Rokstu sagataveja: portals lakuga.lv

Jau trešū godu piec kuortys vosorys suokuos Daugovpilī sasatiks vairuoki profesionalī teatri i ar daudzveideigu i boguoteigu programu īvadeis piļsātys svātku nūtikšonys. “Teatra festivals Nr.5” nūtiks nu 31. maja da 4. juņa, pīduovojūt septenis izruodis, tymā skaitā vīsizruodis nu Igaunejis i Itālejis. Daugovpiļs teatris itūgod festivalā pīduovuos izruodi bārnim “Plykspuorneiša puorsacenis”, kurā ir vareiba īpazeit latgalīšu puosoku pasauli i īsavuiceit jaunus vuordus latgaliski.

Taipat kai īprīškejūs godūs festivala programā īkļautys na tik izruodis, bet ari sarunys ar skateituojim i profesionaļu diskusejis par nūzarē aktualom temom. Itūgod festivalā ir i puora jaunīvadumu – skateituojus sagaida gruomotys i lugu skaitejumi, taipat programa papyldynuota ar praktiskim seminarim skotivis muokslu profesionalim.

31. majā festivalu atkluos Daugovpiļs teatra izruode tuo jaunuokajim skateituojim “Plykspuorneiša puorsacenis”, kura da šam vasta izbraukumūs iz školom Latgolā. Itūreiz na klasis telpā, tok teatra muokslinīku darbneicā bārni kūpā ar izruodis varūnim Voguleņu i Plykspuorneiti varēs īpazeit latgalīšu puosoku pasauli i īsavuiceit vairuokus latgalīšu vuordus i frazis. Izruodi īsoka skateituojim nu 6 da 9 godu vacuma.

Daugovpiļs teatra puorstuove Janīna Ivanova nūruoda, ka, veidojūt festivala programu, teik dūmuots par tū, kab apgiutu piec vareibys plašuoku interesentu lūku, tymā skaitā bārnu auditoreju. “Mums ir svareigi, kab festivala programā byutu ari izruodis bārnim. Taipat grybātūs, kab festivalā byutu taidys izruodis, kurys ir ar koč kū eipašys, varātu saceit – ekskluzivys –, i parosti nav daīmamys Daugovpiļs teatra auditorejai. Partū Daugovpiļs teatris sasprīde pīduovuot skateituojim unikalu vareibu nūsavērt itū izbraukuma izruodi “Plykspuorneiša puorsacenis” itepat, teatra telpuos,” tai teatra puorstuove.

Festivala programā īkļauta ari laikmeteiguos dejis kompanejis SIXTH i Gertrudis īlys teatra sadarbeibā radeituo izruode “Brīvprātīgā verdzība”, Noto teatra “Tina Di Lorenzo” nu Itālejis īstudiejums sicilīšu volūdā “Alla Furca”, Dirty Deal teatro izruode-ceremoneja “Vecajo kults”, Latvejis Nacionaluo teatra izruode “Ko var cilvēks”, Latvejis Leļu teatra izruode “Sibīrijas haiku” i Tallinys Sidalinnys teatra izruode “Es atstāju Ukrainu 2022. gadā”. Piec kotrys izruodis skateituoji ir aicynuoti pīsadaleit sarunā ar tuos veiduotuojim i dalinīkim, kab daleitūs īspaidūs par radzātū i aizdūtu piec izruodis nūsavieršonys rodušūs vaicuojumus.

Jaunums itūgod ir gruomotys i lugu skaitejumi. Iz sasatikšonu aicynuos akters Gundars Ābuoliņš (Āboliņš), kurs Daugovpiļs teatra kopejneicā skaiteis Joahima Meierhofa romana “Ak, šī plaisa, sasodītā plaisa” fragmentus, sovutīs Vīneibys noma kopejneicā varēs nūsaklauseit dramaturgejis skaitejumus nu cykla “Sekss un Latvija”.

Festivala laikā nūtiks ari diveji praktiskī seminari skotivis muokslu profesionalim. Par Greenstage SAPA reiku organizacejis ilgtspiejis nūviertiešonai stuosteis Rihards Gāle, bet par iztielis krizi i tuos puorvariešonu – Matīss Kaža. Byus ari diskuseja par krizi teatrī i pasaulī, kurū vadeis Henrieta Verhoustinska.

Itys festivals ir vairuoku teatru sadarbeibys auglis, i tuo mierkis ir pīduovuot myusdīneigu teatra muokslu i daudzveideibu vītā, kur tei kasdīnā nav plaši puorstuovāta. Tī ir i kūpā saīšonys svātki teatra radeituojim i skateituojim. Ari itūgod namaineigs palīk festivala sauklis “Latgola ir tyvai”. Tys atguodynoj i festivala gostim, i regiona dzeivuotuojim, ka Latgola nav kaida nasasnādzama vīta Latvejis voi Eiropys kontekstā. I festivals tū aplīcynoj praksē, kotru godu puļcejūt vys vaira teatru i paplašynojūt dalinīku geografeju.