26. i 27. septembrī ar izruodem “Primadonnas” i “Biedre Zariņa” Dailis teatris gasteis Daugovpilī.

Pīktdiņ, 26. septembrī, 18.30 Daugovpiļs teatrī varēs nūsavērt Kena Ludviga komedeju 2 cielīņūs “Primadonnas”. Kod diveji naveiksminīki akteri Leo Klarks i Džeks Geibls puorskaita gazetā sludynuojumu, ka boguota kundzeite vaicoj sovus meiļuotūs, seņ naradzātūs muosys dālus, jim ilgi nav juodūmoj. Jī tok ir eisti akteri – kas par tū, ka leidz tam spieliejuši tik iz provincis skotuvu. Kas jim kū nanūspielēt vaicuotūs muosys dālus i byut par miļjonu īpašneicys mantinīkim? Kū vēļ cytu jius varat sagaideit nu aktera?! Vīneiguo problema ir taida, ka muosys dāli patīseibā izaruod muosys meitys… Tok na veļti Šekspira luguos veirīši spielēja sīvītis. I Leo i Džeks ir eisti Šekspira eksperti. Itei byus jūs myuža leluo lūma. Taidu “Divpadsmytū nakti” pasauļs vēļ nabyus redziejs! Režisora Dž.Dž.Džilindžera īstudātajā izruodē spielej akteri Lauris Subatnieks, Intars Rešetins, Elīna Dzelme, Ilze Vazdika, Artis Robežnieks, Pēteris Liepiņš, Ieva Segliņa i Gints Andžāns. Beletu cenys – 5, 6, 8, 10 i 12 EUR, pensionari var īsaguoduot beletus ar 50% atlaidi.

Sastdiņ, 27. septembrī, 15.00 Daugovpiļs teātrī tiks ruodeita režisora Dmitrija Petrenko debejis izruode Dailis teatrī – Rasys Bugavičutis vyngrynuojumi utopejā 1 daļā “Biedre Zariņa”. Pi bejušuos astronomejis školuotuojis Ilgys īsarūn juos 20 godus naradzātais mozdāls Pauls. Garuos dzeivis laikā ir pīdzeivuoti daudzi zaudiejumi, i partū Ilga sovā prātā atsagrīž paguotnē, kas vysim kluotasūšajim dūd vareibu aizceļuot paguojušajūs 80. godūs. Meiluo mīra i īkāruotuo babys dzeivūkļa dieļ mozdāls ir gotovs pat imitēt dzeivi, kaida tei reiz bejuse. Tok nūteik kas naparadzāts – kai jis tyvuok īpazeist sovu babu i padūmu laika gaišūs idealus, tai gryušuok jam puortraukt spielēt itū teatri. Tys ir smīkleigi lirisks stuosts ar nostalgeju piec tuo, kas vaira nikod naatsagrīzs: utopiskajim idealim, cereibom iz jaunu dzeivi, ticeibu ledzpylsūnim. Vīnkuoršuo cylvāka kasdīnys dzeive, juo sapyni i viļšonuos, mīlesteiba i ticeiba par viesturi var pastuosteit daudz vaira nakai politiskī dokumenti i lāmumi. Izruodē lūmys atveidoj Olga Dreģe, Lidija Pupure, Mārtiņš Počs i Inita Dzelme. Beletu cena – 10 EUR.

Beletus var īsaguoduot Daugovpiļs teatra i “Biļešu Paradīzes” kasēs, kai ari škārsteiklā www.bilesuparadize.lv.