Goda viesturiskuokīs pasuocīns – Muzeju nakts – ītūgod nūtyka ar jaunu uzstuodejumu – sābri. Muzeji i muzeju sābri sapierka kopeju i vēre valī durovys vokora pusī, lai dorba tauta i intelektualuo jaunatne varētu pasavērt, kaidi breinumi (i hlami) godim ejūt kurā muzejā savuokti.
Kur muzeju sābri, tī i LU, a kur LU, tī – LgSC. LU izdūmuoja attaiseit sovys durovys tūpūšīm studentim i paruodeit, kū tī lobu var vuicētīs i ar kū lobu breivū laiku varātu aizpildeit – korporaceju beja sasalasejs navuoji daudz – dzīduo vīnā boltā gobolā tai, ka vyss Raiņa buļvars treiceja i drebeja (i LgSC breivpruoteigajim beja juoklīdz, kab sovim interesentim par bīdreibu pastuosteitu).
Kū tod LgSC tī drareja? Nu eistineibā dancynuoja apmaklātuojus iz Zyrga deča, kas nu pīduovuotuo beja popularuokuo atrakceja – sovus spākus i lūkaneibu daudzi gribeja puorbaudeit, i saguoja labi. Juosoka gon, ka spālātuojim vīgļuok beja īnimt joga cīneigu pozu nakai sovim spākim atrast raudivi, prasu, mārgu, stuņdinīku, lepetnīku ci vušku iz Zyrga deča. Bet deļ tam jau mes tī bejom, lai nastu gaismu pasauļam.

Foto nu Latvejis Universitatis arhiva
Tai caur kaitom LgSC stuosteja par sevi. Beja viktorina, beja jūki, beja volūda, beja ari čajs i capumi. Prauda – apmaklātuoju vareja byut vaira – vysi pa muzejim rozkleiduši, i izavēre, ka LU Sāta nav tys popularuokīs objekts – golu golā – napylngadeigīm tik vālai iz īlys eisti byut navar, leidz ar tū puorsvorā pa fakultašu i organizaceju prezentacejom kleida tī poši studenti.
Juorauga moš cytu godu Tonis biroja durovys iz itū pasuocīni taiseit valī – golu golā – tān tī ir tik daudzi monta, ka tys iz muzejs-biblioteka-veikals-izgleiteibys centrs-atpyutys komplekss. Vyss vīnā kabūzeitī. Par kū ta nā?

Kristonka*

* Ari iz prīšku raudzeisim, kab piec pasuocīnim kaids nu LgSC aktivistim pīraksteitu sovu redzīni par aizvadeitū nūtykumu i tāņ ar sovu pasadaleja Kristīne.