3. augustā piļsātys svātku laikā apmaklātuojim beja īspieja baudeit eistu vydslaiku atmosferu Rēzeknis piļskolnā. Pasuokuma laikā beja īspieja īsapazeit ar amatnīku darynuojumim, kai ari pošam pīsadaleit dažaiduos senlaiceiguos aktivitatēs.

Jau nu poša reita piļsietnīkus i gostus izklaidēja amatnīku i tierguotuoju lobumi, viesturiskūs aktivitašu stendi i vydslaiku ceiņu pajiemīņu paraugdemonstriejumi četru stuņžu garumā, kurūs pīsadaleja viesturis rekonstrukcejis grupys nu Lītovys, Boltkrīvejis, Krīvejis i Latvejis.

„Beja taidi karuotuoji, kurus sauca par berserkim. Jī beja piļneigi bezbaileigi i skaitejuos poši beistamuokī karuotuoji,” skateituojus informej rekonstrukcejis klubs „NAGLAFAR” nu Boltkrīvejis.

Par naskaidreibu nūviersšonu guoduoja speciala organizatoru grupa, kurys pīnuokumūs beja puļcēt dalinīkus i uzturēt kuorteibu.

„Maņ ruodīs, pats pasuokums varēja suoktīs drupeit vāluok, bet kūpumā jis ir izadevs, i laika apstuokli ari ir atbylstūši,” soka Zinta, vīna nu pasuokuma organizatorim, pībylstūt, ka nūpītnu puorkuopumu i konfliktu pasuokuma pyrmajā daļā nav bejs.

Paraleli ceiņom apmaklātuoji varēja īsavuiceit kaļšonys, ausšonys i peišonys pamatus, kai ari apviļkt brunis, doncuot vydslaiku dančus i šaut ar lūku. Bet mistikys cīneituojim beja īspieja dūtīs pi varažneicys, lai dazynuotu sovu nuokūtni.

Rēzeknis īdzeivuotuoja Ligita stuosta: „Paraudzeju paceļt brunis – juos izaruodeja rikteigi smogys, rūkys naturēja. Lobs pasuokums, kūpumā teiri labi patyka, taču jam drupeit pītryukst tuos ekspozicejis. Varātu vēļ vairuok kaidys taidys aktivitatis paruodeit.”

Pasuokuma reikuotuoji beja pasaryupiejušs par tū, lai apmaklātuojus napamastu ar tukšim vādarim – jī tyka gasteiti ar maizi i gaļu. Piec tam beja pušdīnis vydslaiku gaumē, grybātuojim kūpeigi ādūt zupu pie leluo kūka golda.

„Maņ cīši patyka itys pasuokums. Tik teišom beja sajiuta, ka esi īmasts paguotnē i tev ir īspieja na tikai vāruot nu molys, bet ari pošam vysur pīsadaleit. Es dūmoju, ka tys ir cīši lels pluss pasuokumam,” atzeist reidzinīks Emīls, kurš Rēzeknē īsarads pyrmū reizi.

Pasuokuma beiguos nūtyka „Leluo kauja”, kurā pīsadaleja vysys rekonstrukcejis grupys. „Lelū kauju” nūslēdze mīra i sadraudzeibys leigums starp dalinīkim.

Tū vysu redzēja i pīraksteja Inese Čiževska
Kartenis: I. Čiževska