Rokstu sagataveja: portals lakuga.lv

Šūreit, 3. martā, latgalīšu grupa nu Daugovpiļs – “Dabasu Durovys” – publiciejuši jaunu dzīsmi ar nūsaukumu “Alkimeja”. Tei stuosta par sajiutom, kas cytureiz puorjam gondreiž sevkuru.

Dzīsmis “Alkimeja” aranžejā i īrokstā pīsadaleja grupa “Dabasu Durovys” ci Aleksandrs Tamans, Valdis Rundzāns, Romāns Sladzis i Arņs Slobožanins, kas ir ari muzykys i teksta autors. Tausteņinstrumentus īspēlēja Einārs Lipskis. Miksēja Armands Treilihs.

“Ir reši puori, kurim saīt nūīt kūpeigu ceļu vysa myuža garumā. Cyti īt kūpā tikai pusi ceļa, kaids tikai eisu šaļti. Cytim naizadūd nimoz, tok vēļ kaids pat narauga suokt, koč ari par sevi līk maneit labi zynomuo sajiuta, kura dzīsmē nūsaukta par alkimeju,” tai Arņs Slobožanins. Jis ari darunoj, ka jaunuo dzīsme drupeit atsaškir nu tūs dzīšmu, kurys grupa publicējuse aptyvai pādejūs septeņu godu laikā, kam jaunuo dzīsme ir vaira fankroka/poproka stylā. Tei drupeit valk iz britu muzykys skanejumu, kurs, Arņa vuordim runojūt, grupai beja izkūpts ap 2016. godu i beja grupys klasiskais skaniejums.

Videoklips ir fiļmāts Daugovpiļs Kulturys pilī. Fiļmēja i montēja Ivars Utināns. Video radzamī bārni ir daugovpilīši – Evereka Bondere i Kristens Muižnieks. Vēļ papyldynojūt par klipu, Arņs soka, ka tys, kas nūteik aizskotivē kai koncertūs, tai dzeivē, ir vīna līta, bet tys, kū koncertūs radz apmaklātuoji – cyta.

Tyvuokuos šaļts, kod varēs dzierdēt grupys “Dabasu Durovys” skaniejumu ir 22. aprelī Latgolys viestnīceibā “Gors”, kur nūtiks TV3 Latvejis Republikys Naatkareibys atjaunuošonys godadīnai veļteits koncerts. Taipoš grupa uzastuos ari Rēzeknis nūvoda Lūznovys muižys “Muokslys piknikā” 11. julī, kai ari 31. julī Rēzeknis piļsātys svātkūs.