Prezentēs unikalu latgalīšu bārnu kruosojamū gruomotu „Munā sātā”

Prezentēs unikalu latgalīšu bārnu kruosojamū gruomotu „Munā sātā”

Ituo goda 2. martā 10:15 stuņdēs nu reita, Latvejis gruomotu svātku laikā, Reigā, Kīpsolys izstuožu hallē, nūtiks unikalys bārnu kruosojamuos gruomotys „Munā sātā” prezentaceja. Latgalīšu bārnu reitā byus īspieja īsapazeit ar gruomotys varūnim i jūs pīdzeivuojumim Latgolys lauku sātā.

Pasuokumā skanēs Ontona Slišāna dzeja i tiks aizdūtys latgalīšu tautys meiklis par sātys kustūnim. Prezentacejis apmaklātuojus gaida Ilzis Spergys stuosts par sātys kustūnim, kas dzeivoj klāvā i ustobā: par gūvi Zīdali i teļu Pupuzīdu, vepri Onupri i juo cyuku saimi, vucynu Kostynu, vuškom i jārim, peilynu Eilynu i peili Veili, kačini Murku i suneiti Krikseiti.

Gruomota „Munā sātā” izīs jau dreizumā i byus pyrmuo taida veida gruomota latgalīšu volūdā: kruosojamā gruomotā zeimiejumi apvīnuoti ar originalliteraturys saceriejumim: prozu, dzeju i meiklem latgalīšu rokstu volūdā. Gruomota derēs pavysam mozim prīškā skaiteišonai i leluokim – deļ pyrmūs sūļu gruomotā ci deļ pyrmūs sūļu latgalīšu volūdā.

Bārnu kruosojamai gruomotai ir treis dalis, tei ir mape ar trejom burtneicom. Kotrai burtneicai ir sovs saturs i sovi zeimiejumi, a kūpā — mozys meitinis Īvys acim var īraudzeit kaidu Latgolys sātu ar vysim juos cylvākim i kustūnim.

Pyrmajā burtneicā „Riti, riti, ritineiti!” ir dzejnīka Ontona Slišāna bārnu dzejūļu izlase, kas stuosta par vīnā dīnā pīdzeivuotū — par pasamūsšonu nu reita sovā guļteņā i mamys gaideišonu, pa dīnu īraudzeitim breinumim: sovvaļneicu vuornu pogolmā, suņa i kača īnaidu i par vokora zvaigžņu stidzeņu, pa kuru da bārna atīt mīgs i sapneiši.

Ūtrajā burtneicā apkūpuoti eisi, atraktivi Ilzis Spergys stuosteni par vysaidim kustūnim: par gūvi Zīdali i juos teļu Pupuzīdu, vepri Onupri, rasnu kai baļvu, i vucynu Kostynu, kas nikai navar saprast, deļkuo saimineica tai syrduos, kod vuškys draudzeigai aizīt paēst juos runkuļu i kuopustu. Vēļ burtneicā dzeivoj peilyns Eilyns i peile Veile, gaiļs Stass i perine Vecine, vystys Gnēze, Kukēze, Raibuleite i Madaleite, kačine Murka i suneits Krikseits. I papyldus stuostim pi ilustracejom ir apkūpuotys ari meiklis. Pīmāram, voi zyni, kas ir Dīva cymds iz golda? Kačs!

Trešuo burtneica ir Ilzis Spergys stuosts par Īvys saimi i jūs dzeivi lauku sātā: par babu, kas verās serialus, papu i mamu, vacuokajom muosom i bruoli Juri, ar kū saīt i nūbraukt ar ritinim iz upi, i sadareit bleinis. Natuoli nu jūs dzeivoj Matiļde, kas vysod redz, kod bārni nav nūganiejuši vystys i juos īleidušys sābru daļā — laikam jai sātā ir binūklis.

Kai stuosta gruomotys redaktore Ilze Sperga, ideja par itaidu gruomotu īguojuse pruotā, braukojūt ar latgalīšu gruomotu goldu pa vysu Latgolu i runojūt ar cylvākim —  radzūt jūs vajadzeibys i īspiejis. „Lai gruomota byutu kū na pīejamuoka pierciejam, jei ir vīnkuoršā īsiejumā i malnbolta. Tok naīs jau nabadzeibā lapnumu zaudēt — gruomotā ir īpaši atlaseitys meiklis pat nu Latvejis Folklorys kruotuvis fondu, kas paruoda latgalīšu kulturys bagateibu, loba bārnu dzeja i nu jauna saraksteita bārnu proza. Gruomota sakuortuota trejuos burtneicuos, lai tuos saimis, kuruos aug vairuok bārnu, var nopierkt tik vīnu gruomotu, kurā kotram byutu atrūnama sova kruosojamuo burtneica. Ari teksti deļtuo ir dažaidi — lai atbylstu kotra interesem: dzeja, meiklis, vīnkuorši i eisi stuosteni napacīteiguokajim i garuoks stuosts tim, kas jau skaita labi.”

Gruomotys ilustraceju autore ir Rudeite Kaša. Juos zeimiejumūs atsadzeivynoj vysa lauku sāta i juos īdzeivuotuoji. R. Kaša ilustriejuse ari Ontona Slišāna bārnu gruomotu „Labi, ka labi” i niu aplīcynuojuse sevi kai interesnu i seikom detaļom bogotu malnboltūs zeimejumu autori.

Gruomotys izdeviejs ir z/s „Jākupāni”, kas Andra Slišāna vadeibā turpynoj dzejnīka Ontona Slišāna suoktuos izdeviejdarbeibys tradicejis. Gruomotys izdūšonu atbaļstejuse Latgolys regionaluo atteisteibys agenturys Kulturys programa, VKKF finansiejums. Gruomota teik izdūta sadarbeibā ar bīdreibu „Latgolys Studentu centrs”.

Latvejis gruomotu svātki Kīpsolys izstuožu hallē nūtiks nu 28. februara leidz 3. martam. Dorba laiks pīktdiņ i sastdiņ byus nu 10 stuņžu reitā leidz 18:00 stuņžu vokorā, svātdiņ — leidz 17:00 stuņdem vokorā. Svātkūs jau catūrtū godu piec kuortys byus ari latgalīšu gruomotu stends, kurā bīdreiba „Latgolys Studentu centrs” pīduovuos dažaidu izdevieju gruomotys latgaliski voi par Latgolu.

Ilze Sperga,
gruomotys „Munā sātā” redaktore

Print Friendly, PDF & Email

Nūtikšonu kalendars

Nov
7
Sai
16:00 Catūrtais pasauļa diktats latgal... @ Vyss pasauļs
Catūrtais pasauļa diktats latgal... @ Vyss pasauļs
Nov 7 @ 16:00
Catūrtais pasauļa diktats latgalīšu rokstu volūdā @ Vyss pasauļs
Diktats skanēs 7. novembrī 16 stuņdēs jaunīšu raidejumā “Pīci breinumi” vysuos Latvejis Radejis 5 frekveņcēs, tū varēs klauseitīs ari škārsteikla platformuos pieci.lv i lsm.lv, kai ari Latvejis Radejis Latgolys studejis i portala lakuga.lv kontūs socialajūs[...]