Nūskaidruoti Mis i Misters Vileks nūvods 2014

Nūskaidruoti Mis i Misters Vileks nūvods 2014

Rekovys sporta nomā 22. februarī nūtyka grandiozs pasuokums „Mis i Misters Vileks nūvods 2014”. Jau trešū godu piec kuortys konkurss puļcēja atbaļsteituojus i skateituojus i nu Vileks, i sābru nūvodim.

Itūgod desmit konkursanti beja sagatavejuši deveņus prīšknasumus, nu kurim septeņus viertieja žūreja (Sandra Ločmele, Austris Keišs, Baiba Reine i Maruta Sprudzāne), kab nūsaceitu titulu „Vice Mis i Misters”, kai ari golvonū „Mis i Misters Vileks nūvods 2014” īgiviejus.

Kai pyrmū, konkursanti demonstrieja izguojīni aba „Vizitkarti” – pyrmais i palīkūšais īspaids, bet jau ūtrajā prīšknasumā aba „Intervejā” vysi kluotasūšī īpazyna jaunīšus ari tyvuok, kur poši eisai par sevi pastuosteja i izlūzieja najaušu vaicuojumu, iz kuru deve momentalu  atbiļdi. Pasuokuma vadeituojs Ingars Puncuļs nu dzīdūšuos Puncuļu saimis i „Zaļūs pakolnu kora” dalinīks ar humora devu paleidzieja konkursantim nasamulst, ka ari kaids izlūzietais vaicuojums lykuos gryutuoks.

Konkursa dalinīki kūpā ar sovu školuotuoju Škilbanu iniciativu centra “Zvaniņi” vadeituoju Vili Cibuli beja sagatavejuši divejus prīšknasumus – dzīsmis. Kai pyrmū jaunīši izpiļdeja legendaruos grupys “Līvi” dzīsmi “Zīlīte”, kur poši jaunīši spieļuoja instrumentus – gitarys, bungys, vijūli, saksofonu i tamburinu. Nuokušais prīšknasums vysus skateituojus aizvede nakluotīnē iz Moldovu – skaistu, saulainu zemi ar korstasneigim ritmim i atraktivim deju sūlim. Kab nūviertietu atseviški puišus i mārgys – kotru godu teik veiduoti eipaši mārgu i puišu defilē, kura laikā teik paruodeita stuoja, grāceja i plastiskums. Itūgod skateituojus puorsteidze beistamuos muojsaimineicys i naatlaideigī studenti, kuri gribieja īkaruot sovys fitnesa trenereitis (Arta Kanepe) sirdi. Bet kai kūpejuo deja aba teatralais uzvadums beja “Itālija”, kur puiši cenšās īkaruot mārgu sirds i pi Adriano Čelentano dzīsmis “Tutta” izspieļuoja attīceibu leiklūčus. Ari ūtruo dzīsme “Tuvu, Tuvu”, kuru jaunīši veļteja sovim meilajim vacvacuokim i vacuokim – raiseja syltys i patīsys emocejis, partū ka pa divejim sagataviešonys mienešim jaunīši eistyn beja sasatyvynuojuši i sasadraudziejuši.

Itūgod titulus “Mis i Misters Foto” dabuoja Airita Ivanova i Sergejs Saveļjevs. Škārsteikla skateituoju bolsuojuma bolvu – apmeklēt vysus kulturys īstuožu reikuotūs pasuokumus Vileks nūvodā bez moksys sajēme – Katrīna Karzubova (531 bolss) i Sandis Matisāns (229 bolsi). Titulus “Skateituoju simpateja” kluotīnē sajēme Kristers Kokorevičs (107 bolsi) i Elīna Sprukule (72 bolsi), titulu “Vice Mis i Vice Misters” īgivieji itūgod ir Olita Urbāne i Andis Slišāns, bet golvonū titulu “Mis i Misters Vileks nūvods 2014” sajēme Katrīna Karzubova i Kristers Kokorevičs.

Teksts: Kulturys centra „Rekova” vadeituoja Kristīna Lapsa
Karteņa : Linda Kanepe

Print Friendly, PDF & Email

Nūtikšonu kalendars

Mar
24
Pīk
15:00 Osvalda Zvejsalnieka pīmiņai veļ... @ Leivuona stykla i amatnīceibys centrs
Osvalda Zvejsalnieka pīmiņai veļ... @ Leivuona stykla i amatnīceibys centrs
Mar 24 @ 15:00 – 17:00
Leidz 13. apreļam Leivuona stykla i amatnīceibys centra izstuožu zālē apsaverama Osvalda Zvejsalnieka (1944-2022) gleznīceibys izstuode “Māja pie Daugavas”, informej centra puorstuove Kristīne Lipkova. 24. martā 15.00 stuņdēs paradzāta ari muokslinīka pīmiņai veļteita sasatikšona. Marts[...]
16:00 Latgolys grafikys simpozeja izst... @ Daugovpiļs Marka Rotko muokslys centrs
Latgolys grafikys simpozeja izst... @ Daugovpiļs Marka Rotko muokslys centrs
Mar 24 @ 16:00 – 17:30
Pīktdiņ, 24. martā, 16.00 stuņdēs Daugovpiļs Marka Rotko muokslys centrā piec div nedeļu intensiva dorba studejuos tiks atkluota 11. Storptautyskuo Latgolys grafikys simpozeja nūslāguma izstuode i sveikti tuo dalinīki. 11. Storptautyskais Latgolys grafikys simpozejs nūteik[...]