Rokstu sagataveja: portals lakuga.lv

Sastdiņ, 23. majā, jau 22. reizi Latvejis muzeji i cytys sabīdryskū dzeivi veidojūšys organizacejis svieteis Muzeju nakti, pīduovojūt vysaiduokys bezmoksys nūtikšonys. Ituo gods Muzeju nakts vīnojūšuo tema “Prīškmata pīdzeivuojumi” sasasauc ar Raiņa atziņu, ka “ari lupats reiz bij’ goda kreklis,” atguodynojūt, ka sevkuram prīškmatam ir sovs stuosts i vierteiba. Latvejā pasuokumi nūtiks vaira nakai 246 vītuos, nu tūs 39 byus Latgolā. Kab naapsamaļdeitu daudzveideigajā pīduovuojumā, portals lakuga.lv pīduovoj sovu latgaliskū Muzeju nakts nūtikšonu izlasi, tok ar vysu programu var īpasazeit ITE.

Posta i sakaru stuosti Maltā

Rēzeknis nūvoda Maltys viesturis muzejs ituo gods Muzeju naktei izalasejs temu ap zyrgu postu, postu i sakarim. Jau nu 13 stuņžu muzeja uora ekspozicejā varēs apsavērt zyrgviļkmis braucamreikus i tūs pīdarumus. Juoņs Prančs vyzynuos bārnus zyrga aizjiugā pa Parka īlu, pastuosteis, kai aizjiudz zyrgu, kaida lūma ir kotrai aizjiuga detaļai. Taipat paraleli pošā muzejā apmaklātuojim byus daīmama ituos šaļts aktualuo izstuode – taišni ap posta i sakaru jūmu.

Pasuokuma vokora daļu 18 stuņdēs muzeja telpuos atkluos Māris Rumaks ar lekceju par posta i zyrgu posta prīškmatu stuostim. Sovutīs Muzeju nakts turpynuojums paradzāts jau cytā Maltys vītā – nazkodejuos Zyrgu posta stacejis pogolmā. Tī 20. g. s. suoku viesturyskūs drēbu mūdi i tuo laika savīseiguos dejis paruodeis Lūznovys muižys kadriļu deju grupa “Lūznovys kadriļs”, bet piečuok skaņu i kusteibu mejīdarbeibu atkluos Dana Vasiļjeva i Mafalda Garsija performancē “Attālums nav tālums”.

Stuosti, tradicejis i sasatikšonys Vabalē

Skryndu dzymtys muzejs Augšdaugovys nūvoda Vabalē itūgod svietej 30 godu jubileju, kam veļteita ari Muzeju nakts pasuokumu programa. Nūtikšonu atkluos Ambeļu pogosta folklorys kūpa “Speiga” i Vabalis pogosta etnografiskais ansamblis “Vabaļis”. Apmaklātuojim byus vareiba pīsadaleit vairuokuos meistarklasēs: Andris Kačkāns vuiceis skolu peišonu, Ingrīda Kokina – mandalu zeimiešonu, bet Leiksnys sīvīšu apvīneiba “Saules taka” vadeis kulinaruos meistarklasis. Pasuokuma laikā tiks atkluota ari Inesis Minovys fotoizstuode “Pat zirgam jāsmejas”, kai ari varēs īpasazeit ar muzeja prīškmatu stuostim videoīrokstūs.

Napabeigta glezna ar karūgu, vāzi i kengura uodu Rēzeknē

Latgolys Kulturviesturis muzejs Rēzeknē itūgod Muzeju nakts nūtikšonom devs naparostu nūsaukumu “Nepabeigtā glezna ar karogu, vāzi un ķengura ādu”. Pasuokums tiks atkluots ar Juoņa Ivanova Rēzeknis muzykys školys audziekņu muzykalū prīšknasumu. Nu 19.30 stuņžu da pušnakšu bez moksys varēs apsavērt muzeja ekspozicejis i izstuodis. Paraleli tam byus tematiskuos aktivitatis – Latgolys keramikys vacmeistara Andreja Paulāna vāzis stuosts, 109 godus vacuo karūga pīdzeivuojumi, varēs izzynuot, kai Australejis kengura uoda tyka muzejā, taipat Zemissardzis 3. Latgolys brigadis 32. kuojinīku bataļjons īpazeistynuos ar sovu prīškmatu stuostim. Bārnim tiks pīduovuota jaunūs pūdnīku darbneica i vareiba īsavuiceit senejuos kaitys i rūtalis. Vokora gaitā gaidoma ari Latvejis Muokslys akademejis Latgolys filialis studentu performance “(Ne)pabeigtā glezna” i deju studejis “Stoptime” prīšknasumi.

Teatris, muoksla i muzyka Ludzā

Ludzys Nūvodpietnīceibys muzejs jau tradicionali Muzeju naktī pīduovoj nūsavērt kaidu teatra izruodi – itūreiz amaterteatra “Isnauda” jaunuokū īstudiejumu “Kolhoza stuosti”. Piečuok tiks atkluotys divejis jaunys izstuodis – vīnā apsaverami J. Soikāna Ludzys muokslys školys absolventu dorbi, ūtrā – senejuos rūtaļļītys. Vokoru nūslēgs grupys “Marysana” koncerts. Vysu pasuokuma laiku apmaklātuoji varēs ari nūpierkt soldonus gordumus i blīnus, kai i pīsadaleit rodūšajuos darbneicuos.

Veļneņu pīdzeivuojumi Juosmuižā

Raiņa muzejs Juosmuižā itūgod aicynoj iz veļnišku nakti, kas veļteita keramika Ontona Šmulāna dailradei. Rodūšajā darbneicā apmaklātuoji varēs sataiseit poši sovu veļneņu, apsavērt ekspresizstuodi “Māla velniņu salidojums” i nūsavērt režisora Arnolda Burova 1971. godā uzjimtū kinu par Šmulānu “Ragainais māls”. Da pušnakšu bez moksys varēs apsavērt ari Latgolys keramikys ekspoziceju, aktualuos izstuodis i Raiņam veļteitū ekspoziceju.

Senejī latgaļu bolsi Lubuonā

Latgalisku vokoru Muzeju naktī varēs pīdzeivuot ari uorpus Latgolys rūbežu – Modūnis nūvoda Lubuonā, Bronislavys Martuževys Dzejis klietī i duorzā. Vysaiduoku nūtikšonu, kai dzejis i prīškmatu stuostu i dzejis pužļu likšonys, vydā gaidoms ari Birutys Uozuolinis (Ozoliņas) trio nakts koncerts “Senie latgaļu bolsi”. Vokora nūslāgumā varēs nūsavērt Zigurda Vidiņa dokumentalū kinu par Bronislavu Martuževu – “Gaismas lāse”.