Rokstu sagataveja: portals lakuga.lv

Maijs vysod īsasuoc ar svātkim – Dorba svātki, Latvejis Republikys Satversmis sapuļcis sasaukšonys dīna i Latvejis Republikys Naatkareibys atjaunuošonys dīna – i itūgod maja suokuos Ludzys nūvoda Malnovā gaidoma vīna nu “pyrmais Latgolā” nūtikšonu, deļtuo īsacejumus itūreiz sagatavejuse vīna nu marketinga i komunikacejis studejis “Sistering” dybynuotuoju, sporta kluba “Kuorsova” dalineica – Marta Vuorkale (Vorkale).

Maja suokšona ar puorguojīni

Pavasars ir puoguojīnim boguots laiks. Maņ pošai vaira tik bīži nasaīt pīsadaleit, bet ar prīcu verūs kai iz tim, kas pīsadola, tai iz tim, kas organizej. Pīktdiņ, 1. majā, puorguojīņu uzjāmums “Spectūrisms” aicynoj sovā 400. puorguojīnī i taišni iz Latgolu – Leiksnys i Vabalis apleicīni. Taipat Rēzeknis nūvodā pa Feimaņu pusi 3. majā byus puorguojīņs “Rēzeknes novada DEBESPUSES”. Bet munā, Kuorsovys pusē, drupeit vāluok – 9. majā – byus Latgolys puorguojīņu dīnu Azaru stygys 2026. gods pīdzeivuojumu 1. serejis puorguojīņs.

Pyrmais profesionalais disku golfa parks Latgolā

Sporta klubs “Kuorsova” napaseņ attaisejuši disku golfa parku “Malnova” ar divejim laukumim – 9 grūzu “Muiža” i 18 grūzu “Zīdūņs”, kas atsarūn Malnovā, Ludzys nūvodā, i ir pyrmais profesionalais disku golfa parks Latgolā. 2. majā plānuota oficiala parka atkluošona, kur meistarklasi vadeis disku golfa treners Rolands Bergs nu Reigys, byus cīnuošona ar zupu i ari vareiba tikt pi disku. Pasuokums byus pīmāruots kai īsuociejim, tai i pīredziejušim spālātuojim – drūsai var īt ar saimi i draugim. Bet pi reizis gribīs izstuosteit, ka 9. majā parkā uzjimsim pyrmūs gostus saceņseibuos, kas byus pyrmuos nacionaluo leimiņa saceņseibys i reizē pyrmī lelī mači pi myusu. Tys ari īzeimuos parka atteisteibys suokumu.

Vaļsts svātki ar saimi

Maja svātku nedeļā es nikai navaru naīsaceit pavadeit laiku kūpā ar saimi voi draugim jeb byut sovā foršuokajā burbulī i atzeimuot vaļsts svātkus. Mes kotru godu lauku sātā kluojam boltu goldautu, sabrauc kūpā vysa saime, fonā skaņ Latvejis Radeja i spieļojam duorza spēlis. Vītai nav nūzeimis, golvonais ir kūpā byušona, lapnums i pateiceiba. Nūviertejam tū, cik mes naatkareigi varim byut sovā vaļstī!