Muokslys dorbu izsūlē vuoks naudu bazneicys atjaunuošonai Leivuonā

Muokslys dorbu izsūlē vuoks naudu bazneicys atjaunuošonai Leivuonā

Itūšaļt aktivi rit 1861. godā caltuos Leivuona Rūmys katuoļu Svātuo Mikeļa Erceņgeļa bazneicys īkštelpu interjera atjaunuošonys dorbi. Lai dorbus pabeigtu, aktivi īsasaistejuši ari vītejuo sabīdreiba i vuocūt zīdoujumus, i organizējūt lobdareibys pasuokumus, pīmāram, Leivuona muokslinīki 19. aprelī sovus dorbus puordūs izsūlē, kurymā dabuotī leidzekli tiks zīduoti bazneicys atjaunuošonai.

Energiskajam Leivuona katuoļu draudzis prīsteram Juram Zarānam ir nūzeimeigys īceris attīceibā iz Leivuona Rūmys katuoļu bazneicys remontdorbim, bet dīvamžāļ draudzis naudys leidzekli nav pīteikūši itūs īceru realiziešonai.

Latgolys muokslys i omotnīceibys centra Leivuonā vadeituoja Ilze Griezāne, atsasaucūt iz aicynuojumu paleidzēt, gryb uzrunuot Leivuona nūvoda muokslinīkus i kūpeigim spākim nūorganizēt muokslys dorbu izsūli, kurymā dabuotū naudu duovuot bazneicai.

Vysi rodūšī Leivuona nūvoda muokslinīki teik aicynuoti pīsadaleit Leivuona Svātuo Mikeļa Erceņgeļa Rūmys katuoļu bazneicai veļteitā lobdareibys pasuokumā, zīdojūt vīnu voi vairuokus sovus muokslys dorbus lobdareibys izsūlei, kas nūtiks 19. aprelī.

Ilze Griezāne aicynoj muokslinīkus izsūlei atvālātūs dorbus leidz 2014. goda 15. martam nūguoduot Latgolys muokslys i omotnīceibys centrā, Dūmis ūļneicā 1, Leivuonā.

Nu 20. marta leidz 15. apreļam sevkurs interesents varēs apsavērt muokslinīku dorbus kluotīnē Leivuona katuoļu bazneicys telpuos, kai ari škārsteikla vītnēs www.latgalesamatnieki.lv i www.livani.lv i socialajā teiklā www.draugiem.lv (http://www.draugiem.lv/lmac/ un http://www.draugiem.lv/livani/). Informaceja byus atrūnama ari laikroksta “Līvānu novada vēstis” 16.aprīļa numurā.

Muokslys dorbu izsūle nūtiks 2014. goda 19. aprelī Latgolys muokslys i omotnīceibys centrā. Īgiutī leidzekli tiks puorskaiteiti bazneicys atjaunuošonai iz Leivuona Rūmys katuoļu bazneicys kontu.

Leivuona katuoļu bazneicai ir nūmaineits jumts i lūgi, īreikuota greidys apsiļdis sistema. Ir sakūpts bazneicys parks, nūzuodžeiti beistamī kūki, kas apdraudieja kuormu i būjuoja tuos jumtu i pamatus. Itūšaļt nūteik īšktelpu remonts – sīnu i grīstu kruosuošona, dekorativūs greidys flīžu īkluošona. Nuokūtnis planūs ir vargaņu remonts, kai ari tūrņa restauraceja.

Ziņa sagataveita piec Leivuona nūvoda dūmis dūtuos informacejis