Februara mieness Lozdukolna pogostā tyka īsuokts sacenseibu gorā. Sastdīņ, 1. februarī, Lozdukolna hokeja laukumā puļciejuos Lozdukolna, Lubuonys, “Lazdukalns2/Rīga” i Bolvu hokejisti. Koč ari laika apstuokli nalutynuoja  – viejs beja spieceigs i temperaturys miereituoji ruodeja minus četrpadsmit grādus – tys natraucieja hokeja spālātuojim i draugim prīcuotīs par itū spēli.

Komandys izspielieja apļa sistemu, aizvodūt spēlis kotra ar kotru. Tai nūskaidruoja divejis stypruokuos komandys, kurys tykuos finalā. Itūreiz tuos beja Lozdukolna i “Lazdukalns 2/Rīga” komandys, kurys grupu turnirā nūspielieja naizškierti 3:3. Finalā vysi gaideja seivu ceiņu, bet veiksme vaira beja Lozdukolna pusē – puors veiksmeigu metīņu i Lozdukolns puorlīcynūši izceineja puorsvoru i nūturieja tū da spēlis beigu, īgiustūt Lozdukolna kausu hokejā 2014. Uzvarietuoju komandā spielieja Agris Kalnējs, Edijs Adelčs, Didzis Usenieks, Jānis Ikstens, Audris Usenieks, Nauris Ločmelis, Ruslans Doļuks, Ilvars Doļuks, Normunds Mičulis, Jānis Boldāns, Intars Ločmelis. Trenera lūmu uzajēme Eduards Stalidzāns.

Trešuo i catūrtuo vīta tyka sadaleita piec lobuokys punktu attīceibys. Tai kai punktu attīceiba beja vīnaida, tod jēme vārā giutū vuortu skaitu. “Vilces” komanda no Lubuonys kūpsummā beja rezultativuoka kai Bolvu komanda. Attīceigi ari vītys – “Vilce” trešī, bet Bolvi catūrtī.

Par Lozdukolna kausa hokejā vierteiguokū spālātuoju organizatori atzyna Audri Usenieku, kurs turnira laikā sovys komandys lobā giva sešus vuortus.

Gūdolguotūs vītu īgiviejus apbolvuoja ar medaļom, kai ari uzvarietuoji sajēme kausu.

Vysus hokejistus cīnuoja ar korstu zupu, kas jau vairuokus godus ir klivuse par sacenseibu tradiceju. Lels paļdis Eglainis pamatškolys pavuorem par gordū zupu, kas sasiļdeja soltajā zīmys dīnā!

Eipašs paļdis Ruguoju nūvoda dūmei par turnira atbaļsteišonu!

Ari kasdīnā sevkuram ir īspieja sliduot pa Lozdukolna hokeja laukumu, ka ir taida vēļme i personiskuos slidys.

Roksta autors: Jānis Rakstiņš
Karteņa: Jānis Rakstiņš