Dzeivi suokuse jauna Daugovpiļs Teatra izruode „Vosorys saulgrīžu burvesteibys”. 16. oktobrī ir nūtykuse juos pyrmizruode.

Itys ir pyrmais ituos Šekspira komedejis īstudiejums latgaliski, rakstneica Monika Zeile klasiskū lugys sižetu pīlāguojuse Latgolai. Izruodē Šekspira komiskū mīlesteibys stuostu var īraudzeit cytaiž – latgaliskā gorā, ar latgalīšim rakstureigū attīksmi pret dzeivi, temperamentu i parodumim.

Izruodis pamatā ir stuosts par četrim meilātuojim: Juoni, Helenu, Maļvinu i Pīteri. Vysaidu puorprotumu i intrigu rezultatā jī teik īrauti nabeidzamā kaisleibu vierputī, atkluojūt, cik mīlesteiba var byut okla,  nažieleiga i naparadzama i cik atškireigai jei var ītekmēt kotru cylvāku.

Vīnu nu golvanajom lūmom izruodē spielej Latvejis skotuvis humora meistars Juoņs Jarāns, kurais eipaši aicynuots daleibai jaunīstudejumā i kuram tei byus debeja Daugovpiļs Teatrī. Interesns fakts, ka sovu aktera karjeru aktīrs ir suocs ar lūmu taišni Šekspira lugā „Sapyns vosorys naktī”.

Izruodis režisors Olegs Šapošnikovs, kostimu muokslineicys i scenografis Inga Bermaka i Agnese Stabeņa, horeografe Irina Saveļjeva, gaismu muokslinīks Sergejs Vasiļjevs.

Lūmuos: Juoņs Jarāns, Andris Bulis, Ivars Brakovskis, Inese Ivulāne-Mežale, Māris Korsiets, Kristīne Veinšteina, Ritvars Gailums, Egils Viļumovs, Maija Korkliša, Alda Krasteņa, Līga Korlaša, Jurijs Losevs, Konstantīns Zaics, Miroslavs Blakunovs, Inese Ignatāne, Dainis Jackevičs, Jelizaveta Petrova, Inga Zeile.

Režisors O. Sapošnikovs par jaunū īstudejumu stuosta, ka jam ir it kai div sluoni: vīns ir Šekspira teksts i M. Zeilis latgaliskuos interpretacejis humors, atpazeistamī tipaži i vacu vacī konflikti, ūtrs – seksuala rakstura simbolisku provokaceju kūpums. Taišni itei simboliskuo forma ļaun izruodē nūjimt seksualūs tabu i “aizvest skateituojus ceļuojumā na tikai romantiskūs, bet ari erotiskūs sapynu pasaulī.”

Teatris niu ir sagatavejs vēļ div jaunys izruodis: “Mali” i “Biznesa klasis palata”.  Daugovpiļs teatra muokslinīciskais vadeituojs i vaļdis prīkšsādātuojs O. Sapošnikovs jaunajom pyrmizruodem veļteitajā presis konfereņcē ir nūruodejs, ka teatris dareis vysu, lai cytugod jam vaļsts dotaceja tyktu palelynuota taidā apmārā, kab tys ļautu atsateisteit planveidei i sekmeigi i iz prīšku.

Golvonuo teatra problema ir aktīru tryukums. Saleidzynojūt ar cytim profesionalajim teatrim, aktīru skaits trupā ir treis reizis mozuoks, koč itamā sezonā teatris ir sagatavejs 13 jaunys izruodis latvīšu, krīvu i latgalīšu volūduos. Nasaverūt iz tū, jau tyvuokajā laikā div pyrmizruodis.

“Mali” ir filozofiska izruode par trejim jaunim cylvāki, kas ītykuši mīlesteibys trejstyurī – nivīns nu personažu eistyn nazyna, kuru mīļoj, ar kuru grib dzeivuot kūpā i deļkuo. Tei nav izruode par seksu, bet filozofisks stuosts ar erotisku pīsitīni. “Malu” pyrmizruode byus 3. novembrī 17 stuņdēs, izruodis 4. novembrī 17 stuņdēs Daugovpilī i 10. novembrī 19 stuņdēs vīsizruode Reigā, Latvejis Nacionalajā teatrī.

“Biznesa klasis palata” ir komedeja, juos darbeiba nūteik slimneicā, kur najauši sasateik div piļneigi dažaidi cylvāki – augsta ranga īriednis, kam draud izjukt lela finansiala afera, i pensioneits aktīrs. Tai suocās vasala puorprotumu, sarežgiejumu i kuteleigu situaceju vērtine. “Biznesa klasis palatai” pyrmizruode – jau 26. oktobrī 18:30 stuņdēs, nuokušuo izruode 27. oktobrī 17 stuņdēs.

Kartenis nu Daugovpiļs teatra īstudejuma “Vosorys saulgrīžu burvesteibys” pyrmizruodis ituo goda 16. oktobrī.

Publicitatis materiali.