Pasasokūt spūkainam čulanam, kas atsarūn Tievanānu sātā, pasuokums dabovs ari naoficialu nūsaukumu — Tievanānu čulans.

Pasuokuma ideja kotru godu ir tei poša: puļcēt vīnā vītā latgalīšu literaturys autorus i skaiteituojus, kab  napīspīstā atmosferā klauseitūs i skaiteitu dzeju i prozu latgaliski. Guojīņs naktī iz Trūpu Valna akmini i reitā iz Viļānu tiergu jau ir tradiceja, tok kotru godu pasuokums pasagrīž pa sovam.

Šuo gods Tievanānu pavasara miseja ir savest kūpā jaunūs latgaliski rokstūšūs autorus jau ar atzeitajim Latgolys literaturys autorim, kab, kūpeigi diskutejūt, struodojūt, analizejūt sovus dorbus, īsadvasmuotu, caltu jaunūs latgalīšu autoru dzejis, prozys kvalitati.

Pasuokuma plans:

9. juņs:
•    13.00- 16.00 īsarasšona Tievanānūs: īsapazeišona, pušdīnis, tolka i c
•    16.30 literaruo darbneica jaunajim i jau atzeitajim latgaliski rokstūšajim literaturys autorim i aktivitates tim, kuri naroksta;
•    18.00 – 20.00 literatu dzejis, prozys skaitejumi;
•    20.00 dzīsmis, daņči, spēlis, sarunys, latgalīšu kinu vieršonuos, vakarenis;
•    24.00 guojīņs iz Trūpu Valna akmini;
•    Nakts mīrs.

10.juņs:
•    6.00-7.00 tradicionalais guojīņs iz Viļānu tiergu;
•    Latgalīšu gruomotu golds;
•    Cuoļu i raibūs syvānu pierkšona.

Praktiskuos lītys:
•    leidza jamam gastiņci (ādamys i dzeramys lītys);
•    teļti, guļammaisu guliešonai;
•    datikšona iz Viļānim ar stopim, mašynom, zyrgim, sabīdryskū transportu (kusteibys saroksts — 1188.lv).

Kai Tievanānu čulanā beja cytus godus?
1. gods.
Vaļuka dzejūli, pīniņu vaiņuki i saulis pīlyugšona iz pogroba
2. gods.
Spylgtuokuo frāze nu Guntix — “Skaiti mudruok, dreiži atīs fašisti ar spičkom!”
3. gods.
Patriotu golds ar karūgu, zači i siļčis asti.
Spylgtuokuo frāze nu Raibuo Suņa — “Babys studiņs cīši gords. Tik daudz motu.”
4. gods.
Loba daudzi navāga, tok bez guojīņa iz Trūpu Valna akmini — nikur!
5. gods.
Sukņu i švītu velobraucīņs nu Nagļu da Viļānu „Koč kas na nu ituo godu symta”.
Spylgtuokuo frāze — Vaļuka i Santys dialogs par ūdim:
– Piec stuņdis jī ak jau aizīs gulātu.
– A jim princips — leidz pādejam klientam!

.