LaKuGa arviņ vaira kliust par vītu jaunūs talantu, ar laiku varbyut lelu ailinīku pyrmajom publikacejom. Tai marts suocēs ar Maltys – Rēzeknis pusis zāna Juoņa Šaudeņa uzadreiksteišonu i pyrmū publikaceju LaKuGā i niu lela prīca, ka pyrmai reizei ir turpynuojums. Taipat, syutūt sovus dorbus LaKuGai iz e-postu info@lakuga.lv, aicynojom dareit ari vysus cytus gon pīredzejušus, gon jaunus latgaliskūs aiļu raksteituojus.

 

Klusuos dūmys

Četru betona bloku kastē
Vīns palīku es
Bet Tu nauzatrauc
Maņ kai i vysim myusim
Palīk dūmys
Bez rūbežu
Bez apstuojis
Kas klusuma īskautys
Kai Jaunuo goda petardis
Ci syltī zīmys puteni
Kur pasagoda skrīņ
Aizgiunūt cylvākus
Vysu pyrma jau sevi
Aizgiunūt aiz vysa
Bet vysvaira aiz dvēselis
Cylvāka myuža pyura skreinis
Kas dīnu nu dīnys
Myusim pylduos
Kaids saceis – palnim i ūglem,
Cytam otkon relikvejom
I nagaistūšom vierteibom
Pylduos…
….Vīnam lānuok…
…….Ūtram mudruok…