Grupys “Raxtu Raxti” i “Sinfonietta Rīga” koncerts
Līpuojis koncertzālis pavasara sezonys nūslāgumā iz leluos skotivis varēs pīdzeivuot eipašu mageju, kū veiduos mejīdarbeiba tautys i akademiskuos muzykys vydā – grupa “Raxtu Raxti” i kamerorkestris “Sinfonietta Rīga” dirigenta Normunda Šnē vadeibā. Kūpeigajā koncertprogramā skanēs grupys “Raxtu Raxti” skaistuokuos dzīsmis jaunūs aranžiejumūs, kurūs radejs Emīls Zilberts.
Vaļsts kamerorkestris “Sinfonietta Rīga” vysod bejs atvārts sadarbeibai ar naakademiskuos jūmys muzikim, paplašynojūt muzykys jūmu rūbežus i rodūt jaunatkluojuma prīcu. Grupys “Raxtu Raxti” muzyku raksturoj profesionals i izjusts izpiļdejums, degsme i nasabeišona eksperimentēt ar vysaidim tautys instrumentim, kas daudzom labi zynomom dzīsmem pīškir pavysam jaunys kruosys.
Muzykalū darbeibu “Raxtu Raxti” aizsuoce ar Imanta Kalniņa dailradi, izspielejūt tū tautys muzykai rakstureigā skaniejumā. Koncertā varēs dzierdēt Imanta Kalniņa dzīsmis “Karsta mana jauna dziesma”, “Rakstu raksti”, “Zanes dziesma” i cytys. Grupa ari naatsluobstūši izzynoj tautys muzyku i latvyskuos vierteibys, rodūt myusdīneigys i uzrunojūšys kompozicejis, kas uzluodej ar energeju i dzeivis gudreibu. Programā skanēs ‘‘Raxtu Raxtu’’ dzīsmis – “Pūt, vējiņi”, “Rūtoj saule”, “Ai, saulīte, mēnestiņi” i cytys.
Itūšaļt apvīneibā “Raxtu Raxti” muzicej Kristīne Kārkle-Kalniņa (bolss, vejūle, kūkle), Marts Kristiāns Kalniņš (bolss, harmonejis, klavīris, stabulis, oboja), Edgars Kārklis (bolss, akordeons, dūdys, stabulis), Armands Treilihs (basgitara), Artis Orubs (sytaminstrumenti), Ilze Grunte (gitarys, arfa, mandolina).
