Rokstu sagataveja: portals lakuga.lv

Pavasara golā pi skaiteituoju tics jau dasmytais Cybuļu Jura sastateitais jūku i anekdotu kruojums, kuram dūts nūsaukums “Dzeršonu bez smīklu navā!”. Itūreiz Cybuļu Juram pi jūku pīraksteišonys tolkā guojuši Krakopu Zintis, Krapacu Ļuce i Linužu Jurs, kuri gruomotys serejis cīneituojim jau ir zynomi nu īprīškejūs izdavumu, sovutīs vuoka autors tradicionali ir Slyšanu Prancs.

Jurs Cybuļs da ituo sastatejs i izdevs deveņus jūku i anekdotu kruojumus: “Īdzer veina, lai dzeive ira feina!” (1999), “Īdzer ols, lai bāduom ira gols!” (2015), “Ka dzersi šnabi, moš byus labi!” (2017), “Ka samagonka goldā, to prīca apleik volda!” (2019), “Byusi vasals!” (2020), “Vieļ pa vīnai i da dybuna!” (2021), “Groznuo kuorta” (2023), “Ai kū saslymi, ai tū juozaārstej” (2024) i “Īdzersem iz celekuojes!” (2025). Leluokajai daļai nu tūs leidzautori bejuši ari Krapacu Ļuce (Aina Korkla) i Krakopu Zintis, sovutīs Linužu Jurs jau pīsadalejs gruomotys “Byusi vasals!” taiseišonā.

Jaunuokuo izdavuma īvodā Cybuļu Jurs roksta, ka dasmytuo gruomota ir par vysu tū pošu, kas īprīškejuos. Kūpejais asūt dzeršona i smīkli. Jurs ari apkūpuojs informaceju par tū, kai smīkli paleidz veseleibai, taipat pasadola sovuos atmiņuos par “dzeršonom” kai nazkod juo pusē saukta sevkura sviniešona. Skaiteituoji teik izgleituoti ari par vysaidim interesantim nūdūklim, kas nazkod pasaulī tykuši pīmāruoti, i ari ateju viesturi. Taipat interesantys ir juo puordūmys par Latgalīšu kulturys goda bolvys “Boņuks 2025” ceremonejā dzierdātū jiedzīni “naškeistuo samaņa”, kuo golā ari īsacejums influencerus latgaliski saukt par duracietuojim. Natryukst ari Cybuļu Jura atlaseitu anekdotu i, kai izaver, nu škārsteikla puorpublicātu karteņu, kam na vysod ir dalyktys atsaucis. Taipat nav eisti saprūtams, deļkuo gruomotā bez saskaņuošonys puorpublicāta Cybuļu Jura sarakste ar Latgolys Turysma asociacejis puorstuovi, kū nūteikti par jūku voi anekdotu navar nūsaukt.

Krakopu Zintis īrostai gruomotā īpazeistynoj i ar anekdotim, i gadīnim nu dzeivis. Taipat jis nadamierst paviesteit ari par aktualitatem sovā muzykanta karjerā, kurā eipaša nūtikšona pārņ bejuse pīsadaleišona grupys “Unknown Artist” videoklipā “Rika tak”. Krapacu Ļuce turpynoj viesteit par pīdzeivuojumim sovā dorbā spēļu zālē, kai ari pasadola ar cytim gadīnim nu dzeivis. Taipat jei, leidzeigai kai īprīškejā izdavumā, nu krīvu volūdys puortulkuojuse i lokalizējuse ari vairuokus skeču scenarejus. Linužu Jurs vaira pīrakstejs poša pīradzātūs voi dzierdātūs gadīņus, tok pa vydu pīfiksāts ari kaids vyspuoreiguoks anekdots.

Namaineigi kotrys autors sovus jūkus rakstejs taidā volūdā, kaidā pats runoj. Jurs Cybuļs jau īprīšk par tū rakstejs: “Teksti ira autoru dzymtejā volūdā, tys ira, muotes voi tāva volūdā. Nav gadejīs dzierdiet, ka kuods byutu sacejs, ka jis runoj sova tāva voi muotes dialektā voi izlūksnie. Kuo raksteits pyrmuos jūku gruomatas īvodā, bez muotes volūdas cylvaks ira garīgi nabags.”