Izguojuse pādejuo Ontona Slišāna gruomota bārnim

2011. goda 28. decembrī dzejnīks, publicists, folklorys vuociejs i pietnīks, kulturys darbinīks Ontons Slišāns svynātu 63. dzimšonys dīnu. Ir paguojs gods nu šaļts, kod Ontona Slišāna vaira nav storp myusim. Tik daudzi, cik Ontons izdareja vīns pats sovys dzeivis laikā, myusim vysim, apkūpojūt spākus, ir juoturpynoj dareit kūpā.

Goda nūslāgumā 28. decembrī tyka atzeimāta Ontona Slišāna dzimšonys dīna, snīdzūt atskaiti gon Ontonam, gon myusim pošim, kū asam padarejušs goda laikā, kab turpynuotu Ontona Slišāna īsuoktūs dorbus folklorys, viesturis pieteišonā i namaterialuo kulturys montuojuma populariziešonā.

28. decembrī Upeitis Tautys nomā nūtyka Ontona Slišāna 14. gruomotys bārnim „Labi, ka labi” prezentaceja. Gruomotys izīšonu atbaļsteja Vaļsts kulturkapitala fonda Latgolys kulturys programma. Vileks nūvoda dūmis prīšksādātuojs Sergejs Maksimovs, pīsadolūt gruomotys prezentacejā, atzyna, ka pyrmū reizi pīsadola gruomotys prezentacejā, kurys autora vaira nav itymā pasaulī. „Ontons deve lelu īguļdejumu munā sirdī, munā darbeibā. Ontons ir vīns nu tim nadaudzajim dzejnīkim, kurs saprota sovu miseju. Jis deve nūruodejumus i vierzīni gon mums – politikim, gon vysai tautai, iz kurīni mums byutu juosatīc i kaidys ir myusu pamatvierteibys. Jis napuormete, jis nūruodeja, kū mes darejom pareizi, i nasakautreja aizruodeit iz tū, kū mes darejom napareizi. Napuorspiejama ir Ontona ideja, ka jaunuo gruomota „Labi, ka labi” dūs īspieju bārnim vuiceitīs na tik skaiteit latgaliski, bet ari guoduot latgaliski. Folkloru navar ītierpt vuordūs, tū var just i puordzeivuot – voi „Upeitis Uobeļduorzā”, voi kod dzīd Upeitis, Škilbanu, Latgolys sīvys i veiri, tik tod mes saprūtam, kas ir folklora,” puordūmuos dalejuos S.Maksimovs. Vileks nūvoda dūmis prīšksādātuojs atzineigi nūviertieja ari Ontona Slišāna saimis īguļdejumu dzejnīka ideju turpynuošonā, pasateice Andrim Slišānam par uzjiemeibu izdūt jaunū gruomotu i vielēja turpynuot Ontona īsuoktūs dorbus, kab vuoktu i apkūpuotu folkloru i latgalīšu tradicejis.

Ari Škilbanu pogosta puorvaļdīnks Andris Mežals pasateice Slišānu saimei par īguļdeitū dorbu i uzjiemeibu turpynuot Ontona Slišāna dorbus. „Kū vaira paīt laika, tū vaira mes saprūtam, ka juo pītryukst arviņ vaira. Juo pītryukst na viņ saimei, na viņ Upeitei i Škilbanu pogostam, bet ari Latgolai i Latvejai. Ontons Slišāns vēļ ilgi, ilgi paliks myusu atmiņuos,” saceja A.Mežals.

Upeitis Tautys noma vadeituojs Andris Slišāns īpazeistynuoja pasuocīņa dalinīkus ar vysom Ontona Slišāna gruomotom, kas izguojušs bārnim. Dīvam žāļ vīneiguo autora pasaulī, kurs raksteja ailis bārnim latgaliski, itei gruomota – „Labi, ka labi” – byus pādejuo, itymā gruomotā izdūti vysi Ontona Slišāna saraksteitī dzejūli bārnim. Deļtuo Andris Slišāns aicynuoja tūpūšūs dzejnīkus raksteit dzeju bārnim latgaliski. Ontona Slišāna savuoktuo i apkūpuotuo materiala pīaugušajim gon byušūt vēļ vairuokom gruomotom.

