Jau ostuotū godu piec kuortys pavasarī Rēzeknē nūteik Storptautiskais muokslinīku pleners “Domas lidojums”. Itūgod pleners nūtiks nu 26. maja leidz 1. juņam i ituo gods plenera moto – “Viss ir iespējams!” Muokslinīki teik aicynuoti dasasaceit leidz 30. apreļam!

Rēzekne ir puormaiņu piļsāta i vīta, kur īspiejams vaicuot, veiduot i atrast jaunys rodūšys idejis i tūs pīpiļdejumu. Plenerā aicynuoti pīsadaleit i vītejī muokslinīki nu Rēzeknis i cytom Latvejis piļsātom, i muokslinīki nu cytu vaļstu – Lītovys, Igaunejis, Boltkrīvejis i cytom.

Dasasaceišona daleibai muokslinīku plenerā “Domas lidojums” leidz 2014. goda 30. apreļam, nūsyutūt aizpiļdeitu dasacejuma veidlopu pa e-postu: maija.breke@rezekne.lv

Muokslys pleneru organizej pošvaļdeibys agentura “Rēzeknes Kultūras un Tūrisma centrs” i plenera dalinīkim nūdrūšynoj nakšņuošonu, ādynuošonu i vīnu sagataveitu audaklu iz rāma gleznuošonai, bet muokslinīki var izapaust kotrs piec sovu īspieju. Plenera nūslāgumā kotrs dalinīks izduovoj Rēzeknei vīnu nu plenera dorbim, kuru izavielej organizatoru puorstuovs.

Nedelis laikā radeitūs plenera dorbus sevkurs varēs apsavērt izstuodē 31. majā, muokslys i muzykys festivala “Sevenhills” ītvorūs, kas Rēzeknē nūtiks no 30. maja leidz 1. juņam.

Papyldu informaceju var dabuot, zvonūt Maijai Brēķei – pošvaļdeibys agenturys “Rēzeknes Kultūras un Tūrisma centrs” direktora vītneicai, pa telefonu +371 26102732 voi ari rokstūt, e-posts: maija.breke@rezekne.lv

Ziņa sagataveita piec Rēzeknis Kulturys i Turisma centra dūtuos informacejis
Karteņa: A.Bondarenko