Nūtiks konfereņce “Krystpunkti pīrūbežys kulturā, volūdā, viesturē”

Nūtiks konfereņce “Krystpunkti pīrūbežys kulturā, volūdā, viesturē”

21. – 23. novembrī Rēzeknē nūtiks Latvejis–Leitovys–Boltkrīvejis puorrūbežu programys projekta LLB-2-269 “Virtualuo paguotne – muzeju nuokūtne” nūslāguma i 7. storptautyskuo latgalistikys konfereņce “Krystpunkti pīrūbežys kulturā, volūdā, viesturē”.

Projekts “Virtualuo paguotne – muzeju nuokūtne” nūteik nu 2012. goda 1. decembra da 2014. goda 30. novembra (24 mienešus). Projekta mierkis – izveiduot virtualuos muzeju fondu galerejis, kuruos byutu apsaveramys škārsteiklā (iņternetā), radeit 4 datorspēlis, kas varātu byut saistūšys bārnim i jaunīšim, īpazeistūt nūvodam rakstureigū kulturys montuojumu, dūdūt vareibu leluokam cylvāku skaitam virtuali pabyut muzejūs, kai ari rodūt jim iņteresi apmeklēt muzejus kluotīnē.

Projekta vodūšais partners – Rēzeknis Augstškola, projekts teik realizāts sadarbeibā ar Kedaiņu Regionalū muzeju (Leitova), Grodnis Vaļsts Viesturis i arheologejis muzeju (Boltkrīveja) i Rēzeknis piļsātys dūmi, kas puorstuov Latgolys Kulturviesturis muzeju. Projekta darbeibys i rezultati ir apsaverami sātys lopā: www.futureofmuseums.eu.

Kūpeiguo projekta izdavumu summa – 374,832,33 eiro, nu tūs 90% – Eiropys Savīneibys finaņsiejums.

Vīns nu projekta nūdūmu ir saisteits ar pietnīciskuos darbeibys aktiviziešonu, meklejūt paralelis i škārspunktus pīrūbežys kulturā, volūdā, viesturē. Nūslāguma konfereņce ir veļteita ituos problematikys atkluošonai, plotuokys sabīdreibys, eipaši jaunuos paaudzis,īpazeistynuošonai ar izveiduotajom virtualajom galerejom, datorspēlem, taipat – sadarbeibys īspieju lobuokai saprasšonai laikim iz prīšku. Partū iz konfereņcis teik aicynuoti zynuotnīki, muzeja darbinīki, nūvodpietnīceibys entuziasti, kurūs pietejumu objekts ir saisteits ar pīrūbežys kulturys fenomena izzynuošonu, tuo izglobuošonu i populariziešonu.

Latgalistikys konfereņcis da šam ir nūtykušys: Sanktpīterburgā (Krīveja, 2008), Rēzeknē (Latveja, 2009), Greifsvaļdē (Vuoceja, 2010), Poznaņā (Pūleja, 2011), Reigā (Latveja, 2012), Ačynskā (Krīveja, 2013). 7. storptautyskuo latgalistikys konfereņce teik veļteita 110 godu pīmiņai nu drukys aizlīguma latiņu burtim atceļšonys.

Konfereņcis temys:

–          etniskuo, teritorialuo, nacionaluo i c. ideņtitatis, jūs atspīgeliejums pīrūbežys kulturā i volūdā

–     pīrūbežys kulturu sovstarpeiguo īdarbeiba: ītekmis, tipologiskuos leidzeibys i atškireibys folklorā, literaturā, plašsazinis leidzekļu telpā, muzeju darbeibā

–          IT i muzeja darbeibys, humanitaruos jūmys moderniziešonys īspiejis

–          latgalīšu volūda cytu pīrūbežys volūdu īspaidā

–          drukys aizlīguma cālūni i sakys pīrūbežu kulturu, volūdu atteisteibā

 

Dasacejums konfereņcei (daleibnīka anketa i referata anotaceja da 1500 rokstu zeimu ar atstarpem) teik gaideits da 2014. goda 20. septembra iz adresa: ilga.suplinska@ru.lv

Paziņuojums par temys ījimšonu konfereņcis programā tiks izsyuteits da 2014. goda 30. septembra.

Konfereņcis dorba volūdys: latvīšu, latgalīšu, lītaunīku, boltkrīvu, angļu, krīvu.

Ka referata prezentacejis volūda ir latvīšu, latgalīšu, lītaunīku voi boltkrīvu, prasejums sagataveit elektronisku prezentaceju voi kūpsavylkumu angļu voi krīvu volūdā.

Izastušonuos garums: 30 minutu, īskaitūt diskuseju (10 min.).

Konfereņcis daleibys moksa: 40 EUR, studeņtim — 20 EUR.

Svareiguokī datumi:

– 2014. goda 20. septembris — konfereņcis dasacejumu pījimšona;

– 2014. goda 30. septembris — konfereņcis organizacejis komitejis atsaceišona par temys pījimšonu voi napījimšonu;

– 2014. goda 21.–23. novembris — konfereņcis nūrise;

– 2015. goda 31. janvars — rokstu padūšona humanitarūs zynuotņu žurnalam “Via Latgalica” (Nr. 6, ISSN 1691-5569, EBSCO, Central & Eastern European Academic Source collection, datubazēnu 2011. goda);

– 2015. gods —rokstu receņziešona i publiciešona.

Konfereņcis organiziešonys komiteja

Dr. philol. Ilga Šuplinska (koordinatore, Rēzekne)
Dr. philol. Ingars Gusāns (Rēzekne)
Dr. philol. Lidija Leikuma(Reiga)
Dr. hab. phil. Nicole Nau (Poznaņa)
Dr. philol. Aleksejs Andronovs (Sanktpīterburga)
Rimantas Žirgulis (Kedaini)
Indra Brivņa (Rēzekne)
Svetlana Rapecka (Grodņa)

Print Friendly, PDF & Email

Kalenders

Mar
2
Sai
18:00 Latgalīšu kulturys goda bolva “B... @ Latgolys viestnīceiba "Gors"
Latgalīšu kulturys goda bolva “B... @ Latgolys viestnīceiba "Gors"
Mar 2 @ 18:00 – 20:30
Kotru godu Latgalīšu kulturys goda bolvys “Boņuks” padūšonys ceremoneja ir na tik atsavieršona iz pārnajā godā padareitū, tok ari latgalīšu kulturā aktivūs ļaužu, interesentu i atbaļsteituoju sasatikšona i īsadvasmuošonys pasuokums. Bolvys “Boņuks 2023” padūšonys ceremoneja[...]
21:15 Latgalīšu kulturys goda bolva “B... @ LTV1
Latgalīšu kulturys goda bolva “B... @ LTV1
Mar 2 @ 21:15 – 23:15
Kotru godu Latgalīšu kulturys goda bolvys “Boņuks” padūšonys ceremoneja ir na tik atsavieršona iz pārnajā godā padareitū, tok ari latgalīšu kulturā aktivūs ļaužu, interesentu i atbaļsteituoju sasatikšona i īsadvasmuošonys pasuokums. Bolvys “Boņuks 2023” padūšonys ceremoneja[...]