Reigā nūtiks Latgolys puorstuovnīceibys kirmašs
16. augustā nu 12.00 leidz 19.00, Vacreigā, laukumā pi Puļvertūrņa,Tūrņa īlā 4, nūtiks Latgolys Plānuošonys regiona organizietais Latgolys puorstuovnīceibys kirmašs!
Kirmašs latgaliski nūzeimoj “godatiergs”. Pasuokumā sagaideis Latgolys Tematiskūs cīmu programa ar ceļojūšū tiergu, omotnīkim, muzyku i dejom.
Pūdnīki dorbuosīs ar muolu, audieji auss, kaļvi kaļs i gordiežim byus vareiba īsaguoduot Kotleru cīma avīšu i upiņu sātys veinu, lauku sīvu sītu sīru nu eista pīna, špekeiti ar garšvīlom, smuordeigus zuoļu čajus, mada i voska izstruoduojumus, sviļpaunīkus, tradicionalū Latgolys keramiku i cytus Latgolys cīmūs radeitus izstruoduojumus. Tierguošonuos atraktivitati ik pa laikam spylgtynuos Latgolys senejūs ceinis veiru prasmu demonstriejumi, latgalīšu sarunvolūda, tautys dejis i muzyka.
Kluotyn kirmaša vītai asūšajā Latgolys puorstuovnīceibā byus apsaverama izstuode “Muorys zeme aerofotografejuos”, kurys ideja ir paruodeit Latgolys regiona skaistumu i vīnreizeigumu nu naparostuoka skotupunkta — “putyna acim”. Izstuode “Muorys zeme aerofotografejuos” ir diveju rodūšu cylvāku — fotografa Mihaila Ignata i pilota Andreja Asara — duovynuojums Latgolai. Byus apsaveramys 24 nu vaira nakai 100 aerofotografejom, aptverūt Latgolys piļsātys, apdzeivuotys vītys i ainovys. Aerofotografejis topušys 2011. i 2012. goda vosorā treis puorliduojumu laikā puor Latgolu.
Pasuokuma programa:
12.00 – 14.00 Unikala vareiba pīsadaleit dreizajūs latgalīšu volūdys, aprunuošonys kursūs, kū organizēs Skaistuos Izabellys cīms i sajimt sertifikatu.
12.00 – 19.00 Dorbuosīs rodūšuo zeiļuku darbneica, kū organizēs Nuokūtnis ūzulu cīma puorstuovi.
12.00 – 15.00 Bārni varēs īsasaisteit lelūs burbuļu pyusšonā, kū organizēs Nuokūtnis ūzulu cīma jaunīši.
12.00 – 19.00 Varēs vāruot omotnīku paraugdemonstriejumus (kaļvi, keramiki, kludzeņu pinieji, audiejis i cyti omota meistari, kuri sovā dorbā izmontoj skateituojim drūšus materialus i drūšu apreikuojumu) i īsaguoduot meistaru izstruoduojumus.
14.00 – 15.00 Kroma kolna brolistes stuostejums par senejūs latgaļu ceinis muokslu, īrūču i bruņu kraklu paraugdemonstriejumi, senejūs latgaļu spēlis (īrūču paraugdemonstriejumu laikā teritoreja, kurā dorbojās ceiņu veiri, nu skaeituoju teik nūžūguota).
18.00 – 19.00 Tierdziņa nūslāguma sasadzīduošona ar kapelu “Sābri”, vysi varēs dzīduot leidza popularys latgalīšu dzīsmis i atsavadeit ar lobu gorastuovūkli.
