Anna Laicāne (1984) par sovu dorbu kolekceju izstuodē “Dīķis un citi stāsti” soka: “Byušona dobā – mytruos vītuos, pi muorku i azaru raisa atminis par bierneibā skaiteitū Keneta Greiema gruomotu “Vējš vītolos”. Stuosts par pīdzeivuojumim i simbolisku ceļu, kas pīduovoj izjust bailis, skumis i patīsu prīcu. Tys paredz sasatikšonu ar napazeistamū, sovaidū, i nav cyta veida, kai pīredzēt, kai tik dūtīs iz prīšku. Ari animacejis kina “Ezītis miglā” naapšaubami ir atstuojuse sovu nūspīdumu pasauļa uztverē. Tamā atspīgeļuots ceļš i draudzeiba, pi kurys teik, puorvarūt gryuteibys. Kai ari skaistums i ļaušona nūtikt, ka reiz gols ir kluotyn.”

Anna Laicāne studējuse gleznīceibu Latvejis Muokslys akademejā, absolvējuse Rēzeknis Muokslys i dizaina vydsškolu. Nu 2004. goda sareikuojuse divpadsmit personalizstuodis Latvejā, Dānejā, Portugalē. Aktivi pīsadola plenerūs i simpozejūs. 2016. godā struoduoja muokslinīku rezidencē Escola – Estúdio RAIZVANGUARDA, Bordeiro, Portugalē. Dorbi atsarūn Azerbaidžanys viestnīceibā Latvejā, Luciano Benetton “Imago Mundi” kolekcejā, Latgolys Kulturviesturis muzejā Rēzeknē, Ventspiļs muzeja kruotivē, kai ari privatkolekcejuos Latvejā, Leitovā, Dānejā, ASV, Vuocejā, Zvīdrejā, Anglejā, Fraņcejā, Gruzejā.