Latgolys keramiki Olga i Valdis Paulini dzeivoj i struodoj Kruoslovā, dorbojās Kruoslovys amatnīceibys centrā, ir populari meistari vysā Latvejā. Jūs keramikys darbneica ir attaiseita interesentim i turistim, pīduovojūt i vysaidu formu trauku kluostu, i paraugdemonstriejumus, i saiminīka humora pylnū i atraktivū stuostejumu. Rodūši struodojūt i vys vēļ eksperimentejūt ar apstruodis tehnologejom, trauku i dekorativuos keramikys rūtuojumim, obeji autori palīk uzticeigi Latgolys pūdnīceibys tradiceju naizsmeļamajam olūtam. Nareši pošu rūkom teik izrokts i sagataveits Daugovys muols, kas puortūp svečturūs, pūdūs, vāzēs, servizēs i škeivūs. Apstruodis procesā daudzkuort rūku apgluosteiti, keramikys dorbi rūn ryudejumu apdadzynuošonys ceplī, kab tyktu iz saimis golda, prīcynuotu svātku reizē voi izstuodē. Ar itū boguoteigū i daudzveideigū izstuodi Valdis itūgod svietej sovu 60. dzimšonys dīnu, 45 godus – kūpā ar muolu i 35 godus – dorbuošonūs keramikā kūpā ar dzeivisbīdri Olgu.