Jaunuo, kruosainuo gruomota „Labi, ka labi” ir dūmuota bārnim, kuri suoc vuoceitīs skaiteit. Kab gruomota bārnim patyktu, tū papyldynoj nūvodneicys Rudeitis Kašys kruosainī, dzeiveigī zeimiejumi.

Kūpā Ontonam Slišānam ir izguojušs četrpadsmit gruomotys bārnim: „Raibī panti” (1991), „Lyugums sapneišam” (1992), „Par gadskārtu Jānīts nāca” (1993), „Cik vējam krāsu?” (1994), „Zynamōs meikleites” (1995), „Ziemneši” (1996),  „Rūtaļu gods” (1997), „Rotaļa” (1998), „Saulei par prieku” (1999), „Nepareizais” (2000), „Laiks” (2001), „12” (2006), „Rūtaļu vydā” (2009), „Labi, ka labi” (2011).

Andris Slišāns par kotru izdūtū gruomotu prota pastuosteit stuostu, kai tei topuse. Andra paaudze ir izauguse ar ailem nu kruojumim „Raibī panti” i „Lyugums sapneišam”, daudzus Ontona Slišāna dzejūļus skaita Upeitis pamatškolys stuņdēs. Pyrmuos izdūtuos gruomotys ir nalelys brošurenis, nav izdūtys bīzajūs vuokūs, nav kruosainūs karteņu, bet tys namazynoj gruomotu vierteibu. Pādejūs godūs gruomotom zeimiejumus zeimiejuši gon Rēzeknis Muokslys školys bārni, gon Upeitis cīma bārni. Kruojumā „12” Ontona Slišāna bārnu dzejūli ir puormeiti 12 volūduos. Kruojumā „Rūtaļu vydā” lobuokī dzejūli ir na viņ latgaliski i latviski, bet ari lītuviski i žemaitiski, kab sābruzemis bārni ari īsavuiceitu Ontona Slišāna ailis.

Gruomotys „Labi, ka labi” pasuocīnī uzastuoja tūpūšī muzykanti Kate i Dominiks Slišāni, Uko Kokņevičs, Osvalds Roze, Dagneja Razminoviča, Baļtinovys Muzykys školys vijūļnīku ansamblis i klarnetistu trio. Ontona Slišāna ailis deklamēja i skaiteja Andris Slišāns, Elvita Krakope i Sinteja Vizule. Sūla daņci demonstrēja Upeitis pamatškolys bārni, ritmikys sūļus ruodeja Upeitis Tautys noma ritmikys puļceņa dalinīki, i nūslāgumā dzīduoja Upeitis jaunīšu folklorys kūpys jaunuos sīvys, kurys puorlīcynūši paruodeja, ka ir i byus spieceigys dzīduošonys tradicejis turpynuotuojis Škilbanu pogostā. Vysi bārni i pīaugušī, kuri beja sagatavejušs prīšknasumus, sajieme duovonā jaunū gruomotu „Labi, ka labi”.

Teksts i kartenis: Vineta Zeltkalne sadarbeibā ar Upeitis Tautys noma vadeituoju Andri Slišānu.

.


Print Friendly, PDF & Email

Komentari

Kalenders

Mar
30
Sai
15:00 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 30 @ 15:00 – 16:30
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
Mar
31
Svā
all-day Izstuode “Latgales keramikas stā... @ Daugovpiļs Muola muokslys centrs
Izstuode “Latgales keramikas stā... @ Daugovpiļs Muola muokslys centrs
Mar 31 all-day
Da 31. marta Daugovpiļs Muola muokslys centra izstuožu zālē apsaverama Tautys lītiškuos muokslys studejis “Latgale” izstuode “Latgales keramikas stāsti”, kurā apkūpuoti studejis lobuokī dorbi, viestej informaceja Daugovpiļs piļsātys sātyslopā. “Kotrys dorbs sovā byuteibā ir unikals i naatkuortojams, kotram[...]