Catūrtdiņ, 22. janvarī, 16 stuņdēs Latgolys Centralajā bibliotekā (Daugovpilī, Reigys īlā 22A, 2. stuovā) nūtiks gruomotys “Upe. Cilvēks. Mājas. Daugavpils 750. gadskārtā. Apkaimes” attaiseišonys pasuokums.

Īspīddorbs radeits par gūdu Daugovpiļs 750 godu jubilejai i veļteits piļsātys apleicīnem, tūs viesturei, cylvākim i attīceibom ar vidi, eipaši – Daugovai kai piļsātys identitatis kūdulam. Tuo saturu veidoj 25 stuosti, kotrys ir veļteits kaidai konkretai apleicīnei.

Gruomota pīduovoj daudzsluoņainu skotu iz Daugovpili kai dzeivu, maineigu telpu, kurā sasateik upe, cylvāks i sātys. Izdavumā apkūpuoti pietnīku, kulturys darbinīku i vītejūs dzeivuotuoju stuosti, viesturyskī fakti, fotografejis i personeigys līceibys, kas atkluoj Daugovpiļs apleicīņu sovpateibu i nūzeimi piļsātys kūpejā atteisteibā.

Izdavumu “Upe. Cilvēks. Mājas. Daugavpils 750. gadskārtā. Apkaimes” veiduojs autoru kolektivs, kas ir cīši saisteits ar myusu dīnu Daugovpiļs dzeivi: viesturnīks Henrihs Soms (golvonais redaktors), filologe Vilma Šaudiņa, arhitekte Inguna Kokina, biologs Pēteris Evarts–Bunders, dizainers Ernests Mucenieks, apleicīņu aktiviste Inga Belousa, filologi–tulkuotuoji Valentins Lukaševičs i Inga Makrecka, fotografi Andrejs Jemeļjanovs i Margarita Vigule.