts 2. gimnazejis i Viļānu vydsškolys. Olimpiade nūtiks pīcuos kuortuos, kuruos jaunīši atsaceis iz 20 vaicuojumim Latgolys kulturtestā, paruodeis latgalīšu rokstu volūdys prasmis i zynuošonys par izcylom Latgolys kulturys personeibom – Fraņci Kempu i Ontonu Rupaini –, kai ari par portala lakuga.lv 2026. gods marta publikacejom.

Veronika Dundure pastreipoj, ka, jamūt vārā, ka latgalīšu rokstu volūda školā nav obligats vuiceibu prīškmats, bet tū vuicuos fakultativa voi interešu puļceņa nūdarbeibuos, itī pasuokumi nūstyprynoj izpratni par latgalīšu rokstu volūdu kai svareigu latvyskuos identitatis daļu, roda izgleitojamūs interesi par latgalīšu volūdu i kulturviesturi.  

Pasuokumu atbolsta latgalīšu kulturys kusteiba “Volūda” ar gruomotu duovynuojumu, z/s “Kotiņi” ar sovu produkceju, žurnals “A12”, Saeimys deputate Anna Rancāne ar 50 eiro naudys bolvom divejim lobuokajim skotivis runys konkursa dalinīkim, Latvejis Universitatis profesore Lideja Leikuma ar bolvu olimpiadis uzvarātuojim.